Filipi 3:10 - Jaji ma Su-sungi

¹⁰ Pa'i rimoi ḇato ga'a ngoi to mau, gena-ge mangale ngoi lebe to nana'o Kristus: Ngoi ta basono 'Ai kuasa tari 'ahu ma dara. Kuasa gena-ge ma tero Ma Jou'ongu Madutu 'ai kuasa ga'a dadunu 'U si'ahu moju Unanga toma ngowa'a senge-sengene manga sigolona. Re ḏi'i ngoi ta basono sangisara ma tero sa'olo Unanga ra basono singadolo ngoi nyengara to sengene ma duhu ma tero sa'olo Unanga 'o sengene.

Filipi 3:10 Iomraidhean Croise

Matias 20:23

Yesus 'o kanau ra ananga, “Mode-mode'e, ḏuanga i'a ngini ni ka'e Tari sawo'o. Mada'a mangale 'a guna 'o tegoro Tari giama ma kuwiḏa bolo Tari giama ma kuḇali, gena-ge Ngoi 'ari haku ua ta sitantukanga. 'Ari Ḇaḇa ra sitantukanga 'a guna tegoro toma ngi'i-ngi'i gena-ge.”

Yohanes 10:18

Matengo i'a mai ua nga'unu ya 'oro 'Ari 'ahu. Ngoi ta sidoa'a 'Ari 'ahu 'i mete'e 'Ari mau masiretene. Ngoi rari kuasa di'a ta sidoa'a 'Ari 'ahu, re Rari kuasa dadunu To 'ahu moju. Parenta gena-ge 'Ari Ḇaḇa ro sipula'a ra Ngoi.”

Yohanes 17:3

'Ahu kasingado-ngadolo i'a ma ngale so'o ne: Ngowa'a 'aḏi nana'o 'Ari Ḇaḇa, 'aḏi nana'o Ngoi ḏi'i. 'Ari Ḇaḇa pa'i matengo ḇato ga'a Ma Jou'ongu Madutu mode-mode'e; re Ngoi, Yesus Kristus ga'a 'Ari Ḇaḇa Ri 'utusu.

Roma 8:17

Re sababu ngene Unanga 'ai ngowa-ngowa'a, tantu ḏua ḏuanga i'a ngene wo sanga warisi ga'a Unanga 'o sidodahe di'a 'Ai ngowa-ngowa'a. Re ngene ḏuanga i'a sanga warisi gena-ge mamete'e ra Kristus. Sababu toma dungia nena-ne ngene wo sanga sikisa ma tero sa'olo Kristus, dadi ḏuanga i'a ngene wo sanga 'Ai mulia ma balangu ḏi'i.

Roma 8:29

Sababu 'ua re 'au wali ananga ga'a Ma Jou'ongu Madutu ro cumutu di'a dadi 'Ai ngowa-ngowa'a, Unanga ya'u sitantukanga ḏua mangale ananga gena-ge manga tabeata 'i ma tero sa'olo 'Ai Ngowa'a Nau'u 'Ai tabeata. Dadi Yesus gena-ge 'o dadi ngowa'a nau'u ma jomolo, re ngene wo dadi 'Ai no-nongoḏu ma repe.

Roma 8:36

Gena-ge ma tero sa'olo 'i silefo toma Boku 'Ofi-'Ofi ma dara so'o ne: “Wangere ma giḏanga i'a, ngowa'a 'aḏi tai'i sisengene ngomi, sababu mi mete'e Ma Jou'ongu Madutu. Ngowa'a 'aḏi ta'ajiri ngomi ma tero sa'olo doba-doba ga'a mau ya tola'a.”

2 Korintus 1:10

Unanga ro sisalamata ngomi toma bahala lamo'o gena-ge, singadolo mi sengene ua. Re Unanga ḏuanga i'a 'o sisalamata ngomi toma bahala 'oru ḇato ga'a ngomi ma sanga toma 'orasa nange-ne. Sababu gena-ge ra Ma Jou'ongu Madutu ḇato ngomi ma singanono mangale Unanga ḏi'i ḏuanga i'a 'O sisalamata ngomi toma bio-biono i'a.

2 Korintus 1:5

Ma Jou Yesus Kristus 'a basono sangisara ma repe, re 'Ai sangisara gena-ge ngomi rema basono ḏi'i. Re ngomi sanga de-de'e 'i mamete'e rea Kristus ḏi'i.

2 Korintus 13:4

Wakutu ngowa'a 'aḏi sisalib Unanga, Unanga 'o lamahana. Mada'a 'orasa nange-ne Unanga ro dadunu 'ahu moju sababu Ma Jou'ongu Madutu 'ai kuasa. Ngomi ḏi'i mi lamahana ma tero sa'olo Kristus, mada'a ngomi mi sanga 'ahu su-sungi sababu mi marimoi ra Kristus. Re wakutu ngomi mi talaḏi ngini, ngini ni oḏi'i Kristus 'ai kuasa ra Ma Jou'ongu Madutu ino, 'age ra ngomi.

Galatia 2:20

'Ari 'ahu ne, ngoi 'ari 'ahu 'ua mada'a Kristus masiretene ro 'ahu ra ngoi. 'Ahu ga'a ngoi ta basono nange-ne sababu ngoi to ngaku Ma Jou'ongu Madutu 'ai Ngowa'a Nau'u ga'a 'o dadalara ngoi re Unanga 'o sengene di'a ngoi.

