Filipi 4:19 - Jaji ma Su-sungi

¹⁹ Re 'ari Jou'ongu Madutu, Unanga ga'a kai kuranga 'oru ua. Unanga gena-ge ḏuanga i'a 'o pula'a 'oru ḇato ga'a ngini ni paralu sababu ni marimoi ra Kristus Yesus.

Filipi 4:19 Iomraidhean Croise

Matias 6:32

Mo-moini gena-ge ngowa-ngowa'a ga'a nana'o Ma Jou'ongu Madutu ua ananga ya disa. Mada'a ninga Ḇaḇa da'u toma soroga 'a waro ninga paralu mo-moini.

Yohanes 20:17

Yesus 'o kanau ra munanga, “No gu'u awa Ngoi, sababu Ngoi to pere sie nyangu Tari Ḇaḇa. Mada'a no tagi re no siajele Tari me-mete'e mangale Ngoi ngasamoi to maḏibo To pere sie Tari Ḇaḇa re ngini ninga Ḇaḇa, Tari Jou'ongu Madutu re ra Ma Jou'ongu Madutu ga'a ngini ni silamo'o re siḏubuso.”

Yohanes 20:27

Gena ḏua, Unanga 'o kanau ra Tomas, “No singosama 'ani rarag̱a Tari giama ma nyaboto, oḏi'i 'Ari giama. Re na singosama 'ani giama Tari gagoro ma nyaboto. Awa no sitaka-taka, no ngaku sababu nena-ne Ngoi!”

Roma 1:8

Siḏa-siḏa sababu 'oru Yesus Kristus ro 'a'a di'a ngene, ngoi nyengara to sibere ie murasa ma la tari Jou'ongu Madutu sababu ngini mo-moini. Sababu ngowa'a toma dungia sitabi donga, ananga raḏi siajele mangale ngini ninga ngo-ngaku ra Yesus Kristus.

Roma 11:33

Ma Jou'ongu Madutu 'ai mura re dadalara ma pari cua toma ngowa'a mo-moini. Unanga gena-ge 'Ai 'akala ma soro'unu re 'Ai wo-waro ma pari cua ḏi'i. 'A guna ua nga'unu 'a sahe Unanga 'ai maksudu! 'A guna ua nga'unu 'a sahe Unanga 'ai ngo'omo!

Roma 2:4

Awa ni ta'ajiri ngini ni paralu ua ni maḏibo toma ngo'omo boloto, sababu Ma Jou'ongu Madutu 'ai 'akala re sinyingara ma la-la, re sababu Unanga 'ai 'akala ḇanyo lai lamo'o; dadi jau-jau Unanga 'o sihukumu ngini ua. Ngini ni waro ua, Unanga 'ai de'oso re ḏegoro so'o gena-ge ra ngini, la ngini ni sanga donga di'a ni maḏibo toma ngo'omo boloto.

Roma 8:18

Sababu ngoi to ngaku mode-mode'e mangale ma mulia ga'a Ma Jou'ongu Madutu ḏuanga i'a 'o sijumu ra ngene, mulia gena-ge lai lamo'o reo sangisara mo-moini ga'a ngene wa basono toma 'orasa nange-ne.

Roma 9:23

Re ḏi'i Ma Jou'ongu Madutu mau 'o sijumu 'Ai mulia ma pari cua ra ngene 'Ai 'umata ga'a Unanga na sijumu 'Ai 'akala re sinyingara ma la-la, ngene ga'a Unanga ra sidodahe di'a 'ahu ga'a 'i mulia toma soroga.

2 Korintus 12:21

Ngoi to dodato na'o ḏuanga i'a to sapolo dadunu ra ngini, 'ari Jou'ongu Madutu 'o sipake-pake ngoi ua taninga biono. Dadi ngoi to 'aḏi sababu taninga sigolona 'age ngowa'a manga repe moju ga'a 'a'a ḏosa. Ananga gena-ge 'aḏi maḏibo toma ngo'omo boloto nyangu re 'aḏi matogumu ua 'a'a 'ori i'a ma cafarune, su-sudala, re 'ori i'a ga'a patasa ua di'a ngowa'a ngaku Yesus.

2 Korintus 4:17

Nange-ne ngomi basono sangisara mada'a gena-ge 'i ti'ara ua re ḏubuso woḏi ua. Ḏuanga i'a ngomi mi sanga ngogele lai lamo'o. Re na'o site-tero ngogele gena-ge reo sangisara ga'a mi basono, ngogele gena-ge ma pari cua re kama ḏo-ḏogumu ua.

Efesus 1:18

Dadi ngini ninga fikirana 'i dadi tarangi mangale barakati di'a ngini. Barakati gena-ge ga'a ninga ngo-nganono, sababu Unanga ro 'aro'o ngini. Re ngini balasu ni sahe mode-mode'e mangale Ma Jou'ongu Madutu 'ai barakati ma mulia Ra sidodahe di'a 'Ai 'umata.

Efesus 1:7

Ngene rewo marimoi ra Kristus. Dadi gena-ge ma ngale Ma Jou'ongu Madutu ro singi-ngiranga nanga ḏosa-ḏosa re Unanga ro sibebasa ngene sababu Yesus 'ai ngaunu ri pa'ala di'a ngene. Gena-ge ri dadi sababu 'Ai mura re dadalara ga'a kama tola'a ua di'a ngene.

