'Ibrani 9:15 - Jaji ma Su-sungi

¹⁵ Ma sababu gena-ge Kristus 'o dadi lese to golona di'a Ma Jou'ongu Madutu 'ai jaji ma su-sungi, la ngowa'a ga'a Ma Jou'ongu Madutu ro 'aro'o, ananga gena-ge nyengara 'aḏi dawongo barakati-barakati kasingado-ngadolo i'a ga'a Unanga 'o sijaji pasala ḏua di'a 'Ai 'umata. Mo-moini gena-ge ri dadi sababu Kristus 'ai se-sengene ri dadi du-duusu di'a sibebasa ngowa'a tamanga ḏosa sababu ananga 'aḏi mete'e 'atoranga ti-tiai ua ra Ma Jou'ongu Madutu 'ai jaji ma siḏa.

'Ibrani 9:15 Iomraidhean Croise

Matias 19:29

'A guna ḇato ra sisoi'i tala 'ai wala, 'ai iḏanga re biḏanga, 'ai ḇaḇa re ngina, 'ai ngowa-ngowa'a bolo 'ai guḏa sababu mete'e Ngoi, unanga gena-ge ḏuanga i'a 'o dawongo maḏibo siḏuolo latu moi re 'o sanga ḏi'i 'ahu kasingado-ngadolo i'a.

Matias 22:3

'Olana gena-ge 'o soma'a 'ai budaka-budaka 'aḏi tagi re 'aḏi 'aro'o ngowa-ngowa'a ga'a 'aḏi sanga saele di'a sapolo. Mada'a ananga gena-ge ga'a raḏi sanga saele 'aḏi oḏu'u sapolo.

Matias 25:34

Togumu i'a, Ngoi 'Olana gena-ge, to kanau toma ngowa-ngowa'a Tari giama ma kuwiḏa, ‘Ino, ngini mo-moini ga'a 'Ari Ḇaḇa renu sibarakati. Ni osama toma Soroga ma Pareta ga'a Ngoi ta sidodahe ḏua di'a ngini wakutu dungia 'i dadi nyangu.

Matias 25:36

Ngoi 'ari pakeanga 'i cua, ngini rini pula'a pakeanga ra Ngoi. Ngoi to siḏi, ngini rini kadiarata Ngoi. Ngoi toma bui ma dara, ngini rini sapolo tutumu Ngoi.’

Markus 10:17

Wakutu Yesus 'a dowanga 'ai ḏo-ḏagi, 'age rema ngowa'a matengo 'o la-lalara ino re 'o maḏipolono ra Yesus re 'o sano, “Guru ga'a No la madutu, ngoi balasu to 'a'a sa'olo, la to sanga 'ahu kasingado-ngadolo i'a?”

Lukas 18:18

Yahudi manga bi-biri'i matengo 'o sano ra Yesus, “Guru ga'a No la madutu, ngoi balasu to 'a'a sa'olo la to sanga 'ahu kasingado-ngadolo i'a?”

Lukas 22:20

So'o gena ḏi'i ya oromo gena-ge togumu i'a, Yesus 'a tede sawo'o 'anggur gena-ge re 'O kanau, “Sawo'o ma dara rema 'anggur nena-ne, gena-ge Ma Jou'ongu Madutu 'ai jaji ma su-sungi ga'a sitotomo Rari ngaunu. Ḏuanga i'a, ngaunu gena-ge 'i pa'ala di'a ngini.

Yohanes 10:28

Ngoi to pula'a 'ahu kasingado-ngadolo i'a ra ananga, re kasingado-ngadolo i'a ananga kama binasa ua. Ananga Tari giama ma sata re matengo i'a mai ua nga'unu 'u ra-rabasa.

Yesus 'ai so-soma'a 20:32

'Orasa nange-ne, ngoi to sidoa'a ngini ra Ma Jou'ongu Madutu, la Unanga 'o jaga ngini re ngoi to golo'o ngini ni macako'o namo-namoto ra Ma Jou'ongu Madutu 'ai demo mangale 'Ai mura re dadalara ra ngini. Sababu Ma Jou'ongu Madutu rai kuasa ḇato nyengara 'o site'e re ḏuanga i'a 'o pula'a cocatu di'a ngini mo-moini, 'Ai 'umata ga'a Unanga cumutu ḏua.

Roma 5:10

Sababu na'o wakutu ngene Ma Jou'ongu Madutu 'ai lawana, Unanga 'o sirimoi ngene ra Unanga sababu 'Ai Ngowa'a Nau'u 'ai se-sengene; tantu ḏua toma 'orasa nange-ne, wakutu ngene rewo marimoi ra Ma Jou'ongu Madutu, Kristus ḏuanga i'a 'o sisalamata ngene sababu Unanga dadunu 'o 'ahu moju!

