Kooloosi 1:16 - Gooti Toolluro Yogalokwono

¹⁶ Kuudo neya jaullulo. Yiuwi'nokai noonyumwonyu ton Gooti tool gamoro Kwolaiyo su toollu'aro to'no sokwollosokagano. Sulugumdo tovi wo'dupudo togai'aro kwako akavi wo'dupudo togai'aro yiuwi'nokai sumdo wonodowado su tonyu sokwollosokagano. Aki sumdo mwonodowado noonyumwonyu ensel kworai kuruv sokwollosokaikono. Su tooravuro yovokwe toorogai'aro jurogudokwe toorogai'aro mido mollomwalokwe toorogai'aro aki aguto wimo'nodupudo toorogai'aro yiuwi'nokai su toorai Gooti tool gami Kwolaiyo toollu'aro to'no sokwollosokarogano. Toro te Gooti toolluro yiuwi'nokai sokwollosoka su ton gami Kwolaiyo toollo'mo sokwollubweyokagano.

Kooloosi 1:16 Iomraidhean Croise

Joon 1:10

Toro toollu'aro Gooti tool kwako akavi sokwollosokaikono. Toro tool gavnokweyolluro kwako sokwollosoka akavino abokaikono. Toro aboka kwollu kuruv a'mwo abolo kwako akavi mwalodupudo ton miworovomaropekono.

Joon 1:3

Aki yiuwi'nokai noonyumwonyu tonyu sokwollosoka tool kwekono. Noonyumwonyu sokwollosoka su ton yasuwa'no mimo'nopogano. Toro kuvi kuruv yiuwi'nokai me'no sumo'nopo su ton yiuno gavnokwe toolluro sokwollosoka tovida'ai sumo'nopogano.

Room 11:36

Kuudo neya jaullulo. Gooti su tool muudu'nodo toga yiuwi'nokai noonyumwonyu tonyu yokwolloso'no gavnokwe tool mollomwalodowodogano. Toro sokwollosoka toolluno tov yovo aguto neya ma'mwalono'moneyokwekono. Toro te ne kunol kuruv gamino yovo tov yiunokuudo neya ilomoropimwolowanekono. Nebal'nodokwono.

Room 8:38

Gooti toolluro kalo buuropino nekullunodowodo su tovino nuu kuudo me'no youroma'dumdonyugono. Toro te nuu kuudo noullo maullo miyau'dum aro tovino guureji gudopola'dumdonyugono. Gooti toolluro nemino kalo buuropino winodowodo su tovi noonyumwonyu pworo ku'nono mamolloru'mdovonekwapipinorogano. Nobollo'mo tokwe'aro aiyo mwallo'mo tokwe'aro toval ku'nonodo'movalmaiyo. Aki ensel toorogai'aro kuullo ma'no ma'nodo toorogai'aro noonyumwonyu jurogudokwe toorogai'aro kworo kuruv ku'nonodo'moromaiyo. Aki aga baneki'mo'mdupudo toorogai'aro lukomgu nobaneki'mopino toorogai'aro kworo kuruv ku'nonodo'moromaiyo.

Room 9:5

Aki Isuraiyolda'ai su ton kemi kwikweyago kuunodo Eburaiyameke Aisakeke Jekoopeke tooraida'ai imo'nugelabodupudogano. Aki Krais gavnokwe kwol kuruv kwako akavida'ai a'mwo pwolbusuko imo'nyo'moneyokwe tov Isuraiyolda'ai su tonyuro iko tovasuda'ai abwollumo'nokaikono. Krais su tool Gooti kuunodekono. Aki toro tool yiuwi'nokai tonyu mido aguto mollomwalodowodekono. Toro toolluno yovo tov yiuwi'nokai toga neya ilomoropimwolowanekono. Kuuguudo akav yiuno nebal'nodokwono.

1 Koorin 8:6

Toro kuvi kuruv nevno'gwowi aro kuudo yaullokwenogano. Oo Nellunumiyago Gooti tool yiuno pwolnodekono. Nemi Gooti pwolnodo su tool yiuwi'nokai tonyu yokwollosuno sumaiyokwe aki yiuwi'nokai su tonyu jukwo wimo'nodowodekono. Toro toolluno yovo tov nevu ilomoropiyo'moneyokwe yomjomwekovla'mdowadonogano. Aki nemi Aguto tool yiuno pwolnodekono. Su tool Jisas Kraisol kwekono. Nemi Aguto su toollu'aro Gooti tool yiuwi'nokai tonyu sokwollosokaikono. Aki toro toollu'aro Gooti tool nemi aiyo nekullaboduke tokwe yomjomwekovla'mdowadonogano. Kuudo yaullokwenogano.

Efesos 1:10

Gooti toolluro womdo sugudo yo'mo winodowodo su tov arokwono. Gooti tool gamoro muunyu kai'muuda'ai sokwollosoka togai'aro aki kwako akavida'ai sokwollosoka kugai'aro yiuwi'nokai tonyu avalo puru mollu'bworosowo'ji Krais toollu dolago tomuu wollo'moneyokwe me'no adomduukuurosokaikono. Gooti toolluro adomduukuurosoka su tov gavnokweyolluro me'no ajesungiko toga kuvinono nyonekono.