Galatia 6:17

Ma ḏo-ḏogumu, awa matengo i'a dadunu 'o sikangela ngoi moju. Sababu tari lese 'age rema bukiti-bukiti ga'a ngoi to sanga sikisa, sababu ngoi Yesus 'ai so-soma'a.

Efesus 4:13

Ma duhu so'o gena-ge, ngene mo-moini wo dadi rimoi sababu nanga ngo-ngaku marimoi re nanga wo-waro 'i ma tero mangale Ma Jou'ongu Madutu 'ai Ngowa'a Nau'u. Dadi, ngene ḏuanga i'a wo dadi bi-biri'i, ga'a lebe ti'ara lebe dogo tiai, singadolo ngene wo dadi ma tero sa'olo Kristus.

Filipi 3:8

Pa'i gena-ge ḇato ua, mada'a mo-moini ma tero sa'olo enanga gena-ge ga'a ngoi ta 'a'a ma siḏa, nange-ne ngoi ta site-tero enanga gena-ge ma faeda 'i cua ra ngoi. 'Oru ga'a 'age ra ngoi toma 'orasa nange-ne enanga ma ijana lai hali madutu, gena-ge mangale nana'o Kristus Yesus 'ari Jou. Sababu Kristus, ngoi ta sieanga mo-moini ga'a ma siḏa ngoi to site-tero 'i sigasa Ma Jou'ongu Madutu 'ai barakati ra ngoi. Mo-moini gena-ge ma tero sa'olo jeremoto, la ngoi nga'unu to dawongo Kristus,

Kolose 1:24

Nange-ne, ngoi to sanangi to sanga sangisara di'a ngini ninga la. Sababu so'o gena-ge, ngoi ta sitotomo 'oru ga'a Kristus 'o siwatasa ra ngoi. Gena-ge ngoi balasu to sangisara di'a jama'ata manga la. Jama'ata gena-ge ma tero sa'olo Kristus 'ai lese.

Kolose 2:13

'Au nga'ene, kalaha ngini ni 'ahu-'ahu, ngini ni ma tero sa'olo ngowa'a raḏi sengene. Gena-ge 'i dadi sababu reni baraḏosa re ngini sanga suna ua taninga 'akala re sinyingara ma dara. Mada'a nange-ne, Ma Jou'ongu Madutu dadunu 'o si'ahu ngini mamete'e ra Kristus sababu ngene nanga ḏosa mo-moini, Ma Jou'ongu Madutu ra singi-ngiranga.

Kolose 3:1

'Au nga'ene, ngini ma tero sa'olo ngowa'a raḏi sengene. Mada'a nange-ne, ngini ma tero sa'olo ngowa'a dadunu 'aḏi 'ahu moju mamete'e ra Kristus. Sababu gena-ge, ngini balasu ni nyafusu mode-mode'e 'ori i'a i'a toma soroga, ga'a Kristus ro tegoro ra Ma Jou'ongu Madutu 'ai giama ma kuwiḏa i'a, re 'O parenta mamete'e ra Ma Jou'ongu Madutu.

1 Petrus 1:3

Ino ngene wo puji re silamo'o Ma Jou'ongu Madutu, Yesus Kristus nanga Jou 'ai Ḇaḇa. Sababu Unanga 'o sijumu 'Ai 'akala re sinyingara ma la-la ra ngene, singadolo 'O pula'a 'ahu su-sungi ra ngene. Gena-ge 'i nyengara, sababu Yesus Kristus ro sengene, mada'a dadunu 'o 'ahu moju. Sababu gena-ge nanga ngo-nganono 'i dadi de-de'e rimoi.

2 Petrus 1:13

Sababu ngoi ta basono tala paralu madutu 'ori i'a ga'a ta siajele ḏua ra ngini, ngoi ta si'elingi tau-taunu singadolo ngoi to sengene.

1 Yohanes 2:3

Na'o ngene wa mete'e tau-taunu 'oru ḇato ga'a Ma Jou'ongu Madutu 'ai parenta, gena-ge 'i dadi nana'o rimoi mangale ngene mode-mode'e wo nana'o Unanga.

1 Yohanes 2:5

Mada'a na'o 'age rema ngowa'a matengo mete'e tau-taunu 'oru ḇato ga'a Ma Jou'ongu Madutu 'ai demo, ngowa'a gena-ge 'o sijumu rai 'ahu ma duhu mangale 'o dadalara mode-mode'e Ma Jou'ongu Madutu. 'Ahu ma duhu so'o gena-ge 'i dadi didina'o rimoi mangale ngene nanga 'ahu wo marimoi mode-mode'e ra Ma Jou'ongu Madutu.

Tingoýi 1:18

Ngoi nena-ne 'ahu ma cimi. Ngoi reto sengene, mada'a dadunu To 'ahu moju re nange-ne To 'ahu kasingado-ngadolo i'a. 'Ari kuasa to ngadolo toma ngowa'a senge-sengene manga ngi'i. Dadi Ngoi nga'unu to si'ahu moju ngowa'a raḏi sengene.