'Ibrani 3:1 - Jaji ma Su-sungi

¹ Sababu gena-ge, ioronongoḏu ngo-ngaku rimoi ngene mo-moini ga'a Ma Jou'ongu Madutu ro cumutu re siwola i'a ḏua di'a wo osama toma soroga, ino ngene wa fikiri ngido-ngido mangale Yesus gena-ge. Unanga Ma Jou'ongu Madutu 'ai so-soma'a re nanga 'Imam 'Agung ga'a ngene rewo ngaku.

'Ibrani 3:1 Iomraidhean Croise

Yohanes 17:3

'Ahu kasingado-ngadolo i'a ma ngale so'o ne: Ngowa'a 'aḏi nana'o 'Ari Ḇaḇa, 'aḏi nana'o Ngoi ḏi'i. 'Ari Ḇaḇa pa'i matengo ḇato ga'a Ma Jou'ongu Madutu mode-mode'e; re Ngoi, Yesus Kristus ga'a 'Ari Ḇaḇa Ri 'utusu.

Yohanes 20:21

Ḏua Yesus 'o kanau soi moi moju, “Dame ra ngini! Ngoi tunu 'utusu ngini ma tero 'Ari Ḇaḇa Ro 'utusu Ngoi.”

Yohanes 20:27

Gena ḏua, Unanga 'o kanau ra Tomas, “No singosama 'ani rarag̱a Tari giama ma nyaboto, oḏi'i 'Ari giama. Re na singosama 'ani giama Tari gagoro ma nyaboto. Awa no sitaka-taka, no ngaku sababu nena-ne Ngoi!”

Yesus 'ai so-soma'a 1:15

Toma wangere rimoi, 'age rema ngowa-ngowa'a ngaku Yesus 'aḏi malomu (ananga ḏa nga latu moi re nga nyagi romoḏiḏi). Toma 'orasa gena-ge, 'a Petrus 'o te'oso toma ngowa'a repe gena-ge manga sigolona re 'o kanau,

Roma 11:17

Sidogo ḏi'i, Israel manga ete re dotumu ma ju'uda mamuni'a gena-ge, ma tero sa'olo ate zaitun ma umanga ga'a ngowa'a ya tola'a. Re ngini ngowa'a Yahudi ua ma tero sa'olo zaitun ma ja-jaga ga'a 'i konyo toma bangana. Re jaga-jaga ma la'o gena-ge 'i sipata toma ate zaitun ma lese di'a singali umanga ga'a ri sitola'a. Ḏua jaga 'i sanga oromo toma ate zaitun ma utu'u nange-ge. So'o gena ḏi'i ngini ngowa'a Yahudi sanga barakati ga'a Ma Jou'ongu Madutu 'o sijaji toma ngowa'a Yahudi manga ju'uda.

Roma 15:27

Ngowa'a Yahudi ua toma daeraha gena-ge, ananga raḏi mafakati remanga 'akala re sinyingara sa-sanangi, di'a 'aḏi riono so'o gena-ge. Ma nyonyata ananga 'aḏi mabanyatoro 'ori i'a toma ngowa'a Yahudi, sababu ananga ngowa'a Yahudi ua 'aḏi sanga barakati ra Ma Jou'ongu Madutu tala mete'e 'Ai jaji toma ngowa'a Yahudi. Dadi gena-ge 'i patasa di'a ananga riono remanga 'ori i'a rana toma ngowa'a Yahudi ga'a ma dinga'unu ua.

Roma 15:8

Awa ni sidaioranga mangale Kristus ro sapolo toma dungia di'a 'O de-de'oso ngowa-ngowa'a Yahudi, la Unanga 'o sijumu ra ngene mangale Ma Jou'ongu Madutu 'o cufala sitotomo 'Ai jaji tananga ete re dotumu.

Roma 9:24

Ngene nena-ne, ngowa'a Yahudi, ngowa'a ga'a Unanga rena 'aro'o di'a 'aḏi dadi 'Ai 'umata. Re pa'i ngene masiretene ua, mada'a ngowa'a Yahudi ua ḏi'i.

1 Korintus 10:17

Sababu roti pa'i ngai moi re ngene mo-moini wo oromo roti gena-ge. Dadi ngene ga'a nanga repe wo dadi nanga lese pa'i rimoi, re wo marimoi ra Kristus.

1 Korintus 9:23

Ngoi to si'a'a mo-moini gena-ge, dadi nga'unu ngowa'a lebe dogo 'aḏi ngaku Habari Roanga, la ngoi ḏi'i sanga bara'utungu mamete'e ra ananga gena-ge.

