'Ibrani 10:19 - Jaji ma Su-sungi

¹⁹ Sababu gena-ge ioronongoḏu ngo-ngaku rimoi, nange-ne ngene wo mojongo riwara di'a wo sapolo ra Ma Jou'ongu Madutu sababu Yesus 'ai ngaunu. Gena-ge ma tero sa'olo Yahudi manga 'imam 'agung 'o osama gasa haiwani ma ngaunu toma Kamara Lai 'Ofi-'Ofi ma dara.

'Ibrani 10:19 Iomraidhean Croise

Roma 5:2

Re ḏi'i, sababu ngene rewo ngaku Yesus Kristus, ngene wo basono Ma Jou'ongu Madutu 'ai mura re dadalara tananga 'ahu tau-taunu sababu 'oru ga'a Yesus Kristus ro 'a'a di'a ngene. Re ngene wo maroanga, sababu ngene renanga ngo-nganono 'i te'e mangale ḏuanga i'a ngene wo sanga balangu ra Ma Jou'ongu Madutu 'ai mulia.

Roma 8:15

Sababu Ma Ngagara 'Ofi-'Ofi ga'a Ma Jou'ongu Madutu 'a pula'a ra ngini, si'a'a ua ngini ni dadi ngowa'a budaka, singadolo ngini ni 'ahu mojongo ma hukumu ra Ma Jou'ongu Madutu. Siḏibo ḏi'i, Ma Ngagara 'Ofi-'Ofi 'i si'a'a ngini dadi Unanga 'ai ngowa-ngowa'a nau'u. Re sababu Ma Ngagara 'Ofi-'Ofi ma kuasa, ngene nga'unu wo 'aro'o Ma Jou'ongu Madutu, “Baba, ngene nanga Ḇaḇa.”

Efesus 2:18

Dadi sababu Kristus, nange-ne ngene mo-moini: bae ngowa'a Yahudi, bae Yahudi ua, nyengara wo sapolo tananga Ḇaḇa. Gena-ge ri dadi sababu kuasa toma Ma Ngagara 'Ofi-'Ofi, pa'i rimoi ḇato, ga'a 'i riono ngene mo-moini.

Efesus 3:12

Ngene ga'a rewo ngaku Kristus re marimoi ra Unanga ḏua, ngene sanga bebasa di'a wo masebanga ra Ma Jou'ongu Madutu, kananga mojongo ua.

2 Timotius 1:7

Mojongo awa na pake cocatu gena-ge. I'a sa'olo Ma Jou'ongu Madutu 'o pula'a Ma Ngagara 'Ofi-'Ofi ra ngene?! Dadi ngene wo mojongo?! So'o gena-ge ua! Unanga 'o pula'a Ma Ngagara 'Ofi-'Ofi gena-ge, la ngene wo dadi te'e tananga munara di'a Ma Jou'ongu Madutu re nanga 'akala re sinyingara 'i romanga reo dadalara re nga'unu wo manahana nanga nyafusu ma jira.

'Ibrani 10:18

Dadi manga ḏosa-ḏosa re manga kajahatana Ma Jou'ongu Madutu 'a singi-ngiranga. Sababu gena-ge paralu riwara pula'a jou-jou di'a singi-ngiranga ḏosa!

'Ibrani 10:35

Sababu gena-ge, awa ninga 'akala re sinyingara 'i rapo'o. Sababu na'o ngini ni macako'o namo-namoto taninga ngo-ngaku tau-taunu ma tero sa'olo ma mulaingi, ḏuanga i'a ngini ni dawongo ngogele ga'a 'i lamo'o masala.

