'Ibrani 1:3 - Jaji ma Su-sungi

³ 'Ai Ngowa'a Nau'u gena-ge 'A sijumu Ma Jou'ongu Madutu 'ai kuasa re 'Ai kabasarana. Unanga gena-ge 'ai duhu re ngari mo-moini ma tero Ma Jou'ongu Madutu. Unanga 'a pake 'ai demo ma kuasa di'a 'O jaga re 'O parenta mo-moini. Unanga 'o sigofi ngowa'a manga ḏosa togumu i'a, kara 'O tegoro ra Ma Jou'ongu Madutu 'ai giama ma kuwiḏa i'a da'u toma soroga.

'Ibrani 1:3 Iomraidhean Croise

Matias 22:24

Ananga 'aḏi sano ra Unanga, “Guru, 'a Musa 'o doto'o so'o ne: Na'o nau'u matengo 'o sengene kai ngowa'a ua, 'ai ioro bolo 'ai nongoḏu balasu 'a molo'ara 'ai balo gena-ge, la ngowa'a sengene nange-ge 'ai ju'uda 'i iranga awa.

Markus 16:19

Wakutu Yesus 'o kanau ra ananga togumu i'a, Ma Jou'ongu Madutu 'U sibere da'u toma soroga. Da'a, Unanga 'o parenta ma'u mete'e re Ma Jou'ongu Madutu.

Yohanes 1:14

'Idini gena-ge ri dadi manusia, re Unanga 'o tegoro tananga sigolona re wa oḏi'i ḏua 'Ai kabasarana. Kabasarana gena-ge ma 'asala ra Ma Jou'ongu Madutu sababu Unanga 'Ai Ngowa'a Nau'u pa'i matengo. Sababu Unanga, ngene wa basono tala Ma Jou'ongu Madutu 'ai mura re dadalara masala ra ngene, re Unanga 'o sijumu ma ba-banari mangale Ma Jou'ongu Madutu ra ngene.

Yohanes 1:29

Ma ḇiḇini ino Yohanes 'o oḏi'i 'a Yesus 'o sapolo ra unanga. Ḏua Yohanes 'o kanau, “Oḏi'i Unanga nena-ne Ma Jou'ongu Madutu 'ai Doba ma Ngowa, ga'a 'O singi-ngiranga manusia manga ḏosa!

Yohanes 1:4

Unanga gena-ge 'ahu ma cimi, re Unanga Ma Jou'ongu Madutu 'ai tarangi toma manusia.

Yesus 'ai so-soma'a 2:33

Ma Jou'ongu Madutu 'o sitede siḏegoro Yesus toma gau'u Tari giama ma kuwiḏa re Unanga dawongo Ma Ngagara 'Ofi-'Ofi ga'a Ma Jou'ongu Madutu 'o sijaji pasala ḏua. 'Orasa nena-ne, mo-moini ga'a ngini na 'isene re na oḏi'i ḏua, sababu Yesus siguci Ma Ngagara 'Ofi-'Ofi gena-ge ra ngomi.

Yesus 'ai so-soma'a 7:56

Stefanus 'o kanau, “Oḏi'i! Ngoi to oḏi'i soroga ma ngalana 'i welanga re Manusia ma Ngowa'a Nau'u 'o made-de'oso ra Ma Jou'ongu Madutu 'ai giama ma kuwiḏa i'a.”

Roma 1:16

Sababu ngoi to ngaku ti-tiai toma Habari Roanga ga'a kuasa ra Ma Jou'ongu Madutu tala di'a sisalamata ngowa'a ga'a raḏi ngaku mo-moini: Siḏa-siḏa ngowa'a Yahudi, kara nange-ne ngowa'a Yahudi ua ḏi'i.

Roma 8:34

'A guna nga'unu 'o singe-ngeta'a hukumu ra ngene?! Tantu ḏua matengo i'a mai ua! Sababu Yesus Kristus masiretene ro sengene di'a tuusu ngene tananga ḏosa. Sidogo ḏi'i, Unanga dadunu 'o 'ahu moju toma ngowa'a senge-sengene manga sigolona re Ro tegoro ra Ma Jou'ongu Madutu 'ai giama ma kuwiḏa i'a. Re Unanga gena-ge masiretene nanga lese to golona.

2 Korintus 4:4

'Iblisi ga'a 'i kuasa dungia ya kuci ngowa'a manga fikirana singadolo ananga 'aḏi ngaku awa, re 'aḏi oḏi'i yoḏu'u Habari Roanga ma cahaya ga'a 'i waiti ra Kristus 'ai mulia. Unanga gena-ge ma tero Ma Jou'ongu Madutu 'ai gabara.

