Jems 2:14 - Gooti Toolluro Yogalokwono

¹⁴ Mi avalobuuravoo, a'mwo pwol aro donekono. “Nuu Krais toolluno kuudo kuubwemwakono.” Toro dowo'ji kwol kuruv sugupasudo pugai'aro mamolludo'movlawo'ji to'gwowi a'mwo su toolluro yogalo tov yiuno yasuwa'yogalo to'no imo'nonokwono. A'mwo su toolluro, “Oo kuudo kuubwemwakono,” yasuwa'yogalo ado'ji su tov gami ma'no ma'nodo tovuro kirumwallo tovida'ai nokwo bomollurolovomokalokwonoldukono? Awiyo. A'mwo su toolluro yasuwa'yogalo ado'ji tov gavnokweyolluro ma'no ma'nodo tovuro kirumwallo tovida'ai ku'nono mabomollurolovomokalokwonekono.

Jems 2:14 Iomraidhean Croise

Matyuu 5:20

Su toro tovino aro ikudumo'mokwono. Kemoro sugudo somjomwekovlapi ton a'mwo loowo tovino pi'mwo kuudokwe toorogai'aro Farasi toorogai'aro tooravuro sugudo yomjomwekovla'mdupudo tonyu neya duuwolovogaulo. Kevu toro toorai muuwolopi to'gwowi muunyu kai'muuda'ai aguto kig toolluro mido mollomwalo tovi dolago tomuu ku'nono maulomwalpinogaikikono.”

Luuk 3:11

Toro kuudoganopo tonyu Joonol aro kuudokaikono. “A'mwo pweku youro puruval kurukwenyudeyokwe a'mwo youro nonagutokwe pwollu gumoro youro puul neya duuwiyono. Aki a'mwo pweku wosamujuko kurukwenyudeyokwe a'mwo supto yodowo'jure pwollu neya duuwiyono.” Kuudokaikono.

Luuk 6:49

Toro kuvi kuruv a'mwo pwol moro yogalo aikudadokwo akanyu wuu'nowo'ji muumjuno'ji su toolno'gwowi aro toolbusuko imo'nonekono. A'mwo pwol gami ago tov weko toru sulo jurogudo nonagutokwe towai amodokaikono. Toro mojuno sumaiyokwe wonyo allako tov ago su tovi guureji kuumnagutovokakwono. Toro kuumnagutovoka kuga'gwo kuuno ago su tov yere abwolarokakwono. Toro bwola'no sumaiyokwe ago su tov kaiyako yiunokuudo airowo'dolapiyokakwono.”

Kuurotokwe 15:9

Aki toro tooro Jisasolluno kuudo kuubweyopo toga Gooti tool kemoro poowokalago tonyu amollol'movomarokaikono. Toro te Gooti tool nevu yiuwi'nokai Juu toonogai'aro a'mwo Juu tooravuro miyawosunodupudo toorogai'aro toonollu puuto judo'no judo'nodo pumgu'aro mamollonekumallokwekono.

Kuurotokwe 8:13

Aki a'mwo bulaptokwe Saimoonol kwol kuruv kuuguudo sugudo su tovi kuudo uubweyo'no wonyo kuuvollunokaikono. Toro tool Filipollu wobo toru kuumjunyajukekono. Toro uumjunodowo Filipolluro duuwallo jurogudo go'no go'no wuuduuwalloduke tonyu wonodowo luko amorumoukuropiyajukekono.

Kuurotokwe 8:21

Gumoro poowokalago tov Gooti toolluro sumdo tovi idopto'no mimo'nodumdekugono. Toro tovino tov guu navubusuko avaiwomdo tov ku'nono mibinekugono.

Room 2:25

Aki neya duu'nyulo. Kevu Juu toorekul aro dodupudorekikono. “Nevu lakulkulako do'nodowado toonol Gooti toolluro a'mwo kuunodo wimo'nodowadonogano.” Toro dodupudo kworekul kuruv Gooti toolluro loowo tonyu kisuvolo wiyodupudorekikono. Kevu loowo su tonyu po'dogalo kuumjunopujuko'mno'juki kemoro lakulkulako do'nodupudo tov aro tovino kuu'maiyo kuuduuwallopujukorekikono. Oo nevu Gooti toolluro kuunodonogano, tovino nokwo kuuduuwallopujukorekikono. Toro kworekul kuruv loowo su tonyu kisuvolo yodupudo tovino tov kemoro lakulkulako do'nodupudo su tov yiuno yasuwa'no to'no do'nodupudorekikono. Toro toorekul a'mwo Juu miyawosunodupudo toorobusuko imo'nodupudorekikono.