Roma 5:6

Toma 'orasa ga'a Ma Jou'ongu Madutu ra sitantukanga pasala ḏua, wakutu ngene nga'unu wo sisalamata ua ngene masiretene, Kristus 'o sengene di'a ngene ga'a wo kiḏanga ra Ma Jou'ongu Madutu.

Roma 5:8

Mada'a Ma Jou'ongu Madutu masiretene 'a sijumu 'Ai dadalara madutu ra ngene so'o ne: Wakutu ngene wo 'ahu toma ḏosa moju, Kristus 'o sengene di'a ngene!

Roma 6:23

Sababu ḏosa ma ngogele so'o ne: Sengene kasingado-ngadolo i'a! Mada'a Ma Jou'ongu Madutu 'ai cocatu so'o ne: 'Ahu kasingado-ngadolo i'a ga'a ngene wo sanga sababu wo marimoi ra Kristus Yesus nanga Jou.

Roma 8:28

Re ngene wa waro mangale mo-moini ga'a Ma Jou'ongu Madutu 'o 'aturu di'a ngene nanga la-la. Ngene gena-ge ga'a dadalara Unanga, re Unanga na 'aro'o mete'e Unanga 'ai 'akala ma mau.

Roma 8:30

Ananga ga'a Ma Jou'ongu Madutu ya'u sitantukanga ḏua di'a dadi ma tero sa'olo 'Ai Ngowa'a Nau'u toma 'ua re 'au wali, Unanga 'o 'aro'o ananga gena-ge di'a 'aḏi dadi 'Ai ngowa-ngowa'a. Ananga ga'a Unanga ya'u 'aro'o ḏua, Unanga ya'u sidadi ngowa'a kamanga sala ua Tai momina. Re ananga ga'a ngowa'a kamanga sala ua Tai momina, Unanga ḏuanga i'a ya'u sidadi manga tabeata ma tero sa'olo 'Ai Ngowa'a Nau'u 'Ai tabeata ga'a mulia.

Roma 9:24

Ngene nena-ne, ngowa'a Yahudi, ngowa'a ga'a Unanga rena 'aro'o di'a 'aḏi dadi 'Ai 'umata. Re pa'i ngene masiretene ua, mada'a ngowa'a Yahudi ua ḏi'i.

2 Korintus 3:6

Unanga gena-ge 'o si'a'a ngomi nga'unu mi dadi 'Ai falalomu-falalomu toma jaji ma su-sungi. Jaji gena-ge toma Ngagara 'Ofi-'Ofi ino, toma hukumu ua ga'a manusia ya lefo toma boku. Sababu 'oru ga'a silefo toma boku 'i sigasa ngowa'a toma sengene, mada'a jaji toma Ngagara 'Ofi-'Ofi ino, 'i sigasa ngowa'a toma 'ahu.

Galatia 3:20

Lese to golona masiretene 'ai kuasa 'i cua; unanga gena-ge pa'i lese to golona ḇato toma ngowa'a fara ḏiḏi. Mada'a 'age pa'i Ma Jou'ongu Madutu ḇato wakutu Unanga 'o pula'a 'ai jaji ra Abraham. Unanga 'o paralu ua lese to golona, sababu Unanga masiretene rai kuasa.

Efesus 1:7

Ngene rewo marimoi ra Kristus. Dadi gena-ge ma ngale Ma Jou'ongu Madutu ro singi-ngiranga nanga ḏosa-ḏosa re Unanga ro sibebasa ngene sababu Yesus 'ai ngaunu ri pa'ala di'a ngene. Gena-ge ri dadi sababu 'Ai mura re dadalara ga'a kama tola'a ua di'a ngene.

2 Tesalonika 2:14

Sababu di'a gena-ge, Ma Jou'ongu Madutu 'o 'aro'o ngini, la ḏuanga i'a ngini ni sanga mulia mamete'e ra Yesus Kristus nanga Jou. Gena-ge 'i dadi sababu ngomi singadolo Habari Roanga ra ngini.

1 Timotius 2:5

Sababu Ma Jou'ongu Madutu pa'i matengo re 'age pa'i matengo ḇato nga'unu dadi lese to golona ra Ma Jou'ongu Madutu re manusia. Unanga gena-ge Kristus Yesus, 'o manusia ḏi'i.

2 Timotius 2:10

Sababu gena-ge, ngoi ta doiti sangisara mo-moini gena-ge di'a ngowa-ngowa'a ga'a Ma Jou'ongu Madutu 'o cumutu ḏua, la ananga ḏi'i 'aḏi sanga salamata re 'aḏi sanga mulia kasingado-ngadolo i'a toma soroga sababu 'aḏi marimoi ra Kristus Yesus.