2 Korintus 1:7

Sababu gena-ge, ngomi minga ngo-nganono 'i sitaka-taka ua mangale ngini nga'unu ni tahana sangisara tau-taunu. Sababu ngomi waro ngini reni basono sangisara ma tero sa'olo ngomi ḏi'i So'o gena ḏi'i, Ma Jou'ongu Madutu ḏuanga i'a 'o site'e ninga 'akala re sinyingara ma tero sa'olo Unanga 'o site'e minga 'akala re sinyingara.

2 Korintus 9:13

Dadi sababu ninga bu-bula'a lai lamo'o ga'a 'i sipula'a reninga 'akala re sinyingara ma la-la, ngowa'a ngaku Yesus manga repe toma daeraha Yudea 'aḏi puji re silamo'o Ma Jou'ongu Madutu. Sababu ananga ya oḏi'i ngini ni sijumu ninga duhu ga'a ni mete'e Habari Roanga mangale Kristus. Re ananga ḏi'i 'aḏi puji re silamo'o Ma Jou'ongu Madutu, sababu ngini ninga 'akala re sinyingara ma la-la ni sibalangu ninga bu-bula'a ra ananga re ngowa'a lelegu mo-moini.

Efesus 3:6

Rahasia gena-ge so'o ne: Na'o ngowa'a Yahudi ua 'aḏi ngaku Habari Roanga, ananga gena-ge ḏi'i mamete'e reo ngowa'a Yahudi, ḏuanga i'a ya basono Ma Jou'ongu Madutu 'ai barakati ga'a 'ua re 'au wali moju 'O sidodahe ḏua di'a 'Ai 'umata. Re ngowa'a Yahudi ua gena-ge ḏi'i raḏi marimoi reo ngowa'a Yahudi re ananga mo-moini 'aḏi osama nyo-nyoimi ra Kristus Yesus 'ai lese. Sidogo ḏi'i, ngowa'a Yahudi ua gena-ge 'aḏi dawongo 'oru ḇato ga'a Ma Jou'ongu Madutu ro sijaji pasala ḏua di'a 'Ai 'umata sababu raḏi marimoi ra Kristus Yesus.

Efesus 4:1

Sababu gena-ge, ngoi — ga'a to osama bui sababu 'ari munara di'a Ma Jou'ongu Madutu — to golo'o mode-mode'e ra ngini mangale ninga 'ahu balasu 'i patasa sa'olo ngowa'a ga'a Ma Jou'ongu Madutu ro 'aro'o di'a dadi 'Ai ngowa-ngowa'a masiretene.

Efesus 4:4

Ngene mo-moini ga'a ngowa'a ngaku Yesus ma tero sa'olo lese rimoi re pa'i Ma Ngagara 'Ofi-'Ofi rimoi ḇato 'i tegoro tananga 'akala re sinyingara. So'o gena ḏi'i, ngene renanga ngo-nganono pa'i rimoi ḏi'i, sababu Ma Jou'ongu Madutu ro 'aro'o ngene wo dadi 'Ai 'umata.

Filipi 3:14

Sababu gena-ge, ngoi to lalara turusu ta meta-meta i'a 'ari maksudu, la ta sanga ngogele. Gena-ge ma ngale: 'Ahu toma soroga, di'a gena-ge Ma Jou'ongu Madutu ri 'aro'o ngoi di'a to marimoi ra Kristus Yesus.

Kolose 1:12

re ni sibere ie murasa ma la ra Ma Jou'ongu Madutu ḏi'i. Sababu Unanga gena-ge ga'a 'o sidadi ngini ni patasa di'a ni dawongo 'oru ga'a Unanga 'a sidodahe pasala ḏua di'a 'Ai 'umata Tai pareta ma dara ga'a 'i tarangi.

Kolose 1:22

Kalaha so'o gena-ge, Ma Jou'ongu Madutu 'a sirimoi moju ngene ra Unanga sababu Unanga 'ai Ngowa'a Nau'u 'O sengene sa'olo manusia. 'Ai se-sengene gena-ge 'i sidadi ngini ninga 'ahu 'i 'ofi-'ofi, kama faja ua, re kaninga sala ua ra Ma Jou'ongu Madutu 'ai momina.

Kolose 3:12

Ma Jou'ongu Madutu ro cumutu ngini sa'olo 'Ai 'umata ga'a ngowa'a 'ofi-'ofi re Unanga ro dadalara ngini. Sababu gena-ge, ngini ni 'ahu so'o ne: Ni riono matengo re matengo, ni pake 'akala rousu, ni maholo ninga diri, ni pake 'akala re sinyingara mereoso re 'akala ḇanyo.

