Toro tekwo a'mwo abolo bwotonyago ton sugudo imo'nupino'moneyokwe kemoro ma'no ma'nodo tonyuro jul'nyo tov maro'no danyu'nyuwuulo tov subwosunokaikono. Toro ibwosunoduke toollu Gooti Yawel wono'no adokaikono. “Moro a'mwo womdokwe su tekwojuno ilaiyo yodum a'mwo abolo ma'no ma'nodokwe tonyuno surodo nuunodowodo tov dugoga anyulmaiyo.” Adokaikono. Toro te a'mwo womdokwe yiuno sugudo to'nodo su tekwo a'mwo abolo tonyu sugudo wimo'nodowo'jure tovi wonowo'ji kuudo youromaronekono. Oo moro danyu'nyuwuulo amaro tov yasuwa'nodo'maiyo. Kuudo youromarowo'ji ilaiyo nokwo yomjomwekovla'mwalonekono.
Joon 17:3 - Gooti Toolluro Yogalokwono3 Aiyo yiunokuudo mujomwekovlaiyo'moneyokwe su tov aro tovinokwono. A'mwo abolo ton guu Gooti nebal'no pwolnodo tookuge'aro gumoro amonuwopiyabodo Jisas Kraisonyuge'aro toonalluno kuudo souronakumapi tov aiyo yiunokuudo mujomwekovla'mwalpinogano. Su toro tovinokwono. Faic an caibideil |
Joon 17:3
52 Iomraidhean Croise
Toro molludapino sumaiyokwe aro kuudokaikono. “A'mwo pwol kwoloraiyo akabuuraibusuko puvi mino yovo tovida'ai ilaiyo amollomaro'ji su tool nuu kwonyuda'ai ilaiyo amollunuma'mwallo. Aki a'mwo pwol mi ilaiyo amollunumaro'ji su tool mi kwolomonuwopiyaboka kwolluda'ai ilaiyo amolloma'mwallo. Su tov aro tovinokwono. Kemida'ai a'mwo pweku yiuwi'nokai a'mwo abolo punyu aiyowo'mo abwollumo'nabi su tooku a'mwo aguto kuunodo imo'nubinekugono.” Kuudokaikono.
Aki moro Nyunumiyago su tool gavnokwelluro womdo tovi yo'moneyokwe mi janubweno sumaiyokwe kwako akavi kwolomonuwopiyabokanyugono. Toro tovino tov nuu, “Gooti toolluro Kwolaiyonyugono,” aikudumi toga kevu mi aro nonyudumwalpiyo. “Guu Gooti toolluno kaiya'no yogalo abwolomorumwogapimwolano,” nonyudumwalpiyo.
Toro kuvi kuruv lukomgu mi Nyunumiyago tool gamoro Kuullo toolluno'gwowi kemi sobanyo mollekudaiyo'moneyokwe nomekwopiyabwonekono. Kuullo su tool moro yovo tovuro jurogudo tokwe bowo'ji yiuwi'nokai tonyuno yodekubwasumwalonekono. Aki moro yiuwi'nokai kuuguudo yodekubwosumelabodumdo tonyuno aki aiko te kuudo you'movlapino'moneyokwe ikullo'mwojumwalonekono.
Aki su toro agudumwako tov aro tovino'mokwono. Guu Nyunumiyago tooku mi me'no nuguro'mwonyodumdekugono. Aki nuu kwonyu kuruv gumi me'no guguro'mwonyodumdonyugono. Toro te navu puru'mono imo'nodowolo to'busuko kubalno yiuwi'nokai a'mwo abolo judo'no judo'no kuudo kuubwepi su to kubuuro kuruv yiuno puru'mono neya imo'numwalpino'moneyokwe tovino agudumwakono. Aki a'mwo abolo su ton nami nokwo nakuguro'mwonyumwalpinogano. Su tov aro tovinokwono. Yiuwi'nokai a'mwo abolo kwako akavi mwalodupudo ton aro kuudo neya uubwepino'moneyokweyokwono. Oo guu Gooti tooku mi amonuwopiyabodekugono. Su toro tovino kuudo neya uubwepino'moneyokweyokwono.
