Toro kuudoka tovi ensel tool aro aduumjukurokaikono. “Kwolaiyo su tool kaiyako puru'monodo kuruv nomaro'jo. Aki toro toollu guu maromiyosubinono.” Aduumjukurokaikono. Toro duumjuku'no sumaiyokwe kuudokaikono. “Guu kwolaiyo pwolnodokwe tooku gumi kwolaiyo su toolluno kalo nokwo amamwonyo'bujukekugono. Toro kweku kuruv aga noromiyo'mo yodore tookuji gwonodum kuudo saguu'mekugono. Oo akal yiuwi'nokai toga Gooti toollu uumjunodowodoldeyo. Kuudo saguu'mekugono.” Gooti Yawelluro ensel tool toro kuudokaikono.
Joon 3:16 - Gooti Toolluro Yogalokwono16 Gooti tool yiuwi'nokai a'mwo abolo kwako akavi mwalodupudo tonyuno kalo buuropino winodowodekono. Toro tovino tov gami Kwolaiyo pwolnodo toonyu amonuwopiyabokanyugono. Toro amonuwopiyaboka su toonyuno yiuwi'nokai a'mwo abolo kuudo anubwepi ton yiunokuudo mabolopipinogano. Toro kun kuruv aiyo yiunokuudo mujomwekovlaiyo'moneyokwe tov nomapinogano. Faic an caibideil |
Joon 3:16
28 Iomraidhean Croise
Toro kuudoka tovi Gooti tool kuudokaikono. “Guu kwolaiyo yiuno Aisakolnodokwekugono. Toro toolluno kalo buuropino gujunodowodo su toollu guu momworaro'bi Mooraiyo tomuuno domokavlavono. Toro mokavlavo'bi muumuudo aguduuwallumi pwollu muunyu toru sulo tokwe nyuroudapiyo'mo dukwagupto puruv luvagilovo'bi gumoro kwolaiyo su toollu miyo'mo doromiroudapiyono.” Kuudokaikono.
Neya duu'nyulo. Kwolaiyo pwol nemiyo'moneyokwe me'no sonekumarokaikono. Kwolaiyo su tool Gooti toolluro nemi anekullabokaikono. Aki toro tool a'mwo aguto kig imo'nowo'ji nemi mido mollonekumwalmwalonekono. Toro toolluno yovo go'no go'no aro ton dumwalpinekono. Yovo puruv arokwono. Sobanyo Mollodaiyo'mo Sugudo Kuunodolekono. Puruv Gooti Jurogudo Kuunodolekono. Puruv Yiuwi'nokai Toga Aiyo Yiunokuudo Mujomwekovlaiyokwe Tovi Ganumiyagolekono. Puruv Sumwoluko Kavo Wosunyo'moneyokwe Aguto Kigolekono. Yovo su toro togai wuudumwalpinekono.
Jisasol Farasi toorai toro wuujuno sumaiyokwe aki aro kuudokaikono. “Kevu Gooti toolluro yogalo puvino kavlo tov neya jouromallulo. Yogalo su tov aro sakwollungikokwono. Nuu kemoro yasuwa'no romiroudapiyodupudo tonyuno ilaiyo manyunodowodonyugono. Toro kuvi kuruv kevu a'mwo abolo pubuuraino kalo mamwonyo'moneyokwe su to'gwowi nuu ilaiyo nyunodowodonyugono. Su toro sakwollungikokwono. Toro te neya duu'nyulo. Nuvu a'mwo pworo, Sugudonoldeyo, adupi tooraiyomno abonyumaiyo. Toro kwonyu kuruv a'mwo, Ma'no ma'no yodowadonoldeyo, adupi tooraino'gwowi miyomno domallo'moneyokwe abonyugono.” Kuudokaikono.