Efesos 6:12

Kevu kuudo neya jaullulo. Nemi ikomago toorogai molo mujumovla'mdowado su tov nebal'no kulako tokwe yodowado'maiyo. Toro kuvi kuruv kwako akavuro dugumwuulo tomuuda'ai kuullo ma'no ma'nodo toorogai ingovla'mdowadokwono. Kuullo ma'no ma'nodo su toorai nevu sumdo mwonodowado kuvi kuruv kworogai molo ingovla'mdowadonogano. Kuullo ma'no ma'nodo su tooravuro pworo kwako akavi mido mollomwalokwe imo'nodupudorogano. Aki pworo yovo agutokwe imo'nodupudorogano. Aki pworo jurogudo kuunodokwe imo'nodupudorogano. Kuullo ma'no ma'no sulugumdo tovi muunyu tomuu mwalodupudo su toorogai molo ingovla'mdowadonogano.

Filipai 2:10

Aki Gooti tool Jisasolluno yovo tovi muunyu toru'aro sulomoropiyoka su tov aro tovinokwono. Yiuwi'nokai sulugumdo muunyu akai'muuda'ai mwalodupudo togai'aro aki kwako akavi mwalodupudo togai'aro aki kwako akavi dolago tomuu mwalodupudo togai'aro yiuwi'nokai ton Jisasolluno yovo su tovi kwako tomuu'aro wipureyokwe suduko neya winuguto'numwalpino tovinokwono.

Kooloosi 1:15

Nevu Gooti toollu mwonodowadekono. Toro kuvi kuruv gamoro Kwolaiyo toolno'gwowi gami Ganumiyago toolluno irol'mowosunodekono. Kwolaiyo su tool nekuduuwalloduke tovi'aro gami Ganumiyago Gooti toolluno kuu'maiyo toru'no bomollolupto'nanekubweyodowodekono. Kwolaiyo su tool yiuwi'nokai Gooti toolluro sokwollosoka tonyuro sumdomguda'aiyekono.

Kooloosi 1:20

Aki Gooti su tool yiuwi'nokai kwako akavi mwalodupudo togai'aro sulugumdo tovi mwalodupudo togai'aro yiuwi'nokai su tonyu gami wobo toru aki aiko te momgurowoso'mo winyokwekono. Toro tool gami Kwolaiyo toolluro mujako tov i'noguropte tovi abwoloka su tovi'aro sumwoluko noullo me'no wosunodowodekono. Gooti tool su toro tomgu'aro yiuwi'nokai tonyu gami wobo toru aki aiko te kuvinono momgurowosokwekono.

Kooloosi 2:10

Aki kevu Krais toollu me'no uuguro'mwonyodupudo kugaikullu kuruv Gooti su tool aiyowomno kuullo'movaikwopiyodowodekono. Krais tool yiuwi'nokai jurogudo imo'nodupudo toorai midekono. Krais su tool kuullo mido mollomwalokwe toorogai'aro kuullo yovo agutokwe toorogai'aro su toorai aguto wimo'nodowo mido momjomwekovla'mdowodekono.

Kooloosi 2:15

Toro te Gooti tool Krais toollu aromiyoguroptowosoka su tovi'aro kuullo ma'no ma'nodo tooravuro mido mollomwalokwe toorogai'aro jurogudokwe toorogai'aro toorai me'no kuuwolovokaikono. Toro uuwoleno sumaiyokwe kemoro jurogudo tonyu yiunokuudo ipolomaro'no yiuwi'nokai su toorai kuu'maiyo toru wogulo suwo'galokaikono. Su toro tomgu'aro Gooti tool gamoro kuuwolovoka tovino yiuwi'nokai a'mwo abolo tonyu me'no kuuduuwallokaikono.

Hibruu 1:2

Toro kuvi kuruv agasuro iruko aiyowo'mo akaga'no'gwowi Gooti tool gami Kwolaiyo toollu'aro me'no anekujungikekono. Gooti toolluro yiuwi'nokai noonyumwonyu tonyu mallo'moneyokwe tov gami Kwolaiyo toollu me'no ajesokaikono. Aki Gooti tool gami Kwolaiyo su toollu'aro yiuwi'nokai kwako akavi sokwollosokaikono.

Hibruu 2:10

Gooti tool yiuwi'nokai ton gamiyo'mo sokwollosokagano. Aki yiuwi'nokai ton yiuno Gooti toolluro ato tovida'ai to'no sumo'nopogano. Gooti su tool gamoro kwoloraiyo kwimo'nupi bwotonyago tobuurai gamoro ago muunyu kai'muuno mokaillo'moneyokwe kwinokaikono. Toro tobuurai ma'no ma'nodo tovuro kirumwallo tovida'ai bomollurolovomokalokwiyo'moneyokwe Jisasol dado ibwosunoduke toga Gooti tool wonyapino to'no sokaikono. Jisasol dado subwosunoka su tovi'aro mollurolovomokalokwiyo'mo womdo su tov amolludovokaikono. Toro te a'mwo abolo tobuurai kuvinono bomollurolovomokalokwono su tool yiuno dado subwosunoka Jisasol kwol kuunogano. Gooti toolluro kwinyajuko su tovi Jisasol kuvinono sopiyokaikono.

1 Pita 3:22

Aki Jisas Kraisol Gooti toolluro ago muunyu kai'muuno me'no ilomwalno sumaiyokwe Gooti toolluro anato toru mwalo'no mido mollomwalokwe imo'nodowodekono. Toro toolluro mido mollomwalo tovi dolago tomuu yiuwi'nokai ensel toorogai'aro kuullo mido mollomwalokwe toorogai'aro kuullo jurogudokwe toorogai'aro tooro kuulomwalodupudorogano.