1 Koorin 15:2

Aki kuuguudo sugudo amodekumollajo su tovi'aro Gooti tool kemi ma'no ma'nodo tovuro kirumwallo tovida'ai mollurolovekuma'dowodekono. Kuuguudo sugudo su tovino kevu kuudo uubweyodupudo tov yasuwa'nodo'maiyo. Toro kuvi kuruv sulo kuvinono ne'nonokwono. Toro tovi guureji avorugwo'mo'napi togaikullu Gooti tool kuvinono nomollurolovekumaronekono.

1 Koorin 16:22

Oo nemi Aguto tool yere abwoneyokwe anekullunadopiyo. A'mwo pwol nemi Aguto su toolluno kalo buuropino mwino'ji tov yiunokuudo nerumwallo'mekono.

Galesiya 5:13

Miyobuuravoo, neya duu'nyulo. Kevu Moosesolluro loowo tovi ki'nato womdo wiyodopure togaikullu Gooti tool nobomollurolovekumokalokwiyo'moneyokwe me'no adekumarokaikono. Kevu ki'nato womdo tovida'ai me'no birolo'nugolokwodupudo togaikulluno tov kaiya'no kuudo aro nyau'mwalpiyo. Oo nevu loowo tovi dolago tomuu mamwalodowado tonolluno tov nemi kuudo uumdo tovuro kaiya'no pasudo toorai nokwo kirounugovla'mwalanonogano. Kevu kaiya'no kuudo su toro nyau'mwalpiyo. Toro kugaikul kuruv kalo buuropino winyo'moneyokwe pasudo su to'gwowi kevu Jisasolluro a'mwo abolo togaikul imgu amgu neya duuwinogaulo.

Galesiya 5:6

Kuudo neya jaullulo. A'mwo pwol Krais Jisasollu me'no uuguro'mwonyodowodo tool gami lakulkulako tov ado'no'jo'mdeyo oo mado'no'jo'mdeyo kuruv su toval aguto mimo'nodubulovakono. Toro kuvi kuruv aguto to'gwowi arokwono. A'mwo pwol Krais Jisasolluno kuudo uubweyodowodo su tovi'aro a'mwo abolo punyuno kalo buuropino winmwalono to'gwowi agutokwono.

1 Tesaloonaika 1:3

Nemi Nellunumiyago Gooti toollu aro tonyuno wuudodowadonogano. Kevu kuudo me'no kuubweyopo togaikulluro womdo mujumovla'mdopure tovino wuudodowadonogano. Aki kemoro kalo buuropino ikullunoduke tovida'ai womdo mollodupudo tovino wuudodowadonogano. Aki nemi Aguto Jisas Kraisolluro aikomgu wolabwono tovino sogwollo kinomwallo'moneyokwe tov muugollu'mo'mdupudogaikikono. Su toro tonyuno Gooti toollu, “Nenoloo,” wuudodowadonogano.

1 Timooti 1:5

Guu a'mwo kuunano ibwasodopure toorai duumjukullo'moneyokwe aro neya jodubwasogawono. Yiuwi'nokai Jisasolluro a'mwo abolo ton a'mwo abolo pubuuraino kalo buuropino neya winogapuro. Kalo buuropino winyo'moneyokwe pasudo su tov puruvapuruv tonyuda'ai lokabodowodokwono. Muudu'nodo tov kemoro poowokalago me'no sal'mo'nyungiko tovida'ai lokabodowodokwono. Aki puruv kemi poowokalago tovida'ai kuudo sugudo me'no kuuluuwo'dowodo tovi kuvinono uumjunodowo'jure tovida'ai lokabodowodokwono. Aki puruv Gooti toolluno kuudo kuvinono uubweyodopure tovida'ai lokabodowodokwono.

1 Timooti 4:8

Kuudo neya jaurono. Nemoro kulako tovi jurogudo imo'nyo'moneyokwe sumwonyo pun guureji ino ino sa'ji tov yiuno pwekwonodo to'no nonekullo'mwojodowodokwono. Toro kuvi kuruv Gooti toolluro ilaiyo winodowo'jure tovi uumjunyo'mo yogudo amjumovlawa'ji su to'gwowi yiuwi'nokai tonyuno nonekullo'mwojonokwono. Su tov nemoro aiyo amwakuuwo akagake'aro lukomgu aiyo yiunokuudo mujomwekovla'mwalano kugake'aro yiuwi'nokai su toga yiuno ilaiyo to'no nekullo'mwojumwalonokwono.

Taitos 1:16

A'mwo abolo su ton yiuno kemi mago tokwe to'no aro dodupudogano. “Nevu Gooti toolluno kuudo me'no youroma'dowadonogano.” Su toro dodupudo kuvi kuruv kemoro yomjomwekovla'mdupudo to'gwowi kemi yogalo su tovi muumjunodupudo tovino kuu'maiyo toru'no aro wuuduuwallunodupudogano. Gooti toollu ku'nono muumjunmwakuuwono. Kuu'maiyo toru'no su toro wuuduuwallunodupudogano. Toro te a'mwo abolo su ton kisuvolo yodupudogano. Aki toro ton sugupasudo yo'moneyokwe kuruv ku'nono mipinogano. Gooti tool a'mwo abolo su toro yodopure tonyuno kwoda'molo sumdo to'no yodowodekono.

