Filipi 3:20 - Jaji ma Su-sungi

²⁰ Mada'a ngene rewo osama nyo-nyoimi toma Soroga ma Pareta. Re Ma Jou Yesus Kristus, nanga Salamata ma Cimi, ḏuanga i'a dadunu 'o sapolo da'a toma ngi'i gena-ge ino. Unanga gena-ge ga'a ngene wu totoma re wu ga-ganutu.

Filipi 3:20 Iomraidhean Croise

Matias 19:21

Yesus 'o kanau, “Na'o ngana mau no dadi ti-tiai, no maḏibo re na wu'unu 'ani 'ori i'a rana mo-moini, re ma pipisi na sibalangu toma ngowa-ngowa'a ma dinga'unu ua. Dadi, ngana ḏuanga i'a no sanga 'ori i'a rana mode-mode'e toma soroga. Togumu i'a no sapolo re no mete'e Ngoi!”

Lukas 12:21

So'o gena enanga ḏuanga i'a 'i dadi toma ngowa'a ga'a 'aḏi mau dadi ngowa'a rema-enanga toma dungia, mada'a 'aḏi disa ua dadi ngowa'a rema-enanga ra Ma Jou'ongu Madutu 'ai momina!”

Lukas 14:14

Na'o ngana 'a'a so'o gena ḏuanga i'a ngana no bara'utungu. Sababu ngowa'a gena-ge ya balasa nga'unu ua ngana 'ani la. Mada'a ngana 'ani la, ḏuanga i'a Ma Jou'ongu Madutu 'a balasa wakutu ngowa'a loasa re banari dadunu 'aḏi 'ahu moju toma ngowa'a senge-sengene manga sigolona.”

Yesus 'ai so-soma'a 1:11

Ananga 'aḏi kanau, “Hai ngowa-ngowa'a Galilea, i'a sa'olo ngini ni made-de'oso 'age re ni tatamo da'u diwanga? Yesus, ga'a Ma Jou'ongu Madutu 'o sibere da'u toma soroga ra ngini ninga biono, ḏuanga i'a dadunu 'O sapolo moju ma duhu 'i ma tero sa'olo ngini nu oḏi'i Unanga 'o pere toma soroga.”

1 Korintus 1:7

singadolo reni dawongo cocatu mo-moini kama kuranga ua wakutu ngini totoma nanga Jou Yesus Kristus dadunu 'o sapolo moju.

1 Korintus 15:48

Manusia ma tero sa'olo Adam ma mulaingi ga'a sidadi reo tana'a. Mada'a ngowa-ngowa'a manga 'asala toma soroga ma tero sa'olo Kristus ga'a sapolo toma soroga tala.

2 Korintus 4:18

Dadi ngomi ma tailako ua 'ori i'a ga'a ngomi ma oḏi'i, siḏibo ḏi'i ngomi ma tailako 'ori i'a ga'a ngomi ma oḏi'i ua. Sababu 'oru ḇato ga'a ma oḏi'i, enanga ma dahana ti'ara ua. Mada'a 'oru ḇato ga'a ma oḏi'i ua, enanga ma dahana kasingado-ngadolo i'a.

2 Korintus 5:8

Ngoi dadunu to kanau: Ngomi minga 'akala re sinyingara 'i te'e. Re ḏi'i, ngomi lebe mi nyanyaḏi mi sisoi'i tala nanga lese, la nga'unu mi tegoro marimoi ra Ma Jou Yesus.

Galatia 4:26

Mada'a ngo Sara we-were'a budaka ua ma tero sa'olo Yerusalem ga'a toma soroga. Sababu munanga gena-ge re 'ami ngowa'a 'aḏi 'ahu bebasa ra Musa 'ai hukumu. Re ḏi'i munanga mo dadi ngina di'a ngowa'a mo-moini ga'a raḏi bebasa ra Musa 'ai hukumu.

Efesus 2:19

Sababu gena-ge, 'au nga'ene ngini ga'a ngowa'a Yahudi ua ma tero sa'olo ngowa'a tagi-tagi ino, toma 'orasa nange-ne, so'o gena-ge riwara. Siḏibo ḏi'i, ngini reni dadi Ma Jou'ongu Madutu 'ai 'umata, re reni osama nyo-nyoimi ra Ma Jou'ongu Madutu 'ai ngitu re ngale.

Efesus 2:6

Ma Jou'ongu Madutu dadunu ro si'ahu ngene nanga nyawa, ma tero sa'olo Unanga dadunu ro si'ahu Yesus moju toma ngowa'a senge-sengene ma ngi'i. Sidogo ḏi'i, sababu ngene rewo marimoi ra Kristus, enanga 'i ma tero sa'olo Ma Jou'ongu Madutu ro sibere ngene da'u toma soroga re wo tegoro mamete'e ra Kristus toma ngi'i gena-ge. Sababu gena-ge, enanga 'i ma tero sa'olo ngene ḏi'i wo parenta mamete'e ra Yesus Kristus toma soroga.

