Filipi 4:5 - Jaji ma Su-sungi

⁵ Ngowa'a mo-moini balasu ya oḏi'i ninga 'akala re sinyingara ma mereoso. Ni 'elingi, 'orasa ti'ara riwara Ma Jou dadunu 'o sapolo moju.

Filipi 4:5 Iomraidhean Croise

Matias 6:25

Sababu gena-ge, Ngoi to siajele ra ngini nena-ne: Awa ni dodato mangale ninga 'ahu: bae 'oru ga'a ni oromo bae 'oru ga'a ni ka'e. Re ḏi'i, awa ni madodato mangale ninga lese: 'Oru ga'a ni pake. Sababu tantu ḏua, ninga 'ahu lebe la-lamo'o i'a reo ngo-ngoromo re lese lebe la-lamo'o i'a reo pakeanga!

Matias 6:34

Sababu gena-ge, awa ni dodato mangale wangere da-daini, sababu enanga rema susa re sangisara masiretene. Wangere nange-ne enanga ma susa re sangisara ngadolo nena-ne ḇato, awa na dogo moju sababu ni dodato mangale wangere da-daini!”

Lukas 21:34

Ni ma'istiari! Awa ngini pa'i ni cufala 'a'a laya re ni ma'eto-'etolo, bolo pa'i ni mafikiri ninga 'ahu ḇato, singadolo kage-kage ma 'orasa gena-ge 'i ngadolo re ngini ni siwaro i'a ua.

1 Korintus 16:22

Ngowa'a ga'a 'aḏi dadalara Ma Jou ua, eanga i'a 'aḏi sanga katula. Maranatha — nanga Jou 'o sapolo!

1 Korintus 6:7

Ra Ma Jou'ongu Madutu 'ai momina, ngini mode-mode'e reni iranga taninga hali gena-ge na'o ngini ni tagi kalaki toma juruhakimi ga'a ngaku Yesus ua. Sababu de'oso re ḏegoro gena-ge 'i patasa ua di'a ngowa'a ngaku Yesus! Jobilaha, ngini ni sanga rugi, bolo ni sanga 'adili ua!

1 Korintus 8:13

Sababu gena-ge, na'o ngo-ngoromo 'i si'a'a 'ari ioronongoḏu ngo-ngaku rimoi 'o eta'a toma ḏosa, ngoi to oromo haiwani ma la-la'eme riwara. Awa-awa unanga 'o baraḏosa sababu ngoi.

1 Korintus 9:25

'A guna ḇato na'o 'o mau mete'e tandingi, ngowa'a gena-ge balasu 'o manahana 'ai diri toma 'ori i'a mo-moini. Unanga 'o 'a'a so'o gena-ge sababu, kalaha lastari saya-saya ti'ara ua 'i wa'alo, unanga 'o nyafusu sanga lastari saya-saya siteru tai sae'e. Mada'a ngene wo manahana diri toma 'ori i'a mo-moini, sababu ngene wo nyafusu nanga sae'e 'i siteru lastari saya-saya gena-ge kama wa'alo ua nena-ne re si'a.

2 Korintus 10:1

'Age mamuni'a taninga sigolona ga'a 'aḏi kanau “ngoi to mereoso,” na'o to matalaḏi re to kanau ra ngini. Mada'a na'o ngoi ma'u kiḏanga re to lefo surata ra ngini, “ngoi lato te'e!” Mada'a ngoi Paulus to golo'o mode'e ra ngini to pake 'akala re sinyingara ma la-la re mereoso ma tero sa'olo Kristus 'ai 'akala re sinyingara.

2 Tesalonika 2:2

Kalaha ngini ni 'isene habari, bae nubuata, bae do-doto'o bolo surata 'age rema ngowa'a 'aḏi kanau ra ngomi ino, mangale ma 'orasa enanga 'i ngadolo ḏua di'a Unanga dadunu 'o sapolo, awa ninga 'akala re sinyingara 'i waro gogare riwara, bolo 'i kangela!

Titus 3:2

Kanau i'a ra ananga: jajaha demo awa, re ni ma'u tolabe awa ra guna ḇato. Mada'a siḏibo ḏi'i, tamanga de'oso re ḏegoro ma dara balasu pake 'akala ḇanyo re 'aḏi maholo tala ninga diri mode-mode'e sidodai ra guna ḇato.

'Ibrani 10:25

Ino ngene wo malomu tau-taunu. Awa ngene ma tero sa'olo ngowa'a lelegu ga'a 'aḏi malomu riwara. Siḏibo ḏi'i, ngene balasu lebe cufala ma'u babata matengo re matengo di'a malomu, sababu ngene wo waro mangale ti'ara riwara Ma Jou ḏuanga i'a 'o sapolo moju.

'Ibrani 10:37

Sababu toma Boku 'Ofi-'Ofi ri silefo so'o ne: “Pa'i ngomasa moi ḇato, Unanga ga'a ḏuanga i'a 'o sapolo, Unanga 'o mati-ti'ara ua di'a 'O sapolo. Unanga 'a tuda-tuda ua 'Ai ta-sapolo.”

1 Petrus 1:11

Nabi-nabi gena-ge mau 'aḏi disa waro ngau re ma duhu sa'olo salamata gena-ge 'i dadi. Tamanga 'ahu matengo re matengo, Ma Ngagara 'Ofi-'Ofi ra Kristus 'i siajele ḏua mangale 'O Kristus: Ma duhu sa'olo Unanga ḏuanga i'a 'o basono sangisara re sikisa, mada'a togumu i'a Unanga ḏuanga i'a 'o sanga mulia.

1 Petrus 4:7

'Orasa dungia ma ḏo-ḏogumu sa'i ri ngadolo. Sababu gena-ge, ni siogoro tala ninga 'akala re sinyingara re ni ma'istiari, la ngini nga'unu manyiata ra Unanga reninga 'akala bo-boloto.

Tingoýi 22:20

Unanga, Yesus, ga'a singadolo habari nena-ne 'o kanau, “Mode'e, Ngoi ḏuanga i'a capati to sapolo!” Re, ngoi, Yohanes 'o kanau ḏi'i: “ 'Amin! Sapolo ḇato, Ma Jou Yesus!”

Tingoýi 22:7

Yesus 'o kanau, “Tailako la-la ino! Ti'ara riwara Ngoi ḏuanga i'a to sapolo. Bara'utungu ngowa-ngowa'a ga'a 'aḏi mete'e nubuata ma demo-demo toma boku nena-ne!”