Kolose 3:1

'Au nga'ene, ngini ma tero sa'olo ngowa'a raḏi sengene. Mada'a nange-ne, ngini ma tero sa'olo ngowa'a dadunu 'aḏi 'ahu moju mamete'e ra Kristus. Sababu gena-ge, ngini balasu ni nyafusu mode-mode'e 'ori i'a i'a toma soroga, ga'a Kristus ro tegoro ra Ma Jou'ongu Madutu 'ai giama ma kuwiḏa i'a, re 'O parenta mamete'e ra Ma Jou'ongu Madutu.

Titus 2:14

Yesus Kristus 'a sipula'a 'ai 'ahu 'i dadi jou-jou di'a ngene, la 'O siwoi'i ngene toma kuasa ma jira re 'O si'ofi tananga ḏosa-ḏosa, la sidadi ngene wo dadi Unanga 'ai 'umata ga'a wo cufala madaga'a 'ori i'a ma la-la.

'Ibrani 1:13

Soi moi nyangu Ma Jou'ongu Madutu 'o kanau Tai mala'ekata matengo i'a so'o ne: “Tegoro Tari giama ma kuwiḏa i'a, singadolo Ngoi ta 'a'a 'Ani lawa-lawana 'aḏi ta'aloko ra ngana.”

'Ibrani 10:12

Siḏibo ḏi'i, Kristus 'o pula'a 'ai jou-jou pa'i soi moi ḇato sababu enanga ri singi-ngiranga ḏosa. Togumu i'a, Unanga gena-ge tegoro ra Ma Jou'ongu Madutu 'ai giama ma kuwiḏa i'a.

'Ibrani 12:2

Ino ngene wo tatamo tau-taunu pa'i ra Yesus ḇato. Sababu Unanga nena-ne 'o welanga salamata ma ngo'omo di'a ngene sababu 'Ai ngo-ngaku ra Ma Jou'ongu Madutu. Re ḏi'i sababu Unanga si'a'a nanga salamata 'i ti-tiai sababu nanga ngo-ngaku ra Unanga. Unanga 'o tahana wakutu sanga sangisara toma ngowa'a ga'a 'U salib. Re kalaha Unanga 'o sengene toma salib, gena-ge ga'a 'i sipula'a mara'a ngowa'a, Unanga 'a kalesanga ua sababu Unanga pa'i 'o 'elingi tau-taunu nena-ne: Togumu i'a 'O sanga roanga. Nange-ne Unanga 'o tegoro ra Ma Jou'ongu Madutu 'ai giama ma kuwiḏa, re 'O parenta mamete'e ra Unanga.

'Ibrani 4:14

Ngene nanga 'Imam 'Agung La-lamo'o ga'a ro pere sie toma soroga singadolo osama talaḏi ra Ma Jou'ongu Madutu 'ai biono, Unanga gena-ge Yesus, Ma Jou'ongu Madutu 'ai Ngowa'a Nau'u. Sababu gena-ge, ngene balasu macako'o namo-namoto tananga ngo-ngaku re matogumu awa kanau 'oru ga'a wo ngaku.

'Ibrani 7:27

Unanga 'ai munara 'i mata-rapu reo 'imam-'imam 'agung lelegu ga'a wange moi-wange moi balasu 'aḏi gasa jou-jou sisiḏa di'a manga ḏosa-ḏosa masiretene, kara di'a ngowa'a kawasa manga ḏosa. Mada'a Yesus 'o gasa jou-jou pa'i soi moi ḇato di'a kasingado-ngadolo i'a, wakutu Unanga sipula'a 'Ai diri sa'olo jou-jou di'a nanga ḏosa.

'Ibrani 8:1

Ioronongoḏu ngo-ngaku rimoi, ngene ma kanau ma cimi so'o ne: Nanga 'Imam 'Agung 'o tegoro ra Ma Jou'ongu Madutu 'ai giama ma kuwiḏa i'a, Unanga gena-ge ga'a 'Ai kuasa ma pari cua, re 'Imam 'Agung gena-ge 'o parenta mamete'e ra Unanga toma soroga.

'Ibrani 9:16

Na'o 'age rema surata wasiata, balasu 'age rema bukiti mangale ngowa'a ga'a 'a'a surata gena-ge ro sengene.

'Ibrani 9:26

Na'o Kristus ro mete'e 'imam 'agung gena-ge manga munara, ma musungu ma jelele i'a Unanga 'o basono sangisara, ma mulaingi toma 'orasa dungia 'i dadi singadolo nange-ne! Mada'a nange-ne, 'orasa nena-ne ga'a 'i co-cori toma kiamata ma 'orasa, Unanga 'o sapolo pa'i soi moi ḇato di'a 'a singi-ngiranga ngene nanga ḏosa Rai lese masiretene ga'a 'i dadi jou-jou.

