Filipi 4:3 - Jaji ma Su-sungi

³ Ngoi to golo'o toma ḏagilomu munara matengo ga'a cufala munara no riono ananga we-were'a nga muḏiḏi gena-ge. Ananga raḏi munara mode-mode'e mamete'e ra ngoi, la Habari Roanga 'i rera re walata. Ananga gena-ge ma tero sa'olo 'a Klemen, re ngowa-ngowa'a lelegu raḏi munara mamete'e ra ngoi ga'a manga lomanga 'i silefo ḏua toma ngowa'a 'ahu-'ahu manga boku.

Filipi 4:3 Iomraidhean Croise

Lukas 10:20

Kalaha so'o gena, awa pa'i ngini ni maroanga ḇato sababu ni nga'unu dusu'u roh-roh ma jira. Jobilaha ngini ni maroanga sababu ninga lomanga 'i silefo ḏua da'u toma soroga.”

Roma 12:1

Ioronongoḏu ngo-ngaku rimoi, Ma Jou'ongu Madutu 'o sijumu 'Ai 'akala re sinyingara ma la-la ra ngene. Sababu gena-ge, ngoi to golo'o mode-mode'e ra ngini mangale ngini ni pula'a ninga 'ahu ma tero sa'olo jou-jou ga'a 'ahu moju; pa'i 'ahu di'a Unanga ḇato re di'a sisanangi Unanga 'ai 'akala re sinyingara. Gena-ge ngo'omo rimoi di'a patasa silamo'o re siḏubuso Unanga.

Roma 16:12

Siḏingoto 'ari tabea ra ngo Trifena re ngo Trifosa ga'a 'aḏi munara mode-mode'e di'a Ma Jou. Siḏingoto 'ari tabea ra ngo Persis ga'a ngoi timi dadalara, munanga ḏi'i romo munara mode-mode'e ra Ma Jou.

Roma 16:9

Siḏingoto 'ari tabea ra Urbanus, nanga ḏagilomu munara moi di'a Kristus. Siḏingoto 'ari tabea ra Stakhis, ga'a ngoi to dadalara.

Filipi 1:12

Ioronongoḏu ngo-ngaku rimoi, ngoi to mau ngini ni waro mangale 'oru ga'a 'i dadi ḏua ra ngoi, gena-ge si'a'a ngowa'a lebe repe ya 'isene Habari Roanga ga'a ngoi ta singadolo.

Filipi 1:16

Ngowa'a gena-ge 'aḏi singadolo mangale Kristus sababu manga dadalara. Re ḏi'i sababu ananga ya waro mangale Ma Jou'ongu Madutu 'o siwatasa ngoi 'ane toma bui di'a to sibukiti mangale Habari Roanga gena-ge 'i banari.

Filipi 1:27

'Orasa nange-ne, lebe la-lamo'o i'a ngini ninga 'ahu ma duhu balasu 'i patasa di'a ngowa'a ga'a 'aḏi mete'e Habari Roanga mangale Kristus gena-ge. Dadi, bae ngoi to ma'u sanga moju bolo sanga riwara ra ngini, ngoi ḏuanga i'a ta 'isene mangale ngini ni marimoi. Re ḏi'i ngini ni marimoi taninga munara di'a ni sibukiti mangale Habari Roanga gena-ge 'i banari, dadi ngowa-ngowa'a ḏuanga i'a ya ngaku.

Filipi 1:5

Ngoi to sibere ie 'ari murasa ma la ra Ma Jou'ongu Madutu, sababu toma mulaingi i'a moju singadolo nange-ne, ngini reni riono ngoi tau-taunu di'a sirera re siwalata Habari Roanga.

Filipi 1:7

Tero mode'e ngoi to basono maroanga ra ngini mo-moini. Sababu bae ngoi toma bui, bolo talaḏi toma juruhakimi di'a ngoi to sitarangi mangale i'a sa'olo ngoi to singadolo Habari Roanga re to sijumu habari gena-ge 'i banari, ngini mo-moini ni riono ngoi di'a to siḏagi 'ari munara ga'a Ma Jou'ongu Madutu 'o pula'a ra ngoi sababu 'Ai mura re dadalara. Sababu gena-ge, ngini ni tegoro tari 'akala re sinyingara ma dara.

