'Ibrani 4:12 - Jaji ma Su-sungi

¹² Sababu Ma Jou'ongu Madutu 'ai demo enanga 'i 'ahu-'ahu re lebe mangono reo samaranga ma doto romoḏiḏi. Samaranga gena-ge 'i lapasa toma donga-donga re nyi-nyiala ma bati. Gena-ge ma tero sa'olo Ma Jou'ongu Madutu 'ai demo ga'a osama singadolo toma nyawa re roh ma bati. Unanga 'ai demo gena-ge enanga ya waro manusia manga fikirana re 'akala re sinyingara.

'Ibrani 4:12 Iomraidhean Croise

Lukas 8:11

“ 'Ade-'ade nena-ne ma ngale so'o ne: Gisisi gena-ge Ma Jou'ongu Madutu 'ai habari.

Yohanes 12:48

'A guna ḇato 'o dawongo ua re 'o mete'e ua 'Ari demo-demo, di'a unanga gena-ge 'age rema juruhakimi ḏua! 'Ari demo-demo gena-ge ga'a ta sikanau, enanga gena-ge 'i singe-ngeta'a hukumu ra unanga toma Kiamata ma Wangere.

Yohanes 6:51

Ngoi nena-ne roti 'ahu ga'a 'i 'uci da'u soroga tala. Na'o 'a guna ḇato oromo roti gena-ge, ḏuanga i'a 'o 'ahu kasingado-ngadolo i'a. Roti gena-ge 'Ari lese ga'a ḏuanga i'a ta sidoa'a, la manusia nyengara sanga 'ahu.”

Yesus 'ai so-soma'a 2:37

Wakutu ananga ya 'isene so'o gena, ananga manga 'akala re sinyingara 'i kangela masala. Ḏua ananga 'aḏi sano ra Petrus re 'a Yesus 'ai so-soma'a ma lelegu ḏi'i, “Ioronongoḏu, ngomi balasu mi 'a'a 'oru?”

Yesus 'ai so-soma'a 4:31

Ananga 'aḏi manyiata togumu i'a, ngi'i gena-ge 'i elala. Re ananga mo-moini Ma Ngagara 'Ofi-'Ofi ya'u ḏegoro re ananga 'aḏi singadolo Ma Jou'ongu Madutu 'ai demo kama mojongo ua.

Yesus 'ai so-soma'a 5:33

Wakutu Mahkamah 'Agama ya 'isene so'o gena, ananga 'aḏi ruta masala re 'aḏi ma'u fakati ya'u sisengene Yesus 'ai so-soma'a.

Yesus 'ai so-soma'a 7:38

'A Musa 'o dadi demo ma do-dowanga toma ngowa'a Israel manga sigolona toma ngi'i dongi-dongi wakutu mala'ekata matengo 'o siajele ra nanga ete re dotumu toma Kie Sinai. Unanga 'a dawongo ra Ma Jou'ongu Madutu ino habari mangale nanga 'ahu ma duhu di'a 'a singadolo ra ngene.

Roma 1:16

Sababu ngoi to ngaku ti-tiai toma Habari Roanga ga'a kuasa ra Ma Jou'ongu Madutu tala di'a sisalamata ngowa'a ga'a raḏi ngaku mo-moini: Siḏa-siḏa ngowa'a Yahudi, kara nange-ne ngowa'a Yahudi ua ḏi'i.

1 Korintus 1:24

Mada'a di'a ngowa-ngowa'a ga'a Ma Jou'ongu Madutu ro 'aro'o, bae ngowa'a Yahudi bae ngowa'a Yahudi ua, Habari Roanga gena-ge Ma Jou'ongu Madutu 'ai duhu di'a sijumu mangale 'Ai kuasa re 'Ai 'akala ma soro'unu.

2 Korintus 2:17

Ngowa'a repe ya singadolo Ma Jou'ongu Madutu 'ai demo sababu ananga mau manga 'ahu pai-pai'i. Mada'a ngomi Ma Jou'ongu Madutu 'ai so-soma'a re mi marimoi ra Kristus, ngomi mi singadolo habari ra Ma Jou'ongu Madutu reminga 'akala re sinyingara bo-boloto re Ma Jou'ongu Madutu 'o dadi ngomi minga sakisi.

2 Korintus 4:2

Siḏibo ḏi'i, ngomi ma sipake ua duhu ga'a 'i go-gogono ga'a sipula'a mara'a ngomi: Ngomi mi sihaga ngowa'a ua bolo ma ngali Ma Jou'ongu Madutu 'ai demo ua. Mada'a ngomi reminga 'akala re sinyingara ma ba-banari mi de-de'oso re mi mete'e Unanga 'ai mau. Sababu gena-ge, Ma Jou'ongu Madutu minga sakisi mangale ngomi mi siajele pa'i ba-banari ḇato dadi ngowa'a mo-moini nyengara 'aḏi ngaku Habari Roanga ga'a ngomi ma singadolo.

Efesus 5:13

Mada'a na'o ngini ni sitaḇela'a i'a manga duhu ma faja, gena-ge ma tero sa'olo ni tagala lapuru toma hafu-hafu. Ḏua ngowa'a ya oḏi'i re 'aḏi 'a'a rawara duhu gena-ge,

Efesus 5:26

Kristus 'o 'a'a so'o gena, la Unanga 'a sidadi ngene 'Ai 'umata. Unanga gena-ge ro si'ofi 'Ai jama'ata reo 'Ai do-doto'o re ḇanyo na'o wo sanga baptis.

Efesus 6:17

Ma Jou'ongu Madutu 'ai salamata ga'a na dawongo, gena-ge 'i ma tero sa'olo sordado manga capeo waja. Re Ma Jou'ongu Madutu 'ai demo ga'a 'Ai Ngagara 'Ofi-'Ofi 'i pula'a, gena-ge 'i ma tero sa'olo sordado manga samaranga.

