'Ibrani 7:2 - Jaji ma Su-sungi

² Togumu i'a, Abraham 'o pula'a ma balangu moi toma balangu nyagi moi ino ra Melkisedek, 'oru ga'a unanga 'a sanga toma parangi ma dara. Melkisedek 'ai lomanga ma ngale: “ 'Olana Loasa re Banari.” Re ḏi'i sababu Unanga 'o 'olana toma Salem, 'ai lomanga ma lelegu ma ngale: “ 'Olana Dame.”

'Ibrani 7:2 Iomraidhean Croise

Matias 1:23

“We-were'a matengo mo waro nau'u nyangu, ḏuanga i'a 'ami po'olo tegoro, re mo sibuoro ngowa nau'u matengo. Ngowa kiau gena-ge ḏuanga i'a silomanga Imanuel” — ga'a ma ngale: Ma Jou'ongu Madutu mamete'e ra ngene.

Lukas 2:14

“Puji re silamo'o Ma Jou'ongu Madutu toma soroga, re dame toma dungia toma manusia ga'a Ma Jou'ongu Madutu ya'u sanangi.”

Roma 3:26

Mada'a nange-ne sababu Yesus Kristus 'ai se-sengene, Ma Jou'ongu Madutu ra sijumu mangale Unanga 'o 'adili. Re Unanga ḏi'i 'o sijumu mangale Unanga 'o 'adili, sababu Unanga 'o kanau 'a guna ḇato ga'a 'ai ngo-ngaku ra Yesus, unanga gena-ge 'o dadi loasa re banari ra Unanga 'ai momina.

'Ibrani 7:1

'Ua re 'au wali Melkisedek, unanga 'o dadi 'olana toma Salem re 'o dadi ḏi'i 'imam ra Ma Jou'ongu Madutu toma Gau'u. Wakutu 'a Abraham ro sita'aloko 'olana-'olana toma parangi, Unanga 'o maḏibo re Melkisedek 'o sapolo ma'u sanga, kara 'o sibarakati Abraham.

'Ibrani 7:3

Matengo i'a mai ua ya waro 'a Melkisedek 'ai ḇaḇa re ngina, bolo 'ai ete re dotumu, bolo 'ai buoro re sengene ma 'orasa. Unanga ma tero sa'olo Ma Jou'ongu Madutu 'ai Ngowa'a Nau'u sababu Melkisedek 'o dadi 'imam kasingado-ngadolo i'a.