'Ibrani 13:15 - Jaji ma Su-sungi

¹⁵ Sababu gena-ge, ino ngene wo gasa nanga jou-jou ra Yesus sa'olo nanga 'Imam 'Agung di'a Ma Jou'ongu Madutu. Nanga jou-jou so'o ne: Ngene balasu wo puji re silamo'o Unanga tau-taunu re wo kanau mangale Unanga gena-ge Ma Jou'ongu Madutu ga'a ngene wo silamo'o re siḏubuso.

'Ibrani 13:15 Iomraidhean Croise

Matias 11:25

Toma 'orasa gena-ge Yesus 'o kanau, “Baba, Ma Jou'ongu Madutu 'o kuasa toma diwanga re dungia, Ngoi to puji re silamo'o 'Ani lomanga sababu mo-moini gena-ge Baba na gogono toma ngowa'a pahe re ngowa'a 'akala soro'unu, mada'a Baba na sijumu toma ngowa-ngowa'a ga'a manga de'oso re ḏegoro ma tero sa'olo ngowa 'olo.

Lukas 10:21

Toma 'orasa gena-ge ḏi'i, Yesus 'o maroanga sababu Ma Ngagara 'Ofi-'Ofi 'U ḏegoro re 'O kanau, “Baba, Ma Jou'ongu Madutu 'o kuasa toma diwanga re dungia, Ngoi to puji re silamo'o 'Ani lomanga sababu mo-moini gena-ge Baba na gogono toma ngowa'a pahe re ngowa'a 'akala soro'unu, mada'a Baba na sijumu toma ngowa-ngowa'a ga'a manga de'oso re ḏegoro ma tero sa'olo ngowa 'olo. Ya, Baba sababu enanga gena-ge 'i sisanangi 'Ani 'akala re sinyingara.

Yohanes 10:9

Ngoi nena-ne karunga ma ngalana. 'A guna ḇato 'o osama sababu 'o ngaku Ngoi, unanga ḏuanga i'a 'o sanga salamata. Unanga gena-ge ma tero sa'olo doba ga'a supu re osama re 'i sanga ngo-ngoromo.

Yohanes 14:6

Yesus 'o sangoro, “Ngoi nena-ne ngo'omo di'a ni sapolo ra Tari Ḇaḇa. Ngoi nena-ne to sijumu 'oru ga'a 'i banari mangale 'Ari Ḇaḇa. Re ḏi'i Ngoi nena-ne to pula'a 'ahu kasingado-ngadolo i'a. Pa'i Ngoi nena-ne ḇato to dadi ngo'omo ga'a sigasa ngowa'a Tari Ḇaḇa.

Roma 12:1

Ioronongoḏu ngo-ngaku rimoi, Ma Jou'ongu Madutu 'o sijumu 'Ai 'akala re sinyingara ma la-la ra ngene. Sababu gena-ge, ngoi to golo'o mode-mode'e ra ngini mangale ngini ni pula'a ninga 'ahu ma tero sa'olo jou-jou ga'a 'ahu moju; pa'i 'ahu di'a Unanga ḇato re di'a sisanangi Unanga 'ai 'akala re sinyingara. Gena-ge ngo'omo rimoi di'a patasa silamo'o re siḏubuso Unanga.

Roma 6:19

Ngoi reto pula'a nana'o gena-ge mangale ngowa'a budaka sababu ngini nga'unu na sahe nyangu do-doto'o banari gena-ge. Ma siḏa, ngini sidoa'a ninga lese ma bageanga sa'olo budaka toma ḏosa: Ngini ni mete'e ninga nyafusu ma faja re ma jira, singadolo ninga tabeata 'i dadi cira madutu. So'o gena ḏi'i nange-ne ngini balasu sidoa'a ḏi'i ninga lese ma bageanga sa'olo budaka ra Ma Jou'ongu Madutu, la ngini ni 'a'a ga'a loasa re banari singadolo ninga tabeata 'i dadi 'ofi-'ofi.

Efesus 2:18

Dadi sababu Kristus, nange-ne ngene mo-moini: bae ngowa'a Yahudi, bae Yahudi ua, nyengara wo sapolo tananga Ḇaḇa. Gena-ge ri dadi sababu kuasa toma Ma Ngagara 'Ofi-'Ofi, pa'i rimoi ḇato, ga'a 'i riono ngene mo-moini.

Kolose 1:12

re ni sibere ie murasa ma la ra Ma Jou'ongu Madutu ḏi'i. Sababu Unanga gena-ge ga'a 'o sidadi ngini ni patasa di'a ni dawongo 'oru ga'a Unanga 'a sidodahe pasala ḏua di'a 'Ai 'umata Tai pareta ma dara ga'a 'i tarangi.

'Ibrani 12:28

Sababu gena-ge, ino ngene wo sibere ie nanga murasa ma la ra Ma Jou'ongu Madutu sababu ngene rewo osama nyo-nyoimi ra Unanga 'ai Pareta toma soroga ga'a 'i elala yoḏu'u. Dadi ino ngene wo silamo'o re siḏubuso Ma Jou'ongu Madutu renanga duhu ga'a sisanangi Unanga: Ngene balasu wo silamo'o re ḏi'i wo mojongo Unanga,

'Ibrani 7:25

Sababu gena-ge, Yesus nyengara 'o sisalamata kasingado-ngadolo i'a ngowa'a mo-moini ga'a 'aḏi sapolo ra Ma Jou'ongu Madutu. Gena-ge 'i dadi sababu ananga gena-ge 'aḏi ngaku Yesus sa'olo manga 'imam, re sababu ḏi'i Unanga 'o 'ahu kasingado-ngadolo i'a 'o manyiata ra Ma Jou'ongu Madutu di'a ananga.

1 Petrus 2:5

Ngini ḏi'i ma tero sa'olo maḏi ga'a 'i 'ahu, ga'a Ma Jou'ongu Madutu 'a pake di'a 'a simomi'i 'ai jama'ata. Re Ma Jou'ongu Madutu masiretene 'o cumutu ngini ni dadi 'Ai 'imam-'imam di'a ni pula'a jou-jou ra Unanga. Re ngini ni pula'a ninga 'akala re sinyingara mete'e Ma Ngagara 'Ofi-'Ofi ma mau sa'olo ninga jou-jou ra Unanga. Ma Jou'ongu Madutu nyengara 'a dawongo jou-jou gena-ge, sababu 'oru ga'a Yesus Kristus 'a si'a'a pasala ḏua di'a ngini.

1 Petrus 4:11

Na'o matengo i'a 'o singadolo Habari ra Ma Jou'ongu Madutu ino, unanga balasu 'o kanau sa'olo ngowa'a ga'a Unanga 'o 'utusu di'a singadolo pa'i Habari gena-ge ḇato. Na'o matengo i'a 'o riono ngowa'a, 'o riono rai de-de'e ga'a Ma Jou'ongu Madutu ro pula'a ra unanga. Ngini ni 'a'a so'o gena-ge, la ngowa-ngowa'a ga'a oḏi'i ninga ga'a lai rousu, ḏuanga i'a 'aḏi puji re silamo'o Ma Jou'ongu Madutu sababu Yesus Kristus 'ai munara taninga 'akala re sinyingara ma dara. Ma Jou'ongu Madutu Unanga masiretene ga'a 'O parenta re 'O dawongo puji re silamo'o kasingado-ngadolo i'a. 'Amin.