Efesus 2:7

Ma Jou'ongu Madutu 'o 'a'a so'o gena, la ḏuanga i'a manusia mo-moini ya oḏi'i mangale Ma Jou'ongu Madutu 'ai mura re dadalara lai lamo'o ra ngene. 'Ai mura re dadalara gena-ge 'a sidodai ra ngene sababu ngene wo marimoi ra Kristus Yesus.

Efesus 3:16

Ngoi to manyiata ra Ma Jou'ongu Madutu ga'a 'o tegoro toma mulia ma pari cua, re 'Ai barakati kama moini ua. Ngoi to manyiata to golo'o ra Unanga gena-ge mangale 'Ai Ngagara 'Ofi-'Ofi 'i site'e ngini ninga 'akala re sinyingara.

Efesus 3:8

Pa'i ngoi ḇato kari ijana ua ra Ma Jou'ongu Madutu 'ai 'umata mo-moini. Mada'a sababu Ma Jou'ongu Madutu 'ai mura re dadalara Unanga 'a siwatasa munara ra ngoi di'a to singadolo toma ngowa-ngowa'a Yahudi ua mangale 'Ai barakati ga'a kama moini ua sababu 'a Kristus.

Filipi 4:7

Ḏua dame ra Ma Jou'ongu Madutu, ga'a manusia 'aḏi sahe yoḏu'u, enanga ḏuanga i'a 'i kadiarata ninga 'akala re sinyingara sababu ngini reni marimoi ra Kristus Yesus.

Kolose 1:27

Ma Jou'ongu Madutu mau 'a siwaiti Tai 'umata mangale 'ai rahasia ga'a 'i rousu re mulia gena-ge di'a ngini, ngowa'a Yahudi ua. Rahasia gena-ge Kristus 'o tegoro taninga 'akala re sinyingara ma dara. Dadi ngini ni waro mode-mode'e ḏuanga i'a Ma Jou'ongu Madutu 'o pula'a 'Ai mulia ma balangu ra ngini.

Kolose 3:16

Ngini balasu ni 'elingi tau-taunu Kristus 'ai do-doto'o, la 'i parenta taninga de'oso re ḏegoro, demo re ganau. Dadi ngini ni mete'e ma duhu so'o ne: Ni ma'u doto'o, ni ma'u si'elingi di'a mete'e 'Ai do-doto'o reninga 'akala soro'unu. Re ni mete'e ma duhu so'o ne ḏi'i: Ni manyanyi Mazmur, puji-pujiana re manyanyi nyanyi ma lelegu. Re wakutu ngini manyanyi, ni sibere ie murasa ma la ra Ma Jou'ongu Madutu.

1 Tesalonika 2:12

Ngomi mi golo'o mode-mode'e re babata tau-taunu ngini di'a ni 'ahu mete'e Ma Jou Yesus 'ai do-doto'o, la ni sisanangi Ma Jou'ongu Madutu 'ai 'akala re sinyingara; sababu Unanga nu 'aro'o ngini ni dadi 'Ai ngowa-ngowa'a masiretene, ga'a Unanga ḏuanga i'a nu parenta rema kabasarana.

1 Timotius 6:17

Ngana balasu no golo'o toma ngowa-ngowa'a rema-enanga toma dungia nena-ne, awa ananga 'aḏi momole re awa 'aḏi masinganono toma 'ori i'a 'i kakali ua ma tero sa'olo manga harata. Ananga balasu 'aḏi masinganono ra Ma Jou'ongu Madutu ga'a 'o pula'a 'oru ḇato ra ngene pai-pai'i di'a ngene nanga 'ahu.

Filemon 1:4

Wakutu ngoi to manyiata di'a ngana, ngoi to sibere ie murasa ma la tari Jou'ongu Madutu,

1 Petrus 5:1

Ngoi to ajele ma ngale ra ngini, jama'ata ma bi-biri'i sababu ngoi ḏi'i jama'ata ma bi-biri'i ma tero sa'olo ngini, re ḏi'i ngoi to oḏi'i masiretene 'a Kristus 'ai sangisara. Ḏuanga i'a, wakutu ma 'orasa enanga 'i ngadolo Ma Jou'ongu Madutu 'o sijumu Kristus 'ai mulia ra ngene mo-moini, ngoi ḏi'i ta dawongo Unanga 'ai mulia ma balangu.

1 Petrus 5:10

Ti'ara ua, ngini ni basono ma sangisara. Togumu i'a Ma Jou'ongu Madutu 'o sitiai ngini moju: Unanga gena-ge masiretene 'O site'e ninga ngo-ngaku, la ninga ngo-ngaku kama elala ua, mada'a ni nga'unu tahana toma 'oru ḇato. Unanga 'o 'a'a so'o gena-ge, sababu Unanga romanga mura re dadalara re Ro 'aro'o ngini di'a ni sanga balangu Tai kabasarana kama ḏo-ḏogumu ua, sababu ni marimoi ra Kristus.