Nuu a'mwo abolo su tonyu uuguro'mwonyugovlavo'mi aki guu kweku kuruv numi nuguro'mwonyugovla'binekugono. Su tov aro tovino'mokwono. Yiuwi'nokai a'mwo abolo kuudo kuubwepi su ton yiuno puru'monodo to'no pi'mwono neya imo'nugovla'mwalpinogano. Toro imo'nugovla'mdopure tonyu yiuwi'nokai kwako akavida'ai a'mwo abolo ton wonopi mino aro kuudo youronumapinogano. Oo akal Gooti toolluro amonekwopiyabokaldeyo. Su toro tovino kuudo youronumapinogano. Aki guvu mino kalo buuropino gujunodowodo to'busuko kubalno guu a'mwo abolo su to kunyuno kuruv kalo buuropino aval'no gujunodowodekugono. Su to kuvino kuruv kuudo nokwo youromapinogano.
Oo mi Nyunumiyago idopto'nodoloo, kwako akavida'ai a'mwo abolo ton gumino kuudo miyouroguma'dupudogano. Toro kuvi kuruv nuvno'gwowi gumino kuudo me'no yaguu'dumdonyugono. Aki moro a'mwo abolo aka kubuuro kuruv mino tov aro kuudo youronuma'dupudogano. Oo su tool Gooti toolluro amonekwopiyabokaldeyo. Kuudo youronuma'dupudogano.
Su tov aro tovinokwono. Nuvu gumoro yogalo anyabodo ton me'no kwiyonyugono. Yogalo kwiyo su tonyu me'no ma'dupu mino aro kuudo souronuma'mwakopogano. Oo su tool Gooti toolluda'ai nebal'no kwolabokaldeyo. Kuudo souronuma'mwakopogano. Aki toro ton mino tov aro kuudo kuubwemwakopogano. Oo Gooti toolluro amonekwopiyabokaldeyo. Kuudo kuubwemwakopogano.
Kuudo neya jaullulo. Gooti tool gamoro amoropiyaboka su toollu gamoro Kuullo tool yiuno pwekwono to'no mwiyodowodekono. Toro kuvi kuruv aiyowomno kuullo'mowopiyo'moneyokwe yiunokuudo wiyopiyodowodekono. Toro tovino tov Gooti toolluro amoropiyaboka su tool Gooti toolluro yogalo tonyuno to'no jokwekono.
Aki kevu mino kuudo manubweyodupudogaikikono. Su tov aro tovinokwono. Kevu Gooti pwolnodo toolluro yovo aguto ikullabiyo'moneyokwe tovi mallo'moneyokwe tov biyolo to'no ikuu'nodowodogaikikono. Toro kuvi kuruv a'mwo abolo punyuro kemi yovo aguto ikullabodopure tovi mallo'mo to'gwowi ilaiyo yodupudogaikikono. Toro tovino tov kevu mino kuudo manubweyodupudogaikikono.
Moro Nyunumiyago amonuwopiyaboka tool yiuwi'nokai tonyu aiyo wiyokwekono. Toro te nuvu aiyo mwallo'moneyokwe jurogudo tov mi Nyunumiyago su to kwolluda'ai aiyo mwalodumdonyugono. Su toro to'busuko kubalno yiuwi'nokai a'mwo abolo moro kulako tovi anpi ton moro aiyo mwallo'mo jurogudo uubweyodo'mure tovida'ai aiyo yiunokuudo mujomwekovla'mwalpinogano.
Toro kuudoka tovi aro kuudoganoporogano. “Gumi Junumiyago tool gadomuu domwallo?” Toro kuudoganopo tovi Jisasol kuudokaikono. “Kevu numino kuudo miyouronuma'mwakopo tovino tov moro Nyunumiyago kwolluno kuruv kuudo miyouroma'dupudorekikono. Kevu mino kuudo souronumaropujuko'mno'juki moro Nyunumiyago kwolluno kuruv kuudo nokwo souromaropujukorekikono.” Kuudokaikono.