'Ibrani 12:28

Sababu gena-ge, ino ngene wo sibere ie nanga murasa ma la ra Ma Jou'ongu Madutu sababu ngene rewo osama nyo-nyoimi ra Unanga 'ai Pareta toma soroga ga'a 'i elala yoḏu'u. Dadi ino ngene wo silamo'o re siḏubuso Ma Jou'ongu Madutu renanga duhu ga'a sisanangi Unanga: Ngene balasu wo silamo'o re ḏi'i wo mojongo Unanga,

'Ibrani 3:1

Sababu gena-ge, ioronongoḏu ngo-ngaku rimoi ngene mo-moini ga'a Ma Jou'ongu Madutu ro cumutu re siwola i'a ḏua di'a wo osama toma soroga, ino ngene wa fikiri ngido-ngido mangale Yesus gena-ge. Unanga Ma Jou'ongu Madutu 'ai so-soma'a re nanga 'Imam 'Agung ga'a ngene rewo ngaku.

'Ibrani 3:6

Mada'a Yesus sa'olo Ma Jou'ongu Madutu 'ai Ngowa'a Nau'u 'o cufala parenta ra Ma Jou'ongu Madutu 'ai Wala — gena-ge ma ngale: Ma Jou'ongu Madutu 'ai ngitu re ngale. Re ngene nena-ne wo osama nyo-nyoimi ra Unanga 'ai ngitu re ngale. Mada'a pa'i na'o ngene wo macako'o namo-namoto tananga ngo-ngaku re wo masinganono tau-taunu mangale 'oru ga'a ḏuanga i'a Ma Jou'ongu Madutu 'o pula'a ra ngene.

'Ibrani 4:16

Sababu gena-ge, ino ngene renanga mojongo awa wo talaḏi Ma Jou'ongu Madutu ga'a 'O parenta re sijumu 'Ai mura re dadalara ra ngene. Unanga gena-ge 'a sijumu 'Ai 'akala re sinyingara ma la-la re pula'a 'Ai mura re dadalara ra ngene, la ngene wo sanga ri-riono pasi-pasi enanga ma 'orasa.

'Ibrani 7:25

Sababu gena-ge, Yesus nyengara 'o sisalamata kasingado-ngadolo i'a ngowa'a mo-moini ga'a 'aḏi sapolo ra Ma Jou'ongu Madutu. Gena-ge 'i dadi sababu ananga gena-ge 'aḏi ngaku Yesus sa'olo manga 'imam, re sababu ḏi'i Unanga 'o 'ahu kasingado-ngadolo i'a 'o manyiata ra Ma Jou'ongu Madutu di'a ananga.

'Ibrani 9:12

Wakutu Kristus 'o osama toma Kamara Lai 'Ofi-'Ofi toma soroga Unanga 'o mete'e ua Yahudi manga 'imam 'agung manga 'atoranga. Pa'i ananga nga'unu osama Kamara Lai 'Ofi-'Ofi ḇato sababu 'aḏi gasa 'abingi ma ngaunu bolo sapi ra-ramasa ie ma ngaunu sa'olo manga jou-jou. Mada'a Kristus nga'unu 'o osama toma Kamara Lai 'Ofi-'Ofi 'O talaḏi ra Ma Jou'ongu Madutu sababu pa'i Unanga 'ai ngaunu masiretene ḇato. Unanga 'o osama pa'i soi moi ḇato sababu 'Ai ngaunu ri situusu ngene kasingado-ngadolo i'a.

'Ibrani 9:3

Toma kamara gena-ge ma dara, enanga ma ḏe-ḏegoro ngalana ma da-daku. Toma ngalana ma da-daku ma ḏuḏunu gena-ge rema kamara lelegu ga'a 'i si'aro'o Kamara Lai 'Ofi-'Ofi.

1 Yohanes 4:17

'Ahu ma duhu so'o gena-ge, dadalara 'i ti-tiai ra ngene nanga 'ahu. Dadi ngene nyengara wo talaḏi Ma Jou'ongu Madutu kananga mojongo ua, wakutu ma wangere 'i ngadolo Ma Jou'ongu Madutu 'o sijuruhakimi ngowa'a. Sababu nanga de'oso re ḏegoro toma dungia nena-ne 'i ma tero sa'olo Kristus 'ai de'oso re ḏegoro.