Toruda'ai womdo tovi jukwo tool nomorapiyo'mo tov yiuno pwolno sugullokaikono. Toro sugulloka su tool gamoro kwolaiyo kalo buuropino winodowodo tookono. Toro toolluno aro kuudo saurokaikono. Moro kwolaiyo kuunodo akalluno'gwowi amorapimi toollu a'mwo tooro kwako tomuu'aro wiyopi gamoro yogalo tovi neya wuu'nupinekono. Saurokaikono. Toro kuudo yau'no sumaiyokwe amorapiyokaikono.
Aki Yogalo su tool a'mwo kulakokwe sumo'nokaikono. Toro imo'nyuno sumaiyokwe nemi akuuto toru abwolomwalokaikono. Toro toollu Gooti toolluro yasuwa'wino sugumaluko tokwe'aro nebaikuuguudo tokwe'aro toval aiyowomno kuullo'mowopiyodowodekono. Aki toro tool Gooti Ganumiyago toolluro Kwolaiyo pwolnodo tookono. Toro toolluro jurogudo kuunodo tovi nevu me'no kwonowekono.
Toro te a'mwo pwol Gooti toolluro Kwolaiyo toonyuno kuudo anubweyo'ji tool kooti yogalo tovida'ai kirumwallo tov mamaronekono. Toro kuvi kuruv yiuwi'nokai a'mwo abolo mino kuudo manubwepi tono'gwowi kooti yogalo tovida'ai kirumwallo tov me'no ma'dupudogano. Su tov aro tovinokwono. Gooti toolluro Kwolaiyo pwolnodo toonyuno yovo tovi kuudo muubweyodupudo tovinokwono.
Toro te a'mwo pwol Gooti toolluro Kwolaiyo su toolluno kuudo kuubweyo'ji tov aiyo yiunokuudo mujomwekovla'mwalonekono. Toro kuvi kuruv a'mwo pwol Kwolaiyo su toolluro yogalo tovi kisuvolo so'ji toolno'gwowi aiyo yiunokuudo mujomwekovlaiyo'moneyokwe tov mamaronekono. Yiuno Gooti toolluro suroulo to'no maronekono.”
Aki Nyunumiyago toolluro ilaiyo winodowodo tov aro tovinokwono. Yiuwi'nokai a'mwo abolo pwolno puru'monodo ton gamoro Kwolaiyo toonyu nuwonopi kuudo anubwepi tov aiyo yiunokuudo mujomwekovlaiyo'moneyokwe tov nomapinogano. Aki toro tonyu aiyowo'mo toga nuvu aiyo aiko te nomoduka'monyugono.” Kuudokaikono.
Aki nevu Gooti toolluro ikomago kwimo'nyajuuwo kunol kuruv gamoro Kwolaiyo toolluro aboloka tovida'ai Gooti tool nemi amomgurovanekubweyokaikono. Toro amomgurovanekubweyoka tovida'ai nevu gamoro ibwoto'nyo wimo'nodowadonogano. Toro tovino tov aro nonekullumo'nononogano. Jisasol aiko te me'no dukavo'no aiyo mwallokwekono. Nevu toro tooke aiyo mwalodowado tovino tov Gooti toolluro kirumwallo tovi nobirolo'nugolokwanonogano.
Aki Gooti tool gamoro Kwolaiyo toolluno danyu'nyuwuulo nyubwosuno'jokwe muumjukurokaikono. Toro kwol kuruv nevu yiuwi'nokai tonollu nonekullo'mwojo'moneyokwe gamoro Kwolaiyo su toollu kuvinono kwolomonekwopiyabokaikono. Toro to'busuko kubalno yiuwi'nokai yasuwa'no nonekullabiyo'moneyokwe dodowodo kun kuruv kuvinono nonekullabwonekono.