1 Tesalonika 2:12

Ngomi mi golo'o mode-mode'e re babata tau-taunu ngini di'a ni 'ahu mete'e Ma Jou Yesus 'ai do-doto'o, la ni sisanangi Ma Jou'ongu Madutu 'ai 'akala re sinyingara; sababu Unanga nu 'aro'o ngini ni dadi 'Ai ngowa-ngowa'a masiretene, ga'a Unanga ḏuanga i'a nu parenta rema kabasarana.

1 Tesalonika 5:27

Ra Ma Jou 'ai kuasa, ngoi to soma'a ngini mangale surata nena-ne ma betongo na singadolo re na si'isene taninga ioronongoḏu ngo-ngaku rimoi mo-moini.

2 Tesalonika 1:11

Sababu gena-ge, ngomi mi golo'o tau-taunu tananga Jou'ongu Madutu, la Unanga 'o sidadi ngini ni patasa ni dadi ngowa'a 'ofi-'ofi, ga'a Unanga ro 'aro'o. Na'o nyengara gari'a Ma Jou'ongu Madutu rai kuasa nu riono ngini, la ngini ni nyanyaḏi ni 'a'a 'ori i'a ma la-la re ḏi'i ngini ni siḏuanga ninga munara mo-moini, ga'a ngini na 'a'a sababu ninga ngo-ngaku ra Yesus Kristus.

2 Tesalonika 2:14

Sababu di'a gena-ge, Ma Jou'ongu Madutu 'o 'aro'o ngini, la ḏuanga i'a ngini ni sanga mulia mamete'e ra Yesus Kristus nanga Jou. Gena-ge 'i dadi sababu ngomi singadolo Habari Roanga ra ngini.

1 Timotius 6:12

Makutale mode-mode'e di'a 'ani 'ahu 'i mete'e Ma Jou Yesus tau-taunu, la ngana marerebe nomoro: 'ahu kasingado-ngadolo i'a. Sababu di'a gena-ge Ma Jou'ongu Madutu 'o 'aro'o ngana wakutu ngana no mangaku ḏua mangale 'ani ngo-ngaku ra Kristus toma ngowa'a repe manga biono.

2 Timotius 1:9

Ma Jou'ongu Madutu na sisalamata ngene re 'O 'aro'o ngene, la wo dadi Unanga 'ai ngowa-ngowa'a masiretene ga'a Unanga 'o cumutu ḏua. I'a sa'olo Ma Jou'ongu Madutu 'a si'a'a so'o gena? Sababu ngene wo madaga'a 'ori i'a ma la-la; so'o gena-ge ua! Mada'a, sababu mete'e Unanga 'ai mau re Unanga 'ai mura re dadalara ḇato. Wakutu Unanga 'o sidadi nyangu dungia, Unanga ro sitantukanga ḏua 'O pula'a 'Ai mura re dadalara gena-ge ra ngene sababu Kristus Yesus.

2 Timotius 2:7

Na totoho la-la ino, 'oru ga'a ngoi tini siajele ḏua, re Ma Jou'ongu Madutu 'a siḇitanga re 'a sitarangi 'ani 'akala re sinyingara mangale 'ari do-doto'o 'oru ḇato.

'Ibrani 10:19

Sababu gena-ge ioronongoḏu ngo-ngaku rimoi, nange-ne ngene wo mojongo riwara di'a wo sapolo ra Ma Jou'ongu Madutu sababu Yesus 'ai ngaunu. Gena-ge ma tero sa'olo Yahudi manga 'imam 'agung 'o osama gasa haiwani ma ngaunu toma Kamara Lai 'Ofi-'Ofi ma dara.

'Ibrani 10:21

Re 'orasa nange-ne, Unanga nanga 'Imam 'Agung rai kuasa ra ngene ga'a Ma Jou'ongu Madutu 'ai ngitu re ngale.

'Ibrani 10:23

Ino ngene wo macako'o namo-namoto tananga ngo-nganono ga'a ngene wo kanau toma mandan. Sababu tantu ḏua Ma Jou'ongu Madutu ḏuanga i'a 'a sitotomo 'ai jaji ra ngene.

'Ibrani 13:22

Ioronongoḏu ngo-ngaku rimoi, ngoi to golo'o mode-mode'e ra ngini mangale ni totoho la-la ino 'ari duga re domolo, sababu 'ari surata nena-ne 'i kiḏanga ua.