Filipi 1:10

Ngoi 'ari go-golo'o so'o gena-ge, la ngini ni pili 'ori i'a ma la-la re ninga 'ahu 'i 'ofi-'ofi re kama sala ua singadolo toma wangere Kristus dadunu 'o sapolo moju.

Filipi 1:27

'Orasa nange-ne, lebe la-lamo'o i'a ngini ninga 'ahu ma duhu balasu 'i patasa di'a ngowa'a ga'a 'aḏi mete'e Habari Roanga mangale Kristus gena-ge. Dadi, bae ngoi to ma'u sanga moju bolo sanga riwara ra ngini, ngoi ḏuanga i'a ta 'isene mangale ngini ni marimoi. Re ḏi'i ngini ni marimoi taninga munara di'a ni sibukiti mangale Habari Roanga gena-ge 'i banari, dadi ngowa-ngowa'a ḏuanga i'a ya ngaku.

Kolose 1:5

Ngini ni ngaku Yesus Kristus re ni dadalara Ma Jou'ongu Madutu 'ai 'umata, sababu ngini ni masinganono mode-mode'e ḏuanga i'a ni sanga barakati ga'a Ma Jou'ongu Madutu 'o sidodahe ḏua toma soroga di'a ngini. Ngini reni 'isene mangale Habari Roanga ga'a 'i ba-banari, wakutu ngowa'a ya singadolo gena-ge ra ngini.

1 Tesalonika 1:10

Ananga ya sijarita ḏi'i mangale ma duhu sa'olo ngini ni totoma wakutu Ma Jou'ongu Madutu 'ai Ngowa'a Nau'u dadunu 'O sapolo moju da'u soroga tala. Unanga gena-ge ga'a 'O sengene ḏua mada'a Ma Jou'ongu Madutu dadunu 'o si'ahu moju re Unanga gena-ge na sisalamata ngene ra Ma Jou'ongu Madutu 'ai borata ga'a 'i dadi toma biono i'a.

1 Tesalonika 4:16

Toma 'orasa gena-ge, mala'ekata ma sae'e unanga ḏuanga i'a 'o kanau 'o siduga-duga re 'o wusu Ma Jou'ongu Madutu 'ai terompet. Enanga gena-ge 'i dadi didina'o mangale Ma Jou masiretene 'O 'uci da'u soroga tala, kara Unanga 'o dadunu si'ahu moju ngowa'a ngaku Yesus ga'a raḏi sengene siḏa.

2 Timotius 4:8

'Orasa nange-ne, ngoi pa'i ta totoma ma ngogele ḇato ga'a Ma Jou'ongu Madutu ro gogono ḏua toma soroga di'a ngoi. Toma Kiamata ma Wangere, Ma Jou 'o dadi juruhakimi 'adili, ḏuanga i'a 'O sipula'a 'ari ngogele gena-ge, sababu ngoi 'ari 'ahu 'i mete'e Ma Jou'ongu Madutu 'ai 'akala ma mau. Pa'i ngoi ḇato ua mada'a ngowa'a mo-moini ga'a 'aḏi dadalara re 'aḏi totoma Ma Jou dadunu 'o sapolo moju.

Titus 2:13

Ngene balasu wo 'ahu so'o gena, sababu wo totoma re wa ngano-nganono tau-taunu di'a ma 'orasa barakati enanga 'i ngadolo. Toma wangere gena-ge, ngowa'a mo-moini ḏuanga i'a 'aḏi oḏi'i Yesus Kristus, nanga Salamata ma Cimi Rai kabasarana, re Ma Jou'ongu Madutu ga'a 'Ai kuasa ma pari cua.

'Ibrani 12:22

Siḏibo ḏi'i, ngini reni sapolo talaḏi toma Kie Sion, limau Yerusalem toma soroga, gena-ge Ma Jou'ongu Madutu ga'a 'ahu, Unanga 'ai limau. Ngini reni talaḏi toma mala'ekata rema cala-cala ga'a 'o malomu re 'o maroanga talaḏi ra Unanga gena-ge.

'Ibrani 9:28

So'o gena ḏi'i, Kristus ro sidoa'a 'Ai lese masiretene soi moi ḇato sa'olo jou-jou ra Ma Jou'ongu Madutu, la 'O singi-ngiranga ngowa'a repe manga ḏosa. Re ḏuanga i'a Unanga dadunu 'o sapolo moju ma soi ḏiḏi, Unanga 'o singi-ngiranga ḏosa riwara, mada'a 'O gasa salamata di'a ngowa'a ga'a 'aḏi totoma Unanga.

Tingoýi 1:7

Oḏi'i, Unanga 'o sapolo sa'olo mabalene toma kakamo. Re ngowa-ngowa'a mo-moini 'aḏi oḏi'i Unanga. So'o gena ḏi'i, ngowa'a ga'a 'aḏi topo'o Unanga. Bangsa mo-moini toma dungia ma dara, ananga gena-ge ya rerese ma gaḏi, wakutu 'aḏi oḏi'i Unanga. 'Amin.