Titus 1:2

Do-doto'o gena-ge 'i site'e ananga manga ngo-nganono mangale ḏuanga i'a 'aḏi sanga 'ahu kasingado-ngadolo i'a. Manusia wo dadi nyangu, 'ahu kasingado-ngadolo i'a gena-ge Ma Jou'ongu Madutu 'a sijaji pasala ḏua — re sanga ua Ma Jou'ongu Madutu 'o sa-sakala.

Titus 3:7

Ma Jou'ongu Madutu 'o 'a'a so'o gena-ge, la ngene nga'unu wo dadi ngowa'a kamanga sala ua Tai momina, sababu Yesus 'ai mura re dadalara. Re ḏi'i ngene nga'unu wo sanga 'ahu kasingado-ngadolo i'a ga'a ngene wo ngano-nganono.

'Ibrani 10:34

Sababu ngini reni basono sangisara re kangela ma'u mete'e ioronongoḏu ngo-ngaku rimoi toma bui. Re ḏi'i ngini ninga 'akala re sinyingara kangela ua wakutu ngowa'a ya ra-rabasa ngini ninga 'ori i'a rana. Ma nyonyata ngini ni maroanga, sababu ngini ni waro toma soroga 'age ngini ninga harata moju ga'a 'i kasingado-ngadolo i'a re lebe la-lamo'o reo harata ga'a ngowa'a ya ra-rabasa.

'Ibrani 10:36

Dadi, ngini balasu ni pake 'akala ma ḇanyo re ni ngaku tau-taunu, la ngini nga'unu ni 'a'a 'oru ḇato mete'e Ma Jou'ongu Madutu 'ai 'akala ma mau. Na'o so'o gena ngini ḏuanga i'a ni dawongo 'oru ga'a Unanga 'o sijaji.

'Ibrani 11:13

Ananga gena-ge mo-moini 'aḏi ngaku tau-taunu singadolo 'aḏi sengene. Ananga 'aḏi dawongo nyangu 'oru ga'a Ma Jou'ongu Madutu ro sijaji di'a ananga; mada'a enanga 'i ma tero sa'olo ya oḏi'i toma giḏanga re 'aḏi maroanga. Dadi ananga 'aḏi makanau ananga masiretene ma tero sa'olo ngowa'a tagi-tagi ino re ananga 'aḏi tegoro nena re si'a ua toma dungia nena-ne.

'Ibrani 12:24

Ngini ni sapolo talaḏi ra Yesus ga'a 'o dadi lese to golona di'a jaji ma su-sungi. Unanga gena-ge 'ai ngaunu lebe rousu rea Habel 'ai ngaunu. Sababu wakutu Yesus 'ai ngaunu 'i pa'ala, Ma Jou'ongu Madutu 'o singi-ngiranga ninga ḏosa. Mada'a wakutu Habel 'ai ngaunu 'i pa'ala, Ma Jou'ongu Madutu 'o sihukumu 'a Kain.

'Ibrani 13:20

Ngoi to manyiata ra Ma Jou'ongu Madutu, Unanga 'o dame ma cimi ga'a dadunu 'o si'ahu moju Ma Jou Yesus. Unanga gena-ge ro dadi ngene nanga Sowohi La-lamo'o re ngene wo dadi 'Ai doba-doba sababu Tai se-sengene. Re ḏi'i Tai se-sengene gena-ge si'aku sah Ma Jou'ongu Madutu 'ai jaji ga'a kasingado-ngadolo i'a di'a ngene.

'Ibrani 2:14

Ngowa-ngowa'a ga'a Ma Jou'ongu Madutu 'o si'aro'o 'Ai ngowa-ngowa'a, ananga gena-ge manusia remanga lese. Sababu gena-ge, Yesus 'o dadi ngowa'a manusia matengo ma tero sa'olo ngene, la 'ai se-sengene 'i singi-ngiranga 'Iblisi ma kuasa. 'Iblisi gena-ge 'i sigasa manusia toma sengene.

'Ibrani 3:1

Sababu gena-ge, ioronongoḏu ngo-ngaku rimoi ngene mo-moini ga'a Ma Jou'ongu Madutu ro cumutu re siwola i'a ḏua di'a wo osama toma soroga, ino ngene wa fikiri ngido-ngido mangale Yesus gena-ge. Unanga Ma Jou'ongu Madutu 'ai so-soma'a re nanga 'Imam 'Agung ga'a ngene rewo ngaku.

'Ibrani 6:13

Wakutu Ma Jou'ongu Madutu 'o sijaji ra Abraham, Unanga 'o tede sasi 'o masisasi tala 'Ai lomanga masiretene, sababu pa'i Ma Jou'ongu Madutu ḇato 'Ai lomanga lai kau'u.

