UMATEWU 19:9 - IsiNdebele 2012 Translation

⁹ Ngiyanitjela bona nanyana ngubani otlhala umkakhe ngaphandle kwesizathu sokuhlobonga bese uthatha omunye umfazi, uzabe uyahlobonga.”

UMATEWU 19:9 Iomraidhean Croise

UGENESISI 20:3

Kodwana ebusuku uZimu wabonakala ku-Abimeleki ngebhudango wathi: “Ufile wena ngebanga lomfazi omthetheko ngombana umfazi lo ungowenye indoda.”

2 IINKRONIKE 21:11

UJehoramu nguye godu owakhe iindunduma emibundwini yakwaJuda bewabangela bonyana abantu beJerusalema bahlobonge godu wadurhisa noJuda.

UJOROMIYA 3:1

“Joromiya kufuze uthi kibo, ‘Lokha indoda nayitlhala umkayo, bese uyayitjhiya, ende kenye indoda, kumele indoda leya ibuyele kuye godu na? Inarha ayizukusilaphala khulu ngalokho na? Wena ungwadle neenthandwa ezinengi. Alo, ufuna ukubuyela kimi ije unjalo na?’ ” Kutjho uSomnini.

UJOROMIYA 3:8

Yeke u-Israyeli oqoqomako lo ngiyomthokoza kwabo, ngimhlome ngencwadi yokumtlhala ngebanga lokuhlobonga kwakhe. Kodwana ngabona bonyana udadwabo, uJuda ongathembekiko lo akanavalo, naye ngokwakhe ukhambile wayokungwadla.

UHEZEKIYELI 16:15

“ ‘Kodwana wathembela ebuhleni bakho, waba yingwadla ngebanga ledumo lakho. Wakhamba utjhemulela woke odlula ngendlela, wazineka kuye.

UHEZEKIYELI 16:29

Nje-ke wandisa ubungwadla bakho nenarha yabarhwebi, okutjho inarha yamaKasidi, nalapho akhange bewaneliswe.’

UHEZEKIYELI 16:8

“ ‘Kwathi lokha nangidlula ngakuwe godu, ngakubona, qala, bewusesigabeni sokuqoma. Nje-ke ngathabululela ingutjanami phezu kwakho kobana ngigubuzese ubuze bakho. Iye, ngakunikela isifungo, ngenza isivumelwano nawe. Ngalokho waba ngowami.’ Kutjho uSomnini uSomandla.

UMATEWU 19:10

Abafundi bakhe bathi kuye: “Nakube kunjalo hlangana nendoda nomkayo, kungadumbana kungathathwa-ke.”

UMATEWU 19:8

UJesu waphendula wathi: “UMosi wanivumela bonyana nitlhale abafazi benu ngombana benineenhliziyo ezikhunyaleleko. Kodwana ekuthomeni bekungasinjalo.

UMATEWU 5:32

Kodwana ngithi kini nanyana ngubani otlhala umkakhe ngaphandle kweenzathu zokuhlobonga, umbangela bona ahlobonge begodu nanyana ngubani othatha umfazi otlhaliweko uyahlobonga.”

ULUKASI 16:18

“Nanyana ngubani otlhala umkakhe bese uthatha omunye, uyahlobonga, nendoda ethatha umfazi otlhaliweko, iyahlobonga.

1 KWEBEKORINTE 5:1

Eqinisweni kubikiwe bonyana kukhona ukuziphatha kumbi ngokwamabhayi phakathi kwenu, begodu okumhlobo ongenzekiko ngitjho naphakathi kwabarhedeni. Indoda ingena emabhayini nomkayise!

1 KWEBEKORINTE 7:39

Umfazi ubopheleleke endodeni yakhe qobana isaphila. Kodwana indoda yakhe yahlongakala, utjhaphulukile bona angenda nanyana kiyiphi ayithandako, kwaphela nakube iyakholwa eKosini.

1 KWEBEKORINTE 7:4

Umfazi akanalo igunya phezu komzimba wakhe, kodwana yindoda enalo; ngokunjalo nendoda ayinalo igunya phezu komzimba wayo, kodwana mfazi onalo.