1 Petrus 1:21

Sababu Kristus 'ai ga'a di'a ngini, ngini ni ngaku ra Ma Jou'ongu Madutu ga'a dadunu 'O si'ahu moju Kristus gena-ge toma ngowa'a senge-sengene manga sigolona re 'U simulia Unanga ḏi'i. Sababu gena-ge, ngini ni nganono re ni ngaku ra Ma Jou'ongu Madutu, mangale Unanga ḏuanga i'a 'o sisalamata ngini ḏi'i.

1 Petrus 3:22

Yesus Kristus gena-ge ro pere ḏua toma soroga re 'O tegoro ra Ma Jou'ongu Madutu 'Ai giama ma kuwiḏa i'a. Mala'ekata-mala'ekata 'aḏi ta'aloko ra Unanga re ḏi'i 'ori i'a mo-moini ga'a rema kuasa, mo-moini 'i ta'aloko ra Unanga.

2 Petrus 1:16

Ngomi remi doto'o ra ngini mangale ngene nanga Jou Yesus Kristus, ḏuanga i'a dadunu 'o sapolo rai kabasarana. 'Oru ga'a ngomi remi doto'o, gena-ge ngomi madaga'a masiretene ua, mada'a ngomi minga la'o masiretene ma oḏi'i mangale Ma Jou Yesus Kristus 'ai kabasarana ma pari cua.

2 Petrus 1:17

Toma 'orasa rimoi, ngomi mi mame-mete'e Yesus toma kie re ngomi mi oḏi'i re mi 'isene Ma Jou'ongu Madutu, Unanga 'ai Ḇaḇa 'o silamo'o re 'O simulia Unanga. Ra Ma Jou'ongu Madutu toma soroga ma mulia, ngomi mi 'isene ma betongo so'o ne: “Unanga nena-ne 'Ari Ngowa'a Nau'u ga'a ta dadalara, Ngoi 'ari 'akala re sinyingara ma sanangi Ta sipa'ala ra Unanga!”

1 Yohanes 1:7

Mada'a siḏibo ḏi'i, na'o ngene wo 'ahu toma tarangi ma dara ma tero Ma Jou'ongu Madutu toma tarangi ma dara, ngene wo 'ahu marimoi reo ngowa-ngowa'a ngaku Yesus ma lelegu. Re Ma Jou'ongu Madutu 'ai Ngowa'a Nau'u, Yesus Kristus, 'a si'ofi ngene nanga ḏosa-ḏosa mo-moini Rai ngaunu masiretene.

1 Yohanes 3:5

Ngini na waro Kristus masiretene kai ḏosa ua, re Unanga 'o sapolo toma dungia di'a 'a singi-ngiranga manusia manga ḏosa.

Yudas 1:25

Unanga gena-ge pa'i Ma Jou'ongu Madutu ga'a nanga Salamata ma Cimi sababu ngene rewo marimoi ra Yesus Kristus nanga Jou. Unanga gena-ge 'O mulia 'O kabasarana, 'Ai kuasa ma pari cua ga'a 'O parenta wakutu dungia re diwanga 'i sidadi nyangu singadolo nange-ne re kasingado-ngadolo i'a! 'Amin.

Tingoýi 3:21

'A guna ḇato 'ai ngo-ngaku ra Ngoi kama elala ua singadolo 'o sengene, Ngoi ta'u pula'a ma 'olana 'ai ḏe-ḏegoro Tari 'Olana 'ai ḏe-ḏegoro ma kaci moi i'a. So'o gena-ge ḏi'i, nange-ne Ngoi to tegoro toma 'Olana 'ai ḏe-ḏegoro Tari Ḇaḇa ma 'Olana 'ai ḏe-ḏegoro tai kuwiḏa, sababu Ngoi masiretene ḏi'i 'Ari ngo-ngaku ra Unanga kama elala ua singadolo To sengene.

Tingoýi 4:11

“Ya Ma Jou'ongu Madutu, minga Jou. Pa'i Ma Jou'ongu Madutu ḇato 'o patasa di'a ngowa'a 'U simulia re 'U silamo'o sababu 'Ani kuasa ma pari cua. Sababu Ma Jou'ongu Madutu 'o sidadi dungia re diwanga re ma dara mo-moini, re sababu mete'e 'Ani 'akala ma mau 'ori i'a i'a mo-moini 'i dadi re 'i 'ahu.”