Jisasol subusu'nyogalo tov pugasalpuga me'no domollajuno sumaiyokwe gami uumjunyokwe pworapwol su toorai aro kuudokaikono. “Kevu iruko mwallo'moneyokwe sa kuuno kwo'mwakopo tov ilaiyo'maiyo. Mekono. Kevu denomallulo. A'mwo Kwolaiyo Kuunodo toonyu ma'no ma'no yokwe tooro galonumworapino'moneyokwe tov nomoranubweyono'mo togakono.
Joon 13:1 - Gooti Toolluro Yogalokwono1 Toruda'ai Muunyu Toru'aro Surukuruwolovoka lubullu doto tovi yanyo'mo wobo togakono. Toro abai'movoka toga Jisasol kwako akavi mwalodowo gavnokweyolluro a'mwo abolo kwako akavi mwalodupudo tonyuno kalo buuropino kwingelabiyajukekono. Toro wingelabino wingelabino sumaiyokwe yiuno aiyowo'mo nobollo'mo toga'no abilai'movokaikono. Toro abilai'movoka toga Jisasol aro kuudo souromarokaikono. Oo nuu wobo toga kwako akavi wuugollu'movo'mi mi Nyunumiyago toollomno aikomgu nyulamonyudeyo. Kuudo me'no souromarokaikono. Faic an caibideil |
Joon 13:1
44 Iomraidhean Croise
Aki a'mwo abolo su ton moro yiuwi'nokai kuuguudo daikullodumdo ton kunyuda'aiyo'mogano. Toro te kevu moro yiuwi'nokai kuuguudo daikullodumdo su tonyu a'mwo abolo ton neya uumjunpino'moneyokwe jodubwasogaulo. Aki aro tovino kuudo nyallulo'gwonmwalpiyo. Nuvu yiuwi'nokai toga kevuge nomwalmwalanonyugono. Kevuge mwalno mwalno yo'mi aki kwako akavuro aiyowo'mo abai'mowo'ji kuga kuruv kevuge kuuno mujomwekovla'mwalanonyugono.” Kuudokaikono.
Nuvu yiuwi'nokai iruko toga Jeruusalemda'ai Gooti toollu ilomoropiyo'moneyokwe ago tovuro agwapto toru kevuge mwalodum kuuguudo yodekubwasodumdonyugono. Su toro yodekubwasodore toga nokwo agalonumworaropujuko kworekul kuruv magalonumwora'dupudorekikono. Toro kuvi kuruv kuujo sumdo akallugwono'gwowi kemoro ato tovi aikuuwoso. Aki aga toga dugumdo tovuro jurogudo tov kemi mido mollekumwaloduke tovi uumjunodupu kuvi kuuno sumwakovo.” Kuudokaikono.
Toruda'ai su toga Juu tooravuro iruko aguto pullugwo bai'meyo'moneyokwe wobo togakono. Iruko aguto su tollugwoji Muunyu Toru'aro Surukuruwolovoka lubullu doto tovi yanodupudogakono. Toro te iruko aguto su tollugwo nobai'meyo'mo yoduke tovino tov yiuwi'nokai tomuuda'ai Isuraiyol a'mwo abolo pun wagwolago Jeruusalem tovi yere abai'movopogano. Toro bai'mo'mno sumaveyokwe Gooti toolluro sumdo tovi sugudo wimo'nyo'moneyokwe sovraimwonyajupogano.
Toro tooraida'ai pworo aro kuudo sauroporogano. Oo Juudasol nemoro nuugwipweyo mwora'dowodo toollu Jisasol aro tovino kuudumokaldeyo, Guu lubullu doto yanano'moneyokwe wosamujuko pun dobiyomorawono oo Guu a'mwo abolo apoo'nyaiyo pubuurai nuugwiyo pun neya duuwiyono. Su toro tovino kuudumokaldeyokwe tovino kuudo sauroporogano.
Nuu aro tovino me'no aikudumonyugono. “Nuu aikugollu'mo'mi kuvi kuruv kemiyomno aki aiko te nobaiki'mo'monyugono.” Su toro aikudumo tovi kevu me'no kuu'numaporekikono. Toro te kevu mino kalo buuropino aikulluno'ji tov nuu mi Nyunumiyago toollomno sulami tovino ilaiyo nokwo ipinorekikono. Aro tovinokwono. Moro Nyunumiyago su tool numi muunyu toru'aro nuwolo'mdowodekono. Toro toollomno sulami tovino ilaiyo neya ipinorekikono.
Toro tool jurogudo nonaguto kwol kuruv nuu wonyapino yodo'mure toonyu kaiyako nyanyugolonekono. Toro yanyugolodowo'jure kuga kuruv nuu mi Nyunumiyago toolluro adanyoka tovino'gwowi nuumjunmonyugono. Mi Nyunumiyago toollu uumjunodo'mure su tovi'aro a'mwo abolo kwako akavi mwalodupudo ton wonopi kuudo yanuupinogano. Oo gami Ganumiyago toolluno kalo buuropino winodowodoldeyo. Kuudo yanuupinogano.” Jisasol toro kuudokaikono. Me'no wuujuno sumaiyokwe gami uumjunyokwe toorai kuudokaikono. “Kevu julodaiyulo. Nevu kado avlawanoo.” Kuudokaikono.