'Ibrani 2:11

Yesus ga'a 'o sigofi manusia tamanga ḏosa-ḏosa re ananga ga'a sanga sigofi ḏua, ananga gena-ge Ḇaḇa moi. Sababu gena-ge Yesus 'o mara'a ua 'o kanau mangale ananga gena-ge 'Ai ioronongoḏu.

'Ibrani 2:17

Sababu gena-ge, Yesus balasu 'o dadi manusia matengo ma tero sa'olo ngene, 'Ai ioronongoḏu, kama ma'u rapu ua. Ma duhu gena-ge, Unanga nyengara 'o dadi 'Imam 'Agung ga'a 'o sijumu 'Ai 'akala re sinyingara ma la-la re 'O cufala munara di'a siḏagi Ma Jou'ongu Madutu 'ai munara, la 'O singi-ngiranga ngene tananga ḏosa.

'Ibrani 3:12

Ioronongoḏu ngo-ngaku rimoi ni ma'istiari ino: Awa-awa 'age rema ngowa'a matengo i'a taninga sigolona 'ai 'akala re sinyingara 'i cira re 'ai ngo-ngaku 'i iranga singadolo unanga 'o maḏibo ḏuḏunu re 'o maki-kiḏanga ra Ma Jou'ongu Madutu, ga'a 'O 'ahu-'ahu.

'Ibrani 3:14

Sababu ngene mo-moini wo dadi ḏagilomu munara marimoi ra Kristus, na'o ngene wa cako'o namo-namoto nanga ngo-ngaku ra Unanga gena-ge, toma mulaingi i'a moju singadolo ma ḏo-ḏogumu.

'Ibrani 6:20

Yesus ro osama siḏa toma ngi'i gena-ge, la ngene nyengara wo osama ḏi'i. Unanga gena-ge 'o dadi 'Imam 'Agung singado-ngadolo i'a, ma tero sa'olo 'imam Melkisedek.

'Ibrani 7:26

Dadi ngene wo paralu Yesus gena-ge sa'olo nanga 'Imam 'Agung. Unanga ngowa'a 'ofi-'ofi, kai sala re ḏosa ua. Ma Jou'ongu Madutu 'o siwola i'a Unanga toma ngowa-ngowa'a baraḏosa, re Unanga ro pere singadolo ma ngi'i ga'a lebe kau'u reo diwanga ma gau'u.

'Ibrani 7:28

Ngowa'a ga'a 'aḏi dadi 'imam 'agung mete'e Musa 'ai hukumu, ananga gena-ge ngowa'a lamahana ga'a 'aḏi matogumu yoḏu'u 'a'a ḏosa. Mada'a wakutu Musa 'ai hukumu togumu i'a, Ma Jou'ongu Madutu si'a'a jaji ma su-sungi reo sasi mangale ḏuanga i'a Unanga 'o tede 'Ai Ngowa'a Nau'u dadi 'Imam 'Agung. Yesus gena-ge 'Imam 'Agung ti-tiai kasingado-ngadolo i'a ga'a si'a'a ngowa'a dadi 'ofi-'ofi ra Ma Jou'ongu Madutu 'ai momina.

'Ibrani 9:11

Mada'a wakutu Kristus 'o waiti sa'olo 'Imam 'Agung, Unanga 'o gasa barakati ga'a ngene nyengara wo dawongo nange-ne. Unanga 'o osama ua toma suyu'u ma dara ga'a manusia raḏi 'a'a toma dungia nena-ne. Unanga 'o osama toma ngi'i ga'a ma tero sa'olo suyu'u, mada'a suyu'u gena-ge toma soroga. Sababu gena-ge suyu'u gena-ge 'i ti-tiai re lebe rousu reo suyu'u toma dungia.

'Ibrani 9:15

Ma sababu gena-ge Kristus 'o dadi lese to golona di'a Ma Jou'ongu Madutu 'ai jaji ma su-sungi, la ngowa'a ga'a Ma Jou'ongu Madutu ro 'aro'o, ananga gena-ge nyengara 'aḏi dawongo barakati-barakati kasingado-ngadolo i'a ga'a Unanga 'o sijaji pasala ḏua di'a 'Ai 'umata. Mo-moini gena-ge ri dadi sababu Kristus 'ai se-sengene ri dadi du-duusu di'a sibebasa ngowa'a tamanga ḏosa sababu ananga 'aḏi mete'e 'atoranga ti-tiai ua ra Ma Jou'ongu Madutu 'ai jaji ma siḏa.