'Ibrani 6:15

Abraham 'a totoma rai 'akala ḇanyo di'a jaji gena-ge, singadolo unanga 'a sanga.”

'Ibrani 7:22

Sababu sasi gena-ge, Yesus ro dadi ngene nanga ngo-nganono mode-mode'e mangale jaji ma su-sungi ḏuanga i'a 'i sitotomo. Re jaji gena-ge lebe rousu reo jaji ma siḏa.

'Ibrani 8:13

Sababu Ma Jou'ongu Madutu 'o kanau mangale jaji gena-ge “su-sungi,” Unanga ro 'a'a jaji ma siḏa ri pake riwara. Re 'ori i'a ga'a ri siḏa, ti'ara ua 'i iranga.

'Ibrani 9:12

Wakutu Kristus 'o osama toma Kamara Lai 'Ofi-'Ofi toma soroga Unanga 'o mete'e ua Yahudi manga 'imam 'agung manga 'atoranga. Pa'i ananga nga'unu osama Kamara Lai 'Ofi-'Ofi ḇato sababu 'aḏi gasa 'abingi ma ngaunu bolo sapi ra-ramasa ie ma ngaunu sa'olo manga jou-jou. Mada'a Kristus nga'unu 'o osama toma Kamara Lai 'Ofi-'Ofi 'O talaḏi ra Ma Jou'ongu Madutu sababu pa'i Unanga 'ai ngaunu masiretene ḇato. Unanga 'o osama pa'i soi moi ḇato sababu 'Ai ngaunu ri situusu ngene kasingado-ngadolo i'a.

'Ibrani 9:16

Na'o 'age rema surata wasiata, balasu 'age rema bukiti mangale ngowa'a ga'a 'a'a surata gena-ge ro sengene.

'Ibrani 9:28

So'o gena ḏi'i, Kristus ro sidoa'a 'Ai lese masiretene soi moi ḇato sa'olo jou-jou ra Ma Jou'ongu Madutu, la 'O singi-ngiranga ngowa'a repe manga ḏosa. Re ḏuanga i'a Unanga dadunu 'o sapolo moju ma soi ḏiḏi, Unanga 'o singi-ngiranga ḏosa riwara, mada'a 'O gasa salamata di'a ngowa'a ga'a 'aḏi totoma Unanga.

Yakobus 1:12

Bara'utungu ngowa'a ga'a manga ngo-ngaku elala ua na'o sanga bo-baja toma 'Iblisi. Sababu wakutu bo-baja ma 'orasa ri togumu, ḏuanga i'a ya sanga 'ahu kasingado-ngadolo i'a sa'olo ngogele rimoi ga'a Ma Jou'ongu Madutu 'o sijaji pasala ḏua di'a ngowa-ngowa'a ga'a 'aḏi dadalara Unanga.

1 Petrus 3:18

Sababu kalaha Kristus kai ḏosa ua, Unanga ro basono sangisara. Unanga ro basono sengene soi moi di'a 'a doiti manusia nanga ḏosa. Unanga 'a si'a'a so'o gena, la ngene manusia nyengara wo marimoi ra Ma Jou'ongu Madutu. Manusia wo sisengene Unanga pa'i 'ai lese ḇato, mada'a sababu Ma Ngagara 'Ofi-'Ofi ma kuasa, Ma Jou'ongu Madutu dadunu 'o si'ahu Unanga moju.

1 Petrus 5:10

Ti'ara ua, ngini ni basono ma sangisara. Togumu i'a Ma Jou'ongu Madutu 'o sitiai ngini moju: Unanga gena-ge masiretene 'O site'e ninga ngo-ngaku, la ninga ngo-ngaku kama elala ua, mada'a ni nga'unu tahana toma 'oru ḇato. Unanga 'o 'a'a so'o gena-ge, sababu Unanga romanga mura re dadalara re Ro 'aro'o ngini di'a ni sanga balangu Tai kabasarana kama ḏo-ḏogumu ua, sababu ni marimoi ra Kristus.

1 Yohanes 2:25

Re Ma Jou'ongu Madutu 'ai jaji, ga'a 'a siajele pasala ḏua mangale 'Ahu kasingado-ngadolo i'a, di'a ngene.

Tingoýi 5:9

Re ananga gena-ge 'aḏi manyanyi nyanyi su-sungi rimoi. “Doba ma Ngowa 'I patasa ḇato di'a 'oro kartasi lo-lolo gena-ge re 'I woi'i ma segele. Sababu Enanga ri sengene re Ma ngaunu 'i pa'ala, la 'I tuusu ngowa-ngowa'a toma suku mo-moini, demo-demo mo-moini, nagara mo-moini re bangsa mo-moini di'a Ma Jou'ongu Madutu.