Filipi 4:2

Ngoi to golo'o mode-mode'e ngo Euodia re ngoi to golo'o mode-mode'e ngo Sintike ḏi'i mangale ngini balasu ninga 'akala re sinyingara na sirimoi, sababu ngini reni marimoi ra Ma Jou.

Kolose 1:7

Habari Roanga gena-ge 'a Epafras ra singadolo ra ngini. Epafras 'o dadi Kristus 'ai falalomu ga'a 'o munara cufala madutu di'a 'o riono ngini. Unanga gena-ge ḏi'i ngomi minga ḏagilomu munara, ga'a mu dadalara.

Tingoýi 13:8

Haiwani gena-ge, ngowa'a mo-moini toma dungia sitabi donga ḏuanga i'a ya silamo'o re siḏubuso ḏuga-ḏuga ananga ga'a manga lomanga 'i silefo ḏua toma ngowa'a 'ahu-'ahu manga boku wakutu dungia 'i sidadi nyangu. Boku gena-ge Doba ma Ngowa ma boku, Doba ma Ngowa ga'a ya tola'a ḏua.

Tingoýi 17:8

'Ua re 'au wali, haiwani gena-ge 'i 'ahu, mada'a 'orasa nange-ne 'i sengene ḏua. Ngasamoi moju, enanga 'i supu toma ngabanga maut, kara Kristus 'a siwejere. Ngowa-ngowa'a toma dungia ga'a manga lomanga 'i silefo ua toma ngowa'a 'ahu-'ahu manga boku wakutu dungia 'i sidadi nyangu, ḏuanga i'a 'aḏi heranga na'o ya oḏi'i haiwani gena-ge. Sababu kalaha haiwani gena-ge 'ua re 'au wali 'i 'ahu re 'orasa nange-ne 'i sengene ḏua, enanga dadunu 'i baolo moju.

Tingoýi 20:12

Re ngoi to oḏi'i ngowa'a senge-sengene: ngowa'a ma pake ua re ngowa'a la-lamo'o 'aḏi made-de'oso toma ḏe-ḏegoro gena-ge ma biono. Ḏua boku-boku 'i welanga, kara singe-ngeta'a hukumu toma ngowa'a senge-sengene site-tero mete'e ananga manga ga'a 'i silefo toma boku-boku gena-ge ma dara. Re ḏi'i boku rimoi ma lelegu 'i welanga. Re boku gena-ge 'i si'aro'o ngowa'a 'ahu-'ahu manga boku.

Tingoýi 20:15

Ngowa'a mo-moini ga'a manga lomanga 'i silefo ua toma ngowa'a 'ahu-'ahu manga boku, ananga gena-ge 'aḏi siupa'a toma ngoloto u'u ma dara.

Tingoýi 21:27

Mada'a ngowa'a su-sudala bolo ngowa'a ga'a sihaga ngowa'a, ananga gena-ge 'aḏi osama yoḏu'u. Re ḏi'i, 'oru ḇato ga'a 'ori i'a 'i woso-wosono singosama yoḏu'u. Ananga ga'a nyengara 'aḏi osama, pa'i ngowa'a ga'a manga lomanga 'i silefo ḏua toma ngowa'a 'ahu-'ahu manga boku, gena-ge Doba ma Ngowa 'ai boku.

Tingoýi 3:5

'A guna ḇato 'ai ngo-ngaku ra Ngoi kama elala ua singadolo 'o sengene, ḏuanga i'a 'aḏi mapake juba bu-buḏo. Manga lomanga ta singi-ngiranga yoḏu'u toma ngowa'a 'ahu-'ahu manga boku. Re Rari Ḇaḇa 'ai biono re mala'ekata-mala'ekata manga biono, Ngoi to mangaku to kanau ananga gena-ge Ngoi 'ari ngowa-ngowa'a.