1 Tesalonika 2:13

'Age fara moi moju 'i si'a'a ngomi mi sibere ie minga murasa ma la tau-taunu ra Ma Jou'ongu Madutu, sababu wakutu ngomi mi singadolo habari ra Ma Jou'ongu Madutu ino, ngini ni 'isene re ni ngaku habari gena-ge ma tero ua manusia manga demo, mada'a sa'olo demo ra Ma Jou'ongu Madutu ino, ga'a 'i banari. Unanga 'o munara tau-taunu sipake habari gena-ge taninga 'akala re sinyingara ma dara, ngini gena-ge ga'a reni ngaku Kristus.

1 Tesalonika 5:23

Ngomi manyiata ra Ma Jou'ongu Madutu, ga'a 'O sipula'a dame ra ngene, mangale Unanga masiretene 'O sidadi ngini mode-mode'e sa'olo 'Ai ngowa'a 'ofi-'ofi: bae ninga nyawa, ninga 'akala re sinyingara re ninga de'oso re ḏegoro kama rapu ua singadolo nanga Jou Yesus Kristus dadunu 'o sapolo moju.

'Ibrani 13:7

Awa ngini ni sidaioranga ninga bi-biri'i ma siḏa ga'a 'aḏi singadolo Habari Roanga ra ngini. Ni tailako la-la ino manga 'ahu ma duhu sa'olo ananga manga 'ahu re ma duhu sa'olo ananga manga sengene. Dadi ngini nga'unu ni cuḏuḏu'u ananga manga ngo-ngaku.

'Ibrani 6:5

Re tamanga 'ahu ma dara ananga ya waro mangale Ma Jou'ongu Madutu 'ai demo ga'a lai rousu; re ya basono ḏi'i ma kuasa ga'a toma dungia su-sungi.

Yakobus 1:18

Mete'e Ma Jou'ongu Madutu 'ai 'akala ma mau masiretene, Unanga 'o sidadi ngene sa'olo 'Ai ngowa-ngowa'a sababu wo ngaku 'Ai habari banari, la ngene wo dadi Unanga 'ai do-dadi ma la-lamo'o ma re'u i'a Tai do-dadi mo-moini.

1 Petrus 1:23

sababu ngini dadunu reni sibuoro moju. Ngini reni sanga 'ahu su-sungi taninga ḇaḇa re ngina ua ga'a basono sengene, mada'a ra Unanga ga'a kama sengene ua. Gena-ge 'i dadi sababu ngini ni ngaku Ma Jou'ongu Madutu 'ai demo ga'a 'i 'ahu re 'i tahana kasingado-ngadolo i'a

Tingoýi 1:16

Re Tai giama ma kuwiḏa 'o gu'u mumuḏungu ngai tumudingi, Tai madanga ma dara 'i supu samaranga mangono rimoi ma doto romoḏiḏi. 'Ai biono ma lalaki ma tarangi ma tero sa'olo wangere 'o 'olona tala.

Tingoýi 19:15

Tai madanga ma dara 'i supu samaranga mangono ḇotu moi. Rai samaranga gena-ge Unanga ḏuanga i'a 'o sita'aloko Tai lawana toma bangsa-bangsa, kara Unanga 'o parenta ananga Rai didiki ḇesi. Dadi Unanga ḏuanga i'a 'o co'o 'anggur toma 'anggur ma jo-jo'o ma ngi'i. Gena-ge ma ngale: Unanga 'o siḏagi Ma Jou'ongu Madutu ga'a 'Ai kuasa ma pari cua, Unanga 'ai borata Tai lawana.

Tingoýi 19:21

Re Unanga ga'a palene jarana bu-buḏo gena-ge 'O sisengene ananga manga sordado-sordado Rai samaranga ga'a 'i supu Tai madanga. Ḏua namo-namo toma diwanga matai sapolo ya oromo ananga manga la-la'eme singadolo wunusu.

Tingoýi 2:16

Sababu gena-ge, ngini balasu ni maḏibo toma ngo'omo boloto! Na'o so'o gena-ge ua; ngasamoi Ngoi to sapolo re To parangi ngowa-ngowa'a gena-ge Rari samaranga Tari madanga.

Tingoýi 2:23

Sidogo ḏi'i, ngo Izebel 'ami me-mete'e ga'a ma tero sa'olo 'ami ngowa'a, Ngoi ḏuanga i'a Ta'u sisengene, la Ngoi 'ari 'umata mo-moini ya waro mangale Ngoi nena-ne nga'unu to du-dumunu ngowa'a manga 'akala re sinyingara. Re Ngoi ḏuanga i'a to balasa mete'e ngini ni maḏiga'a masiretene.

Tingoýi 20:4

Gena ḏua, ngoi to oḏi'i ngowa-ngowa'a manga nyawa-nyawa, ananga gena-ge ga'a manga camala ngowa'a ya tola'a ḏua, sababu 'aḏi singadolo habari mangale Yesus re 'aḏi mete'e Ma Jou'ongu Madutu 'ai demo. Re ḏi'i sababu ngowa-ngowa'a gena-ge 'aḏi oḏu'u silamo'o re siḏubuso haiwani re dulada haiwani. Ananga gena-ge ḏi'i 'aḏi sanga ua nana'o haiwani tamanga memese bolo tamanga giama. Dadi ananga dadunu 'aḏi 'ahu moju re 'aḏi tegoro toma ḏe-ḏegoro—ḏe-ḏegoro re 'aḏi parenta sa'olo 'olana mamete'e ra Kristus ma di'ara musungu cala moi