Filipi 2:7 - Jaji ma Su-sungi

⁷ Mada'a Unanga 'a sieanga, di'a sanga ḏe-ḏegoro sa'olo budaka matengo re Unanga 'o dadi sa'olo manusia, re 'Ai rupa wa oḏi'i i'a ma tero sa'olo manusia.

Filipi 2:7 Iomraidhean Croise

Matias 12:18

“Unanga nena-ne Ngoi 'Ari falalomu ga'a Ngoi reto cumutu. Unanga ga'a to dadalara re ga'a 'a sisanangi 'Ari 'akala re sinyingara 'Ari Ngagara 'Ofi-'Ofi ḏuanga i'a ta sipula'a ra Unanga. Re Unanga ḏuanga i'a 'o sihabari mangale 'Ari 'adili toma bangsa-bangsa.

Matias 20:28

So'o gena-ge ḏi'i ma tero sa'olo Ngoi, Manusia ma Ngowa'a Nau'u. Ngoi to sapolo di'a ngowa-ngowa'a 'aḏi de-de'oso Ngoi ua. Mada'a Ngoi to sapolo di'a To de-de'oso ngowa-ngowa'a, re Ta sidoa'a 'Ari 'ahu di'a To tuusu ngowa'a repe tamanga ḏosa.”

Markus 9:12

Yesus 'a sangoro, “Mode-mode'e, nabi Elia ḏuanga i'a 'o sapolo siḏa di'a 'o sidiai 'ori i'a mo-moini di'a 'O Kristus. Na'o so'o gena, i'a sa'olo 'i silefo toma Boku 'Ofi-'Ofi ma dara mangale Ngoi, Manusia Ma Ngowa'a Nau'u, balasu sanga sangisara repe re ngowa'a 'aḏi dawongo ua Ngoi?

Lukas 22:27

'A guna lebe la-lamo'o i'a: Ngowa'a ga'a tegoro oromo toma meja bolo ngowa'a ga'a side-de'oso ngowa'a 'aḏi oromo?! Tantu ḏua ngowa'a ga'a tegoro oromo toma meja. Mada'a Ngoi, sa'olo ninga Tuanga, taninga sigolona To dadi sa'olo ninga falalomu.

Yohanes 1:14

'Idini gena-ge ri dadi manusia, re Unanga 'o tegoro tananga sigolona re wa oḏi'i ḏua 'Ai kabasarana. Kabasarana gena-ge ma 'asala ra Ma Jou'ongu Madutu sababu Unanga 'Ai Ngowa'a Nau'u pa'i matengo. Sababu Unanga, ngene wa basono tala Ma Jou'ongu Madutu 'ai mura re dadalara masala ra ngene, re Unanga 'o sijumu ma ba-banari mangale Ma Jou'ongu Madutu ra ngene.

Roma 1:3

Habari Roanga gena-ge mangale Ma Jou'ongu Madutu 'ai Ngowa'a Nau'u matengo ga'a mete'e manusia, Unanga gena-ge 'ai 'asala ra 'Olana Daud 'ai ju'uda.

Roma 15:3

Sababu Kristus ḏi'i 'o disa ua di'a sisanangi 'ai diri masiretene. Mada'a ma tero sa'olo toma Boku 'Ofi-'Ofi ma dara ri silefo mangale Kristus ro kanau ra Ma Jou'ongu Madutu so'o ne: “Demo je-jengere ga'a ngowa'a 'aḏi kanau ra Ma Jou'ongu Madutu, gena-ge ri singe-ngeta'a ra Ngoi.”

Roma 15:8

Awa ni sidaioranga mangale Kristus ro sapolo toma dungia di'a 'O de-de'oso ngowa-ngowa'a Yahudi, la Unanga 'o sijumu ra ngene mangale Ma Jou'ongu Madutu 'o cufala sitotomo 'Ai jaji tananga ete re dotumu.