Nevu nemi ma'no ma'nodo tooraida'ai me'no abollunguuwo tonolbusuko sumo'nyajuuwonogano. Toro kubuuronollu kuruv Gooti tool nemino kalo manekumwonyodowodekono. Aki gamoro kalo buuropino aguto kuunodo tokwe nemino winodowodekono. Toro toolluno tov Krais toollu aiyo aiko te amodukavoka toga nevu me'no abollunguuwo kunollu kuruv kweke aval'no amonekudukavokaikono. Kuudo neya jaullulo. Gooti tool yiuno gavnokweyolluro yasuwa'wino sugumaluko ikullabodowodo tovi'aro kemi kirumwallo tovida'ai kuvinono abomollurolovekumokalokwokaikono.
Nemi Nellunumiyago Gooti tool kevuge'aro ne kwonogai'aro tonolluno kalo buuropino winodowodekono. Toro tool gamoro yasuwa'wino sugumaluko nemi nekullabodowodo tovida'ai aro toval nonekullumo'nodubulovakono. Puruv jurogudo yiunokuudo danekullumwojodowodekono. Aki puruv aro kuudo youroma'dowadonogano. Gamoro yiuwi'nokai sugudo nonekullabwono tollovai kuvinono nomaranonoldeyo. Kuudo youroma'dowadonogano. Toro kuudo yaurowa'ji sogwollo to'no kinodowadonogano. Toro te Gooti tooke'aro nemi Aguto Jisas Krais gavnokweke'aro tooral kemi nokwo ikullo'mwojubullunorakono.
Toro mwonmwakuuwo kunol kuruv me'no wonodowado toolluno yovo to'gwowi Jisasolekono. Toro toollu Gooti tool malluno sumaiyokwe ensel toorai kwako tomuu'aro kwolomorumwallokaikono. Toro wolomorumwalloduke tovino tov Jisasol kula'nyo toga'gwo ensel toorai kwako tomuu'aro suwapiyokaikono. Su tov aro tovinokwono. Gooti toolluro yasuwa'wino sugumaluko su tovi'aro Jisasol yiuwi'nokai a'mwo abolo tonolluro kirumwallo tovi aiko toru mallo'moneyokwe abolokaikono. Toro tool nemiyo'moneyokwe bolnodo tovuro dado tov me'no subwosunoka tovino tov aga'no'gwowi Gooti tool Jisasollu muunyu toru'aro me'no ilomorumwallodowodekono. Toro ilomorumwallodowodo su tool Gooti toolluro jurogudo tovuro bako tov pwopiyowodekono. Aki toro toollu Gooti tool yovo aguto wiyodowodekono.
Neya duu'nyulo. Nemi Nellunumiyago Gooti tool nemino kalo buuropino winodowodekono. Toro winodowodo su tov bwotonyokwono. Aga'no'gwowi Gooti tool nemino tov, “Oo moro kwoloraiyo tobuurogano,” nekudodowodo su tov aguto kuunodokwono. Toro te nevu gamoro kwoloraiyo kuvinono wimo'nodowadonogano. Toro kuvi kuruv kwako akavida'ai a'mwo abolo tono'gwowi nemino tov, Oo su ton Gooti toolluro kwoloraiyodeyo, kuudo miworovonekuma'dupudonogano. A'mwo abolo su ton Gooti toolluno kuudo kuunodo miyouroma'dupudo tovino tov nevu gamoro kwoloraiyo kunolluno kuruv kuudo miworovonekuma'dupudonogano.
Aki Jisas Krais kwol kuruv gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval kemi nokwo ikubwemwalonekono. Jisas Kraisol Gooti toolluno kuu'maiyo toru'no pi'mwono dodoluwosodowodekono. Aki Jisas Kraisol yiuwi'nokai me'no bolodupudo tooravuro aiyo aiko te dukaiyo'moneyokwe tov kwolda'ai amollubworosokaikono. Toro tool yiuwi'nokai kwako akavida'ai a'mwo aguto kig mido mollomwalokwe tooravuro Agutekono. Jisas Kraisol nemino kalo buuropino winyuno sumaiyokwe gamoro mujako abwoloka tokwe nemi ma'no ma'no pasudo tonyuda'ai me'no abomollurolovonekumokalokwokaikono.
Sanasan