1 UTHIMOTHI 1:1 - IsiNdebele 2012 Translation

¹ UPowula, umpostoli kaKrestu Jesu ngomyalo kaZimu uMsindisi wethu noKrestu Jesu ithemba lethu,

1 UTHIMOTHI 1:1 Iomraidhean Croise

AMARHUBO 106:21

Bakhohlwa uZimu omsindisabo owenza izinto ezikulu eGibhide,

U-ISAYA 12:2

Ngambala uZimu uyisindiswami, ngizamethemba ngingesabi. USomnini, iye uSomnini umamandla neenkhwepha zami begodu uyisindiswami.”

U-ISAYA 43:11

Mina lo, ngimi ngedwa uSomnini begodu ngaphandle kwami abe akunamsindisi.

U-ISAYA 43:3

ngombana nginguSomnini uZimakho, oCwengileko ka-Israyeli, umsindisakho. Ngakuhlawulela ngeGibhide, ngakwenana ngeKutjhe neSeba.

U-ISAYA 45:15

Mbala Zimu, Msindisi wakwa-Israyeli, wena unguZimu ozifihlako!

U-ISAYA 45:21

Yenisibikele, nibeke iinqiniseko; iye, hlanganisani iinhloko nithathe isiqunto: Ngubani kanti owabika lokho phambilini? Ngubani owakumemezela kade na? Akusimi lo, mina Somnini na? Kambe akakho omunye uZimu ngaphandle kwami; iye, uZimu olungileko nosindisako. Mbala, akakho omunye ngaphandle kwami.

U-ISAYA 49:26

Abakugandelelako ngizabenza bona bazidle ngamazinyo, badakwe ziingazi zabo inga badakwe yihleza yewayini. Yeke woke umuntu uzakwazi bonyana mina Somnini ngimsindisakho, umhlengakho, ongonamandla kaJakopo.”

U-ISAYA 60:16

Uzakumunya ibisi lezizwe, iye, ebeleni lobukhosi. Yeke uzakwazi bonyana mina, nginguSomnini, ngiMsindisakho, noMhlengakho ongonamandla kaJakopo.

U-ISAYA 63:8

Wathi: “Ngambala bababantu bami, babantwana abangeze baba mahlongandlebe.” Ngalokho waba msindisabo.

UHOSIYA 13:4

USomnini uthi: “NginguSomnini uZimakho kusukela emihleni yeGibhide. Akhange wazane nomunye uzimu ngaphandle kwami begodu azange kube nomunye umsindisi ngaphandle kwami.

ULUKASI 1:47

Ummoyami uyenama kuZimu uMsindisami

ULUKASI 2:11

Khona namhlanjesi ngemzini kaDavida nibelethelwe uMsindisi onguMesiya, iKosi!

IZENZO ZABAPOSTOLI 9:15

Kodwana iKosi yathi kuye: “Khamba ngombana nguye osisitja sami esikhethiweko sokuphatha ibizo lami ebantwini abatjhili, emakhosini nebantwini bakwa-Israyeli.

KWEBEROMA 1:1

Incwadi le ivela kimi mina Powula, inceku kaKrestu Jesu, owabizelwa ekubeni mpostoli, wahlukaniselwa ivangeli lakaZimu.

1 KWEBEKORINTE 1:1

UPowula obizelwe ekubeni mpostoli kaKrestu Jesu ngokwentando kaZimu kanye nomfowethu uSosithenesi,

1 KWEBEKORINTE 9:17

Nakube ngitjhumayela ngokuzithandela kwami, nginomvuzo; nakube angikwenzi ngokuzithandela, kutjho bona ngiphetha lokho engikuphathisiweko.

2 KWEBEKORINTE 1:1

Mina Powula umpostoli kaKrestu Jesu ngokwentando kaZimu, noThimothi umzalwana, silotjhisa ibandla lakaZimu eKorinte nabo boke abacwengileko abakilo loke le-Arhaya.

KWEBEGALATIYA 1:1

UPowula, ompostoli ongaveli ebantwini namkha ongakezi ngabantu kodwana ngoJesu Krestu noZimu uBaba, owavusa uJesu ekufeni,

KWEBEGALATIYA 1:11

Akhese nginitjele bazalwana bona ivangeli engilitjhumayelakweli akusiyinto ethonywe babantu.

KWEBEKOLOSE 1:27

UZimu waqunta bona kwazeke kibo bonyana umnono wephazimulo yefihlakalwakhe le mkhulu kangangani hlangana nabatjhili; ifihlakalo leyo inguKrestu okini nolithemba lephazimulo.

2 KWEBETHESALONIKA 2:16

Sengathi iKosethu uJesu Krestu ngokwayo noZimu uBaba wethu owasithandako bewathi ngesisa sakhe wasipha ukududuzeka okungapheliko kanye nethemba elihle,

1 UTHIMOTHI 1:12

Ngiyamthokoza uKrestu Jesu iKosethu owangipha amandla ngombana wangithemba wangibeka emsebenzinakhe,

1 UTHIMOTHI 2:3

Lokhu kuhle begodu kuyathandeka phambi kwakaZimu uMsindisi wethu,

1 UTHIMOTHI 2:7

Ngebanga lalokho ngakhethwa bona ngibe mtjhumayeli nompostoli. Ngikhuluma iqiniso, angileyi amala, iye, ngibe mfundisi wabatjhili ngokukholwa nangeqiniso.

1 UTHIMOTHI 4:10

Nje-ke ngalokho sisebenza kabudisi begodu siyatjhikatjhika ngombana sibeke ithemba lethu kuZimu ophilako oMsindisi wabo boke abantu, khulukhulu labo abakholwako.

UTITOSI 1:3

kwathi ngesikhathi esifaneleko wembula ilizwi lakhe ngokumemezela engaphathiswa khona ngomyalo kaZimu uMsindisi wethu.

UTITOSI 2:10

zingabebeli kodwana zikhombise ukuthembeka okupheleleko ukuze kuthi ezintweni zoke zihlobise ifundiso kaZimu uMsindisi wethu.

UTITOSI 2:13

Iye, lokho sikwenze nasilokhu sisalindele ithemba elibusisiweko nokwambulwa kwephazimulo kaZimethu omkhulu noMsindisi wethu uJesu Krestu,

UTITOSI 3:4

Kodwana lokha ukulunga nethando lakaZimu uMsindisethu nalibonakaliswako,

UTITOSI 3:6

othelwe phezu kwethu ngobunengi ngoJesu Krestu uMsindisi wethu

1 UPITROSI 1:21

Ngaye nakholwa kuZimu owamvusa kabafileko wamnikela iphazimulo ukuze ukukholwa nethemba lenu kudzimelele kuZimu.

1 UPITROSI 1:3

Akadunyiswe uZimu uYise weKosethu uJesu Krestu, owathi ngomusa wakhe omkhulu wasipha ukubelethwa kabutjha ethembeni eliphilako ngokuvuswa kwakaJesu Krestu kabafileko,

2 UPITROSI 1:1

USimoni Pitrosi oyinceku nompostoli kaJesu Krestu, kilabo abamukele ukukholwa okuligugu njengokwethu ngokulunga kwakaZimethu noMsindisi uJesu Krestu.

1 UJWANISI 4:14

Sibonile begodu siyafakaza bona uYise wathumela iNdodanakhe bona ibe Msindisi wephasi.

UJUDA 1:25

kuye uZimu oyedwa, uMsindisethu ngoJesu Krestu iKosethu, akube kuye iphazimulo, amandla nobukhosi, kusukela ekuthomeni nagadesi ngokungapheliko! Amen.