Roma 8:3

Musa 'ai hukumu 'i sibebasa ngene yoḏu'u toma ḏosa ma kuasa; sababu manusia wo lamahana woḏi di'a mete'e ti-tiai hukumu gena-ge. Mada'a Ma Jou'ongu Madutu nyengara 'o sibebasa ngene toma ḏosa ma kuasa gena-ge: Unanga 'o 'utusu 'Ai Ngowa'a Nau'u di'a dadi jou-jou rimoi, la 'O tuusu ngene tananga ḏosa. Unanga gena-ge 'o sapolo toma dungia nena-ne ma tero sa'olo manusia, mada'a Unanga 'o 'a'a ḏosa ua.

2 Korintus 13:4

Wakutu ngowa'a 'aḏi sisalib Unanga, Unanga 'o lamahana. Mada'a 'orasa nange-ne Unanga ro dadunu 'ahu moju sababu Ma Jou'ongu Madutu 'ai kuasa. Ngomi ḏi'i mi lamahana ma tero sa'olo Kristus, mada'a ngomi mi sanga 'ahu su-sungi sababu mi marimoi ra Kristus. Re wakutu ngomi mi talaḏi ngini, ngini ni oḏi'i Kristus 'ai kuasa ra Ma Jou'ongu Madutu ino, 'age ra ngomi.

2 Korintus 8:9

Ngoi to paralu ua di'a parenta ngini sababu ngini rena waro mode-mode'e nanga Jou Yesus Kristus 'o dadalara ngene. Unanga gena-ge ngowa'a rema-enanga toma soroga, 'O kama kuranga 'oru ua. Mada'a Unanga 'o sisoi'i tala gena-ge re 'O madadi ngowa'a ma dinga'unu ua toma dungia nena-ne di'a ngini ninga paralu. Dadi Yesus 'ai dinga'unu ua gena-ge sidadi ngini ngowa'a rema-enanga toma soroga.

Galatia 4:4

Mada'a wakutu ma 'orasa ri ngadolo, ga'a Ma Jou'ongu Madutu ro sitantukanga pasala ḏua, Unanga 'o siḏingoto 'ai Ngowa'a Nau'u sapolo toma dungia. Re we-were'a matengo mu sibuoro Unanga. Sababu gena-ge sa'olo ngowa'a Yahudi, Unanga balasu 'o ta'aloko ra Musa 'ai hukumu.

Filipi 2:6

Yesus ma tero ra Ma Jou'ongu Madutu, mada'a 'Ai ḏe-ḏegoro gena-ge, Yesus 'o matahana ua.

'Ibrani 12:2

Ino ngene wo tatamo tau-taunu pa'i ra Yesus ḇato. Sababu Unanga nena-ne 'o welanga salamata ma ngo'omo di'a ngene sababu 'Ai ngo-ngaku ra Ma Jou'ongu Madutu. Re ḏi'i sababu Unanga si'a'a nanga salamata 'i ti-tiai sababu nanga ngo-ngaku ra Unanga. Unanga 'o tahana wakutu sanga sangisara toma ngowa'a ga'a 'U salib. Re kalaha Unanga 'o sengene toma salib, gena-ge ga'a 'i sipula'a mara'a ngowa'a, Unanga 'a kalesanga ua sababu Unanga pa'i 'o 'elingi tau-taunu nena-ne: Togumu i'a 'O sanga roanga. Nange-ne Unanga 'o tegoro ra Ma Jou'ongu Madutu 'ai giama ma kuwiḏa, re 'O parenta mamete'e ra Unanga.

'Ibrani 13:3

Ngini balasu ni 'elingi tau-taunu ninga ioronongoḏu ngo-ngaku rimoi toma bui, ma tero sa'olo ngini ḏi'i ni tegoro mamete'e ra ananga toma bui ma dara, la nga'unu na'u riono ananga. Re ni 'elingi tau-taunu ḏi'i ninga ioronongoḏu ngo-ngaku rimoi, ananga ga'a sanga sikisa ma tero sa'olo ngini ḏi'i ni sanga sikisa mamete'e ra ananga, la nga'unu na'u riono ananga.

'Ibrani 4:15

Sababu Yesus, ngene nanga 'Imam 'Agung gena-ge, Unanga 'o sahe mode-mode'e ngene nanga lamahana. Sababu Unanga masiretene 'a sanga bo-baja toma 'oru ḇato ma tero sa'olo ngene. Mada'a ma tero sa'olo ngene ua, Unanga kama ḏosa ua.