Taitos 3:8

Yogalo agudumo akan yiuno nebal'nodogano. Toro te a'mwo abolo Gooti toolluno kuudo uubweyodupudo ton yiuwi'nokai toga sugupasudo tonyu aulolukumowopiyogapuro. Toro tonyu guu moro yogalo agudumo akagai jurogudo neya doduuwimwojumovlavogawono. Yogalo su ton sugudogano. Aki yogalo su ton yiuwi'nokai a'mwo abolo tonyu nokwo wiyo'mwojupinogano.

Hibruu 11:17

Aiyoga Gooti tool Eburaiyamollu yamju tov kwiyoganokaikono. Toro kwiyoganoka su tov Eburaiyamol Gooti toollu kuudo kuubweyoka tovino tov gami kwolaiyo Aisakollu Gooti toollo'mo wiroudapiyo'moneyokwe amollovrowosokaikono. Eburaiyamol Gooti toolluro subuu'yamju me'no aduuwiyajuko tovino kuudo kuubweyajukekono. Toro tool gami kwolaiyo pwolnodo toollu wiroudapiyo'moneyokwe kuvinono amollovrowosokaikono.

Hibruu 13:9

Toro te a'mwo pworavuro ibwasodupudo kavlo go'no go'no muuduko pun kemi nomollubworekumokavla'mwalpiyo. Wosamujuko punyuno kumako mwallo'mo loowo tooro kemi jurogudo ku'nono madaikullumwojodupudorogano. Toro kuvi kuruv Gooti toolluro yasuwa'wino sugumaluko to'gwowi kemi poowokalago tonyu jurogudo daikullumwojodowodokwono. Wosamujuko kumako mwallo'mo loowo su tooro a'mwo abolo uumjunodupudo tonyu ku'nono mwiyo'mwojodupudorogano.

Jems 1:16

Toro te kevu moro kalo buuropino nyunodupudobuuravoo, a'mwo pworo kemi kuunano nyoukuu'naikudumwalpiyo.

Jems 2:16

kevu a'mwo abolo su tobuurai aro wuudupinogaikikono. “Oo kevu nokwo plavopi sumwoluko kavo doosunogaulo. Aki kevnokwe togaikul du'muujudo jumwonyogaulo. Aki wosamujuko neya donyuto'nogaulo.” Su toro kuudupi kuvi kuruv supto yodopure su tobuurai wosamujuko'mdeyo oo youro'mdeyo pun mwipi tov kemoro yogalo kuudupi su tov a'mwo abolo su tobuuravuro kulako tonyu nokwo wiyo'mwojono'mdukono? Awiyo, yiuno yogalo to'no kuudupi tov ku'nono mwiyo'mwojupinogaikikono.

Jems 2:18

A'mwo pworo aro dupinorogano. “Oo a'mwo abolo pun kuudo uubweyokweyogano. Aki a'mwo abolo puno'gwowi sugupasudo mujumovlaiyokweyogano.” Pasudo puruvalluno su toro dupinorogano. Toro kuvi kuruv nuvno'gwowi aro ikudumo'mokwono. “Kevu pugaikul sugupasudo mimovlapi tov kemoro kuudo uubweyodupudo tovino ku'nono manyuduuwallupinogaikikono. Kevu su toro supi kuvi kuruv nuvno'gwowi moro sugupasudo mujumovla'mdumdo tovi'aro nuvnokwenyuro kuudo uubweyodumdo tovino kuu'maiyo ikuduuwallumwalmonyugono.”

Jems 2:26

Toro te kuudo neya jaullulo. A'mwo pwolluro kulako tov kuullo nonaguto'mdeyokwe kulako su tov bwiyo me'no abollungiko to'busuko imo'nonokwono. Su toro to'busuko kubalno a'mwo pwol kuudo uubweyowo'ji kwol kuruv sugupasudo mamjumovlawo'ji to'gwowi gamoro kuudo uubweyodowodo tov me'no abollungiko to'busuko imo'nonokwono.

2 Pita 1:5

Kavlo su tovino tov kevu Krais Jisasolluno kuudo uubweyodupudo tovi muunyu toru'aro pasudo sugumaluko tonyu mujumovlaiyo'moneyokwe womdo bwotonyo neya jogaulo. Pasudo sugumaluko su tovi muunyu toru'aro kevu Gooti toolluno kuudo purukwe'aro neya jouromarogaulo.