UDUTERONOMI 12:3 - IsiNdebele 2012 Translation

³ Nizakubhuruza ama-aldarazo, niphadlhe namatjazo akhethekileko. Godu tjhisani imifanekiswazo yabo-Atjhera, nikghunule iinthombembazwa zabosingazimu bazo. Iye, nitjhabalalise ibizo labosingazimabo endaweni leyo.

UDUTERONOMI 12:3 Iomraidhean Croise

1 AMAKHOSI 14:15

USomnini uzakumadlha u-Israyeli kube inga mhlanga nawubhecenyeka emanzini. Uzakusiphula u-Israyeli enarheni ehle ayinikela aboyisemkhulu le bese abaphadlhalaje ngaphetjheya komlambo iYufrathe ngombana bathukuthelise uSomnini ngokwenza imifanekiso yabo-Atjhera.

1 AMAKHOSI 15:13

Wabe wehlisa nogogwakhe uMakha ekubeni yindlovukazi ngombana wenza umfanekiso onyenyisako waka-Atjhera . U-Asa wagawula umfanekiso lowo wawutjhisa esikhisini iKhidroni.

2 AMAKHOSI 11:18

Boke abantu bendawo baya ethempelini lakaBhali bona balibhuruze: Baphadlha ama-aldari neenthombembazwa zaba ziincucwana bebabulala noMathani umphristi wakaBhali phambi kwama-aldari. Yeke uJehoyada umphristi omkhulu, wajamisa abogosa ethempelini lakaSomnini.

2 AMAKHOSI 18:4

Yena wabhuruza iindunduma, waphihliza amatje akhethekileko kanye nemifanekiso yabo-Atjhera. Wafahlaza inyoka yekoporo uMosi agade ayenzile yaba ziinquqwana ngombana bekube sikhatheso abantu bakwa-Israyeli gade basayitjhisela itjhwalo. Inyoka leyo beyibizwa bona nguNerhutjhitani.

2 AMAKHOSI 23:14

UJosiya waphadlha amatje akhethekileko, wagawula nemifanekiso yabo-Atjhera bewazalisa iindawo zabo ngamathambo wabantu.

2 IINKRONIKE 14:2

U-Asa wenza okuhle nokulungileko phambi kwakaSomnini uZimakhe.

2 IINKRONIKE 14:3

Wasusa ama-aldari atjhili kanye neendunduma, waphahlaza amatje akhethekileko bewagawula nemifanekiso yabo-Atjhera.

2 IINKRONIKE 19:3

Nokho kukhonyana ukulunga kuwapha ngombana nakhu ususe imifanekiso yabo-Atjhera enarheni, wabeka ihliziywakho ekufuneni uZimu.”

2 IINKRONIKE 31:1

Kwathi bona koke kuphele, ama-Israyeli agade alapho aphuma aya emizini yakwaJuda. Afika aphadlha amatje akhethekileko abe agawula nemifanekiso yabo-Atjhera. Aphutjhula iindunduma agiriza nama-aldari kilo loke lakwaJuda, kwaBhenjamini, kwa-Efrayimu nakwaManase. Ngemva kobana sele abhidlize koke, ama-Israyeli abuyela emakhabo emadorobhenawo.

2 IINKRONIKE 34:3

Kuthe emnyakeni wobunane wokubusa kwakhe, asesemncani njalo, wathoma ukufuna uZimu kayisemkhulu uDavida. Emnyakeni wetjhumi nambili wokubusa kwakhe wathoma ukuhlwengisa ikwaJuda neJerusalema ngokususa iindunduma, imifanekiso yabo-Atjhera, iinthombembazwa neenthombembunjwa.

AMARHUBO 16:4

Abazikhethela abosingazimu bazandisela isizi; angeze nganikela kibo iminikelo yeengazi, namkha ngiphathe amabizwabo ngeembhena zami.

U-EKSODUSI 23:13

“Yelelani koke engikutjho kini; ningabizi amabizo wabosingazimu; niwakhafule nemilonyenenu.

U-EKSODUSI 23:24

ningakhothameli abosingazimu bawo begodu ningabalotjhi. Ningenzi izinto ngendlelabo kodwana nibaphelise nya beniphadlhe namatjabo akhethekileko.

U-EKSODUSI 34:13

Nibhuruze ama-aldarabo, niphadlhe amatjabo wesikhumbuzo benigawule imifanekiswabo yabo-Atjhera.

U-ISAYA 27:9

Mbala, uzakuhlawula icala lakaJakopo. Ngaleyondlela uzakususa umphumela wesono sakhe: Wenza woke amatje wama-aldari aba njengamatje wepembe aphuphurekako. Imifanekiso yabo-Atjhera nama-aldari wetjhwalo azange atjhiywe asajamile.

UJOROMIYA 17:2

Bahlubayela ngama-aldarabo nemifanekiso yabo-Atjhera emagegana nemithi ehlaza nemibundwini ephakamileko neentabeni emmangweni njengombana bahlubayela ngabantwababo. Juda, umnothwakho namagugwakho woke ngizakunikela ngawo njengepango, ngebanga leendunduma zakho ezisisono sakho kiyo yoke imikhawulwakho.

UHOSIYA 2:17

Ngizamkhafulisa amabizo waboBhali emlonyenakhe, angabe asawabiza.

UMIKHA 5:14

Ngizazibuyiselela ngobukhali nangetukuthelo phezu kwezizwe ngendlela ezingazange ziyibone.”

UZAKARIYA 13:2

“Mhlokho, ngizakuphelisa amabizo wabosingazimu enarheni ukuze bangasakhunjulwa godu. Ngizakususa nabaphorofidi abanommoya osilapheleko enarheni.” Kutjho uSomnini uMninimandlawoke.

UNUMERI 33:52

qotjhani boke abahlali benarha leyo phambi kwenu. Phahlazani yoke imifanekiso yamatje abaziweko nephule zoke iinthombembazwa zabosingazimu begodu nibhuruze zoke iindunduma zabo.

UDUTERONOMI 12:4

Ningalotjhi uSomnini uZimenu ngendlela izizwezo zilotjha abosingazimu bazo ngayo,

UDUTERONOMI 7:25

Nitjhise iinthombembazwa zabosingazimu bazo, ningarhaleli namkha nizithathele isiliva namkha igolide elikibosingazimu labo ngombana lizanibamba njengesifu. Izintwezo zisinyenyiso kuSomnini uZimenu.

UDUTERONOMI 7:5

Kodwana nakhu enizakwenza kizo: Bhuruzani ama-aldarazo, niphahlaze amatje akhethekileko, nigawule nemifanekiso yabo-Atjhera bese nitjhisa iinthombembazwa zazo.

ISAMBULO 13:1

Ngabona isibandana senyuka siphuma elwandle, sineempondo ezilitjhumi neenhloko ezilikhomba. Phezu kweempondo zaso lezo bekuneenhlohlo ezilitjhumi kuthi phezu kweenhloko kube namagama weenhlamba.

ABAKHOKHELI 2:2

Nina-ke ningenzi isikhozi nabahlali benarha le, ngalokho bhuruzani ama-aldarabo. Kodwana azange nilalele umyalwami. Nikwenzeleni lokho na?