Toro te kuunano gooti pworai ilomoropiyo'moneyokwe ibesa'aiyo aromiroudapingiko su tonyu nodupudo tovino aro ikudumo'mokwono. Nevu kuudokwe tonol aro me'no youroma'dowadonogano. Oo kuunano gooti su tooro kuunodoromaiyo. Gooti kuunodo toolno'gwowi bwotonyagolmaiyo. Yiuno pwolnodekono. Nevu su toro kuudo me'no youroma'dowado tonol kuunano gooti toorai ilomoropiyo'moneyokwe ibesa'aiyo aromiroudapingiko su tonyu ana'ji tov ma'no ma'nodo'maiyo.
Kuudo neya jaullulo. Gooti tool aro me'no adokaikono. “Dugumwuulo tomuuda'ai bako tov imo'nono.” Toro adoka Gooti su tool nemoro poowokalago tonyu Jisas Kraisolluro bako tov me'no anekuuwokaikono. Gooti toolluro bako bwotonyo su tov Jisas Kraisolluro sumdomago tovi'aro nevu me'no wonoma'dowadonogano. Toro te bako su tov nemoro poowokalago tonyu anakuuto tomuu me'no pwopiyodowodokwono.
Toro te nuu Krais toolluno kuudo youromallo'moneyokwe nyunodowodonyugono. Aki jurogudo puvino kuudo youromallo'mo nyunodowodonyugono. Jurogudo su tov Krais toollu aiyo aiko te me'no amodukavokakwono. Aki Krais toolluro tagunyo amallajuko to'busuko kubalno nuu kwonyu kuruv tagunyo aval'nodo ton mallo'mo nyunodowodonyugono. Aki Krais tool aboloka to'busuko kubalno nuu kwonyu kuruv aval'no bollo'mo nyunodowodonyugono.
Nebalokwono. Yiuwi'nokai kwako akavida'ai ton aguto manyumo'nodupudogano. Nuu mi Aguto Krais Jisasolluno kuudo youroma'dumdo su to'gwowi aguto kuunodo nyumo'nodowodokwono. Toro toonyu Krais toollu uumjunyo'mo nyunodowodo tovino tov yiuwi'nokai kwako akavida'ai tonyu wuugollu'mo'mdumdonyugono. Aki aga'no'gwowi noonyumwonyu kwako akavida'ai su ton yaiyo tonbusuko nyumo'nodupudo tonyuno tov yiuno biyolsumdo to'no uu'mwojodumdonyugono. Su tov aro tovinokwono. Nuu Krais toollu guureji gudupolallo'moneyokwe to'no nyunodowodonyugono.
Toro kuvi kuruv a'mwo abolo su tono'gwowi kevu nemi ilaiyo amollonekumaropo togaikulluno kuuguudo me'no junodupudogano. Aki kevu kuunano gooti toorai buulo uugunyumopino sumaveyokwe Gooti kuunodo toollomno bo'mno gamoro womdo wimovla'mdopure kuvino kuruv me'no yajunodupudogano. Gooti kuunodo su tool aiyo mujomwekovla'mdowodekono.
Krais toolluro mi a'mwo abolo avalobuuravoo, muunyu kai'muuda'ai mwalodowodo Gooti tool mi adonumaroka to'busuko kubalno kevu gavnokweyolluro a'mwo abolo kugaikullu kuruv aval'no me'no dekuma'dowodekono. Kevu Jisasolluno kuudo neya jaurogaulo. Su tool Gooti toolluro yogalo tokwe kuurotokwe imo'nodowodekono. Aki toro tool nemi pris aguto nonekullumo'nodowodekono. Aki toro toolluno kuudo uubweyodowado tonol gamino kuu'maiyo toru'no dodowiyoku'bworosodowadekono.
Oo nuu kemino tov aro nyunodowodonyugono. Kevu Gooti tooke'aro nemi Aguto Jisaseke'aro tooralluno kuudo bwotonyo nyouromo'movla'mwalpinogaikikono. Toro souromo'movlapi tovi'aro Gooti tool gamoro yasuwa'wino sugumaluko tokwe'aro sumwoluko kavo wosungovla'mwalpino tokwe'aro kemi guureji nokwo ikubwemwalonekono. Nuu kemino tov su toro nyunodowodonyugono.