1 Petrus 2:9

Mada'a ngini ngowa-ngowa'a ga'a Ma Jou'ongu Madutu renu siwola i'a, re ngini ni dadi ma tero sa'olo 'Ai 'imam-'imam di'a munara ra Unanga sa'olo ninga 'Olana. Re ḏi'i, ngini ni dadi bangsa 'ofi-'ofi, re Unanga masiretene 'ai 'umata. Unanga 'o 'a'a so'o gena-ge, la ngini ni sihabari mangale 'Ai ga'a lai rousu. Unanga gena-ge ga'a 'O 'aro'o sisupu ngini toma hafu-hafu re 'O singosama ngini Tai tarangi ma dara ga'a ma pari cua.

1 Petrus 3:5

De'oso re ḏegoro so'o gena-ge we-were'a ma siḏa moju ya si'a'a ḏua. We-were'a gena-ge manga 'ahu 'ofi-'ofi re raḏi ngaku mangale Ma Jou'ongu Madutu ḏuanga i'a 'o 'a'a 'oru, ga'a Ro sijaji ḏua. Ananga ḏi'i 'aḏi ta'aloko tamanga nau'u re sababu gena-ge ya sirousu manga diri.

1 Petrus 5:1

Ngoi to ajele ma ngale ra ngini, jama'ata ma bi-biri'i sababu ngoi ḏi'i jama'ata ma bi-biri'i ma tero sa'olo ngini, re ḏi'i ngoi to oḏi'i masiretene 'a Kristus 'ai sangisara. Ḏuanga i'a, wakutu ma 'orasa enanga 'i ngadolo Ma Jou'ongu Madutu 'o sijumu Kristus 'ai mulia ra ngene mo-moini, ngoi ḏi'i ta dawongo Unanga 'ai mulia ma balangu.

1 Petrus 5:10

Ti'ara ua, ngini ni basono ma sangisara. Togumu i'a Ma Jou'ongu Madutu 'o sitiai ngini moju: Unanga gena-ge masiretene 'O site'e ninga ngo-ngaku, la ninga ngo-ngaku kama elala ua, mada'a ni nga'unu tahana toma 'oru ḇato. Unanga 'o 'a'a so'o gena-ge, sababu Unanga romanga mura re dadalara re Ro 'aro'o ngini di'a ni sanga balangu Tai kabasarana kama ḏo-ḏogumu ua, sababu ni marimoi ra Kristus.

1 Yohanes 1:3

Dadi 'oru ga'a ngomi ma oḏi'i re 'isene ḏua, nange-ne ngomi ma singadolo ra ngini, la ngini ni 'ahu marimoi ra ngomi. Sidogo ḏi'i, ngene wo 'ahu marimoi ḏua ra Ma Jou'ongu Madutu nanga Ḇaḇa re 'Ai Ngowa'a Nau'u, Yesus Kristus.

Yudas 1:1

Ioronongoḏu ngo-ngaku rimoi ngini ga'a sanga 'aro'o ḏua di'a ni dadi Ma Jou'ongu Madutu 'ai ngowa-ngowa'a. Ngini ga'a Ma Jou'ongu Madutu nu dadalara re nu kadiarata singadolo Yesus Kristus dadunu 'o sapolo moju. Ngoi, 'a Yudas ga'a ta Yesus Kristus ma tero sa'olo 'Ai budaka, re gia nongoḏu ra Yakobus,

Tingoýi 17:14

Ananga ḏuanga i'a 'aḏi maparangi lawana Doba ma Ngowa. Mada'a Doba ma Ngowa 'i sita'aloko 'olana-'olana gena-ge sababu Doba ma Ngowa gena-ge Ma Jou toma tuanga mo-moini, re dadi 'Olana toma 'olana mo-moini. Re ḏi'i ngowa'a ga'a 'aḏi macako'o namo-namoto ra Yesus ga'a Ma Jou'ongu Madutu ya'u 'aro'o re ya'u cumutu ḏua, ananga gena-ge 'aḏi sanga 'utungu sababu 'aḏi mamete'e rema Doba ma Ngowa.”

Tingoýi 18:20

Hai, mo-moini ni tegoro toma soroga, ni monere sababu limau gena-ge ri pinya'olo ḏua. Hai, Ma Jou'ongu Madutu 'ai 'umata, Yesus 'ai so-soma'a re nabi-nabi, ngini gena-ge ni maroanga mo-moini, sababu Ma Jou'ongu Madutu 'o sihukumu ḏua ngowa-ngowa'a 'aḏi tegoro toma limau Babel. Unanga ra balasa ananga gena-ge manga de'oso re ḏegoro ga'a si'a'a ḏua ra ngini!