'Ibrani 5:9 - Jaji ma Su-sungi

⁹ Reo ngo'omo gena-ge, Unanga 'o dadi Salamata ma Cimi ga'a ti-tiai. Re Unanga 'o dadi 'ahu ma cimi kasingado-ngadolo i'a di'a ngowa'a mo-moini ga'a 'aḏi ta'aloko ra Unanga.

'Ibrani 5:9 Iomraidhean Croise

Matias 17:5

Wakutu 'a Petrus 'o ka-kanau moju, kakamo lai tarangi ya'u sao ananga re toma kakamo gena-ge ma dara 'aḏi 'isene iḏingi ma betongo so'o ne: “Unanga nena-ne 'Ari Ngowa'a Nau'u ga'a Tu dadalara, Ngoi 'ari 'akala re sinyingara ma sanangi Ta sipa'ala ra Unanga. Ni 'isene Unanga!”

Lukas 13:32

Yesus 'o sangoro, “Tagi na sihabari ra Herodes, unanga gena-ge ga'a sihaga ngowa'a. ‘Wangere nange-ne bolo da-daini, Ngoi ḏuanga i'a to sisupu roh ma jira, re to si-la ngowa'a siḏi. Mada'a toma wangere ma soi ro'ange Ngoi ḏuanga i'a ta siḏuanga 'Ari munara.’

Yohanes 19:30

Yesus 'a ḇowisi ma 'anggur gena-ge togumu i'a, Unanga 'o kanau, “Togumu ḏua!” Gena ḏua, Unanga 'a ruku tala 'Ai sae'e re 'Ai sangagara 'i togumu.

Yesus 'ai so-soma'a 3:15

Ngini ni sisengene Unanga ga'a 'o 'ahu ma cimi. Unanga ro sengene, mada'a Ma Jou'ongu Madutu dadunu 'U si'ahu moju. Ngomi nena-ne mi dadi sakisi sababu maoḏi'i masiretene Yesus dadunu 'o 'ahu moju.

Yesus 'ai so-soma'a 4:12

Pa'i ra Yesus ḇato nyengara ngowa-ngowa'a 'aḏi sanga 'ahu kasingado-ngadolo i'a. Sababu toma dungia sitabi donga, matengo i'a mai ua 'o sanga kuasa di'a 'o sisalamata ngene.”

Yesus 'ai so-soma'a 5:32

Ngomi nena-ne mi dadi sakisi mangale mo-moini gena-ge. Ma Ngagara 'Ofi-'Ofi, ga'a Ma Jou'ongu Madutu 'o pula'a ḏua di'a ngowa-ngowa'a ga'a 'aḏi mete'e Unanga 'ai 'akala ma mau, 'I dadi sakisi ḏi'i mangale Yesus.”

Roma 1:5

Sababu Yesus Kristus 'ai lomanga, ngoi reto sanga barakati wakutu Ma Jou'ongu Madutu 'o sitede ngoi sa'olo Yesus 'ai so-soma'a, la ngoi to doto'o ngowa'a toma bangsa mo-moini di'a mete'e Yesus Kristus 'ai do-doto'o sababu manga ngo-ngaku.

Roma 10:16

Mada'a ngowa'a mo-moini ua ya dawongo Habari Roanga gena-ge. Sababu Nabi Yesaya 'o kanau so'o ne: “Ma Jou, 'a guna 'o ngaku minga habari?!”

Roma 15:18

Ngoi to nau'u di'a to kanau mangale pa'i ma duhu sa'olo Kristus ro sigasa ngowa'a Yahudi ua di'a mete'e Ma Jou'ongu Madutu, sababu Unanga gena-ge ro sipake 'ari demo re ganau re 'ari ga'a:

Roma 2:8

Mada'a 'age ngowa'a lelegu ga'a 'aḏi mete'e manga mau masiretene singadolo ananga gena-ge dawongo ua Ma Jou'ongu Madutu 'ai ba-banari re 'aḏi madaga'a 'ori i'a ma jira. Ananga gena-ge ḏuanga i'a sanga duruta ra Ma Jou'ongu Madutu tala.

Roma 6:17

Mada'a ino ngene wo sibere ie murasa ma la ra Ma Jou'ongu Madutu, sababu ma siḏa ngini ngowa'a budaka toma ḏosa mada'a nange-ne ngini ni mete'e reninga 'akala re sinyingara mode-mode'e do-doto'o banari ga'a 'i sipula'a ḏua ra ngini.

2 Korintus 10:5

Ngomi ma siruba ananga manga 'akala re sinyingara ma de-de'e re momole ga'a 'i sihaga ngowa'a re dola'aku ngowa'a 'aḏi nana'o Ma Jou'ongu Madutu. Gena-ge ma tero sa'olo sordado-sordado 'aḏi siwejere 'o hisa ga'a lai kapiringi. Re ngomi mi ngali ananga manga fikirana, ga'a 'au nga'ene 'aḏi dawongo Yesus ua, la ananga 'aḏi ta'aloko ra Kristus.

