Nipadar 13:7 - Si Biblia NT

⁷ Inaburuyan yan kuntrawen nasara a tutawo nan Dios tan daegen nasara, tan binyan ya et nin pakayadi' nin mag'uray sa sarba nin puri, daya', sarita', tan nasyon.

Nipadar 13:7 Iomraidhean Croise

Lucas 4:6

tan wana kona ni Jesus, “Ibi ko komoy kayamanan tan pag'uuray sa sain ta sarban sain nibi kongko, ket maibi ko sa si'numan a rabay kon pamyan.

Juan 19:11

Konan siin inumbat ya si Jesus ket wana kona, “Kasa kumon nin pakayadi' mo kongko no kai na nin nibi nin Dios komo. Kanya' nin mas mabyat a kasalanan nan si nangipagamet kongko komo dyan sa kasalanan mo.”

Nipadar 10:11

Kayadi', main nin namarita' kongko a wana, “Matkap a mangipadles ka anamanaet nin maipa'ka' sa mangyadi' li' konran tutawo sa nagsikabarang a nasyon, sarita', tan konran uadi'.”

Nipadar 11:18

Saray kuntra komo ket pinasyan sager ra komo, bale' narate' ana a panaon nin ipa'kit mo a makapali'mo nin sager mo konra, tan say panaon a sintinsyawan mosara a nunati ana. Sawanin anan lamang a panaon a gun-gunawan mosaray uaripen mo a saray prupita mo tan saray tutawo mo. Sarayti ket mampangigalang sara komo, ata'gay o ayupa' sara man. Sawanin anan lamang a panaon a sidaen mosara a sarba ran nanida' nin tutawo sa sangkamundwan.”

Nipadar 11:7

Ket saytaw li' no nayadi' rayna nin nipatanda' a nipatandaan nan Dios konra, main li' nin makapali'mon ayep a umarwas itaw sa priswan nin ubot ket, labanan nasara. Ket talwen tan mapati nasara.

Nipadar 12:17

Sa sager nan dragon konan babayi, binringan nasaran kina' kinalaban a raruma et nin a'nak nan babayi a saray sarba ran mantumulok sa gan-gan nan Dios tan man'ipatanda' ra a maipa'ka' kona ni Jesus.

Nipadar 17:15

Nituloy nan anghil a wana kongko, “Saytaw say abaw nin uilog a na'kit mo nin tinekrean nan si pampam, i'deng a dudupong nin tutawo nin nagsikabarang a nasyon, daya' tan sarita'.

Nipadar 5:9

Ket kinantawan raya nin sayay ba'yon kanta a wanra: “Si'ka a maikana' nin mangalap konan linulon a kasuratan tan manglat nin silyo, bana' ta pinati ka, ket say daya' mo a nipambot mo konra nin tutawo ta pigaw nin ikon nasaraynan Dios nin mangibwat sa sarba nin puri, sarita', daya' tan nasyon.