Jisasol gami uumjunyokwe toorai kuuguudo me'no wuujuno sumaiyokwe toga Gooti toolluro ago muunyu kai'muuno iloonyopiya'no aro kuudokaikono. “Nyunumiyagoloo, gumoro ajesodo toga me'no abai'mopso. Toro te nuu gumoro Kwolaiyo toonyu gumino yovo tovi ilomogwopiyodo'mure tovino tov guu gumoro Kwolaiyo toonyuno yovo tovi nokwo julomonuwopiyawono.
Nuu a'mwo abolo su tobuurai gumino yovo tovino kuu'maiyo toru me'no amoruujajonyugono. Aki nuu gumino yovo su tovino kuuno nomoruudumwalmonyugono. Su tov aro tovinokwono. Guu mino kalo buuropino gujunodowodo to'busuko kubalno kalo buuropino pasudo su tov moro a'mwo abolo akabuurai nokwo kuuluuwo'mwalonokwono. Aki nuvnokwe toonyu moro a'mwo abolo su tobuurai noulomwalmwalmonyugono.” Jisasol subusu'nyogalo toro kuudokaikono.
Toro moruujuno sumaiyokwe a'mwo aguto tooro Jisasollu galomworallo'mo puuto tovino a'mgono sajuporogano. Toro kuvi kuruv gami wimo'nyo'mo kuunodo toga yere mabai'mo'mduke tovino tov a'mwo su tooro yere magalomworallajupekono. Aki Jisasollu nogalomworallo'moneyokwe a'mwo pwolnodo kwol kuruv ato tokwe yere muubogai'nyajukekono.
Jisasolluro yogalo kuudoka su ton Jeruusalemda'ai Gooti toollu ilomoropiyo'moneyokwe ago tovuro nuugwiyo bookis tovi wobo toru davo'no sodubwasokaikono. Toro yodubwasoduke kuvi kuruv gami nuuwimo'nyo'moneyokwe kuunodo toga yere mabai'mo'mduke tovino tov a'mwo su tooro wuulo yere magalaillajuporogano.
Kuudo neya jaullulo. Nevu Krais toolluno kuudo muudu'no kuubweyowo toga guureji agudupolarowo to'busuko kubalno aga kuga kuruv aval'no agudupolarogawano. Nevu Krais toolluno gudupola'no gudupola'no yowa'ji yiuno aiyowo'mo toga'no agudupolara'ji tov yiuwi'nokai Gooti toolluro nonekullabodowo'jure tonyu Krais tooke ne kunol kuruv aval'no nomaranonogano.
Toro te Moosesekwo Gooti toolluro ago to'busuko wimo'nodupudo a'mwo abolo su tonyuro womdokwe kwimo'nyajukekono. Toro kuvi kuruv Krais toolno'gwowi ago amodoka toolluro kwolaiyo kuunodekono. Toro tool Gooti toolluro ago to'busuko wimo'nodupudo a'mwo abolo tonyu pi'mwono to'no guureji mollomwalodowodekono. Neya duu'nyulo. Nevu Krais toolluno guureji neya agudupolarogawano. Aki nevu Krais toolluro nonekullabwono tonyuno sogwollo to'no aingovlavogawano. Nevu su toro sa'ji tov Gooti toolluro ago to'busuko kuvinono wimo'nugovla'mwalanonogano.
Toro tovino tov kevnokweyogaikulluro kuudo tonyu neya jovraimwonyogaulo. Aki kevnokweyogaikulluro pasudo kunyu kuruv pi'mwono neya domollomwalnogaulo. Toro togaikul Jisas Kraisolluro kuu'maiyo biyalo'nono toga Gooti toolluro yasuwa'wino sugumaluko tov nekubweyonogaikikono. Gooti toolluro yasuwa'wino sugumaluko ikubweyono su tovino kemoro yiuwi'nokai kuullutago tokwe po'dogalo gudupolaropi sogwollo to'no denomwalogaulo.
Aki Jisas Krais kwol kuruv gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval kemi nokwo ikubwemwalonekono. Jisas Kraisol Gooti toolluno kuu'maiyo toru'no pi'mwono dodoluwosodowodekono. Aki Jisas Kraisol yiuwi'nokai me'no bolodupudo tooravuro aiyo aiko te dukaiyo'moneyokwe tov kwolda'ai amollubworosokaikono. Toro tool yiuwi'nokai kwako akavida'ai a'mwo aguto kig mido mollomwalokwe tooravuro Agutekono. Jisas Kraisol nemino kalo buuropino winyuno sumaiyokwe gamoro mujako abwoloka tokwe nemi ma'no ma'no pasudo tonyuda'ai me'no abomollurolovonekumokalokwokaikono.
Sanasan