Filipi 2:12

Sababu gena-ge, ioronongoḏu ngo-ngaku rimoi ga'a ngoi tini dadalara re ga'a toma mulaingi ngini reni mete'e Ma Jou'ongu Madutu tau-taunu, ngoi to golo'o mangale ngini balasu ni makutale mode-mode'e di'a ni si'a'a ti-tiai reninga 'akala re sinyingara 'i boloto, 'oru ḇato ga'a 'i patasa di'a ngowa'a ga'a Ma Jou'ongu Madutu ro sisalamata ḏua. Awa ngini na si'a'a pa'i wakutu ngoi taninga sigolona ḇato; mada'a ma la-lamo'o i'a wakutu ngoi to kiḏanga ra ngini.

2 Tesalonika 1:8

Unanga ḏuanga i'a 'o 'uci da'u soroga tala Rai u'u leja-lejanga di'a sihukumu 'a guna ḇato 'aḏi nana'o ua Ma Jou'ongu Madutu, bolo mete'e ua Habari Roanga mangale Yesus nanga Jou.

2 Tesalonika 2:16

Ma Jou'ongu Madutu nanga Ḇaḇa 'o dadalara ngene re mete'e 'Ai mura re dadalara, Unanga na si'a'a ngene nanga 'akala namo-namoto re dadi site'e nanga ngo-nganono. Sababu gena-ge, ngoi to golo'o Ma Jou'ongu Madutu nanga Ḇaḇa re nanga Jou Yesus Kristus masiretene 'o babata ngini re site'e ninga 'akala re sinyingara, la ngini nga'unu ni si'a'a re ni sihabari 'ori i'a la-la.

2 Timotius 2:10

Sababu gena-ge, ngoi ta doiti sangisara mo-moini gena-ge di'a ngowa-ngowa'a ga'a Ma Jou'ongu Madutu 'o cumutu ḏua, la ananga ḏi'i 'aḏi sanga salamata re 'aḏi sanga mulia kasingado-ngadolo i'a toma soroga sababu 'aḏi marimoi ra Kristus Yesus.

'Ibrani 1:14

Na'o so'o gena-ge, mala'ekata-mala'ekata gena-ge 'o 'oru?! Ananga gena-ge roh-roh ga'a 'i de-de'oso Ma Jou'ongu Madutu re 'i riono ngowa-ngowa'a ga'a ḏuanga i'a 'aḏi dawongo salamata.

'Ibrani 11:40

Sababu Ma Jou'ongu Madutu ro sitantukanga di'a 'o sidodahe 'ori i'a ga'a lebe rousu di'a ngene: Pa'i ananga gena-ge mamete'e ra ngene ḇato ḏuanga i'a ananga 'aḏi dadi ti-tiai.

'Ibrani 11:8

Sababu Abraham 'ai ngo-ngaku, unanga 'o mete'e Ma Jou'ongu Madutu 'ai parenta. Ma Jou'ongu Madutu 'o 'aro'o re 'o soma'a tagi toma ngi'i rimoi ga'a Unanga ḏuanga i'a 'o pula'a ngi'i gena-ge sa'olo 'ai warisi di'a 'ai ju'uda. Kalaha Abraham 'a waro ua 'o tagi le'a, unanga 'o sisoi'i 'ai nagara re 'o mete'e Ma Jou'ongu Madutu 'ai parenta.

'Ibrani 12:2

Ino ngene wo tatamo tau-taunu pa'i ra Yesus ḇato. Sababu Unanga nena-ne 'o welanga salamata ma ngo'omo di'a ngene sababu 'Ai ngo-ngaku ra Ma Jou'ongu Madutu. Re ḏi'i sababu Unanga si'a'a nanga salamata 'i ti-tiai sababu nanga ngo-ngaku ra Unanga. Unanga 'o tahana wakutu sanga sangisara toma ngowa'a ga'a 'U salib. Re kalaha Unanga 'o sengene toma salib, gena-ge ga'a 'i sipula'a mara'a ngowa'a, Unanga 'a kalesanga ua sababu Unanga pa'i 'o 'elingi tau-taunu nena-ne: Togumu i'a 'O sanga roanga. Nange-ne Unanga 'o tegoro ra Ma Jou'ongu Madutu 'ai giama ma kuwiḏa, re 'O parenta mamete'e ra Unanga.

'Ibrani 2:10

Ma Jou'ongu Madutu 'o 'a'a 'ori i'a mo-moini toma dungia nena-ne di'a 'Ai maksudu masiretene. Unanga gena-ge ra sitantukanga mangale ngowa'a ma repe 'aḏi dadi 'Ai 'umata re sibalangu 'Ai mulia ra ananga gena-ge. Sababu gena-ge, Yesus ga'a welanga ngo'omo di'a ngene wo sanga salamata, Unanga gena-ge balasu 'o sanga sangisara singadolo 'o sengene, la Unanga nyengara 'o dadi Salamata ma Cimi ga'a 'i ti-tiai.