Krais Jisasol Gootekono. Gooti imo'nodowodo su toolluro jurogudo tov nekullabodowodekono. Jurogudo su tovi'aro gavnokweyolluro sugupasudo tokwe'aro aiyo mujomwekovlaiyo'moneyokwe tokwe'aro toval nemi me'no anekullabokaikono. Nemoro yiuwi'nokai supto yodowado su ton me'no anekullabokaikono. Nevu kwolluno kuudo me'no youroma'dowado tovino tov su toro anekullabokaikono. Aki toro tool gamoro jurogudo bwotonyo tokwe'aro gamoro pasudo sugumaluko tokwe'aro tovake gamiyomno adonekumarokaikono.
A'mwo abolo tonyuro poowokalago tonyu aiyo mujomwekovlaiyo'moneyokwe wiyodowodo su tool kuu'maiyo toru'no me'no abiyalo'nokaikono. Toro biyalo'noduke toga nevnokwe toonol me'no kwonowekono. Aki toro kwonowo tovino kuu'maiyo toru'no dodoluwosodowadonogano. Aki aga nevu aiyo yiunokuudo mujomwekovlaiyo'moneyokwe tov nekullabodowodo su toolluno kemi modekumollodowadonogano. Su tool gami Ganumiyago tooke amwallajuko kwol kuruv nemi kuu'maiyo toru'no abiyanekulo'nokaikono.
Toro biyanekulo'noduke toollu nevu me'no kwonowekono. Aki gamoro yogalo moruudoduke kuvi kuruv nevu me'no kuu'nowekono. Toro te kevu nevuge aval'no ibwoto'nomwekovla'mwalano'moneyokwe nevu me'no kwonyajuuwo togai'aro me'no kuu'nyajuuwo togai'aro su tonyuno kemi sodekubwasumwakuuwono. Aki nevu Gooti Ganumiyago tooke'aro gamoro Kwolaiyo Jisas Kraiseke'aro toorake kuvinono me'no ibwoto'nomwalodowadorakono.
Yiuwi'nokai a'mwo abolo Gooti toolluro Kwolaiyo toollu buulo uuguunyumopiyodupudo su ton gami Ganumiyago Gooti kwollu kuruv buulo me'no uugunyumopiyodupudogano. Toro kuvi kuruv a'mwo abolo puno'gwowi Gooti toolluro Kwolaiyo toolluno kuu'maiyo toru'no aro dodowiyoku'bworosupinogano. “Oo Jisasol Gooti toolluro Kwolaiyo tool kwoldeyo.” Yiuwi'nokai toro adodowiyoku'bworosupi su ton Ganumiyago Gooti kwolluno kuruv kuu'maiyo toru'no dodowiyoku'bworosupinogano.
Toro kuvi kuruv nev tonolno'gwowi Gooti toolluronogano. Aki nemoro yogalo moruudodowa'jure tovi yiuwi'nokai a'mwo abolo Gooti toolluno kuudo youroma'dupudo ton kaduko nekuu'nodupudogano. Nevu su toro tonyuno aro iworovomallokwenogano. Oo Kuullo kuuluumwalodowodo tool nebal'nodoldeyo, iworovomallokwenogano. Toro kuvi kuruv Gooti toolluro a'mwo abolo mwimo'nodupudo tono'gwowi nemoro yogalo moruudodowa'jure tovi kaduko manekuu'nodupudogano. Toro manekuu'nodupudo su tovi'aro nevu aro iworovomallokwenogano. Oo kuullo kuunano youkuu'najokwe tool a'mwo abolo su tonyu kuuluumwalodowodoldeyo. Su toro tovi'aro iworovomallokwenogano.
Aki nevu aro tovino kuudo me'no youroma'dowadonogano. Gooti toolluro Kwolaiyo tool kwako akavi me'no abwolomwalokaikono. Toro bwolomwalno sumaiyokwe Gooti kuunodo su tool gavnokweyolluno kuudo youromallo'moneyokwe tov nemi me'no anekullabokaikono. Toro te nevu Gooti kuunodo su toolluro Kwolaiyo Jisas Kraisollu uuguro'mwonyodowadonogano. Jisas Krais su tool Gooti kuunodekono. Aki yiuno Jisas Kraisollu'aro nevu aiyo yiunokuudo mujomwekovla'mwalanonogano.
Sanasan