'Ibrani 2:3

Dadi na'o ngene wo gare 'akala re sinyingara ua tananga salamata gena-ge, tantu ḏua ngene wo wiḏi yoḏu'u toma sanga hukumu sababu salamata gena-ge lebe la-lamo'o reo Musa 'ai hukumu. Re ngowa'a ma siḏa ga'a siajele habari mangale salamata toma ngowa-ngowa'a, Unanga gena-ge Ma Jou Yesus masiretene! Ḏi'i ananga gena-ge ya isene ḏua Unanga 'ai habari Tai 'uḏu ma betu'u, ananga raḏi dadi sakisi re ya sijarita ḏua ra ngene. Dadi ngene rewa waro habari gena-ge 'i banari.

'Ibrani 9:12

Wakutu Kristus 'o osama toma Kamara Lai 'Ofi-'Ofi toma soroga Unanga 'o mete'e ua Yahudi manga 'imam 'agung manga 'atoranga. Pa'i ananga nga'unu osama Kamara Lai 'Ofi-'Ofi ḇato sababu 'aḏi gasa 'abingi ma ngaunu bolo sapi ra-ramasa ie ma ngaunu sa'olo manga jou-jou. Mada'a Kristus nga'unu 'o osama toma Kamara Lai 'Ofi-'Ofi 'O talaḏi ra Ma Jou'ongu Madutu sababu pa'i Unanga 'ai ngaunu masiretene ḇato. Unanga 'o osama pa'i soi moi ḇato sababu 'Ai ngaunu ri situusu ngene kasingado-ngadolo i'a.

'Ibrani 9:15

Ma sababu gena-ge Kristus 'o dadi lese to golona di'a Ma Jou'ongu Madutu 'ai jaji ma su-sungi, la ngowa'a ga'a Ma Jou'ongu Madutu ro 'aro'o, ananga gena-ge nyengara 'aḏi dawongo barakati-barakati kasingado-ngadolo i'a ga'a Unanga 'o sijaji pasala ḏua di'a 'Ai 'umata. Mo-moini gena-ge ri dadi sababu Kristus 'ai se-sengene ri dadi du-duusu di'a sibebasa ngowa'a tamanga ḏosa sababu ananga 'aḏi mete'e 'atoranga ti-tiai ua ra Ma Jou'ongu Madutu 'ai jaji ma siḏa.

'Ibrani 9:28

So'o gena ḏi'i, Kristus ro sidoa'a 'Ai lese masiretene soi moi ḇato sa'olo jou-jou ra Ma Jou'ongu Madutu, la 'O singi-ngiranga ngowa'a repe manga ḏosa. Re ḏuanga i'a Unanga dadunu 'o sapolo moju ma soi ḏiḏi, Unanga 'o singi-ngiranga ḏosa riwara, mada'a 'O gasa salamata di'a ngowa'a ga'a 'aḏi totoma Unanga.

1 Petrus 1:22

Dadi nange-ne ngini ninga 'akala re sinyingara 'i dadi 'ofi-'ofi, sababu ngini ni mete'e Ma Jou'ongu Madutu 'ai do-doto'o banari singadolo mode-mode'e ngini ma'u dadalara ninga ioronongoḏu ngo-ngaku rimoi. Kalaha so'o gena, ngoi to pula'a duga re domolo moju, ngini balasu ni ma'u dadalara reo 'akala re sinyingara mode-mode'e,

1 Yohanes 5:20

Ngene rewo waro ḏi'i mangale Ma Jou'ongu Madutu 'ai Ngowa'a Nau'u ro sapolo re Ro pula'a wo-waro ra ngene, la ngene wu nana'o Ma Jou'ongu Madutu ga'a banari. Ngene wo 'ahu marimoi ra Ma Jou'ongu Madutu ga'a banari re wo 'ahu marimoi Rai Ngowa'a Nau'u, Yesus Kristus. Unanga gena-ge mode-mode'e ma tero Ma Jou'ongu Madutu re Unanga masiretene 'ahu kasingado-ngadolo i'a ma cimi.

Yudas 1:21

Re ḏi'i balasu ni 'ahu 'eli-'elingi Ma Jou'ongu Madutu 'ai dadalara di'a ngini. Ni 'elingi tau-taunu gena-ge sa'olo ni totoma ni ngaku mode-mode'e mangale nanga Jou Yesus Kristus dadunu 'o sapolo moju. Re wakutu Ma Jou dadunu 'o sapolo moju, Unanga 'o pula'a 'ahu kasingado-ngadolo i'a ra ngini, sababu 'Ai 'akala re sinyingara ma la-la.