یُوحنّا 15:10 - کِتاب مُقدّس سرائیکی ترجمہ

¹⁰ جے تُساں میڈے حُکماں اُتے عمل کریسو تاں میڈی محبت ءچ قائم راہسو، جِینویں مَیں آپنڑے باپ دے حُکماں اُتے عمل کیتے تے اُوندی محبت ءچ قائم ہاں۔

یُوحنّا 15:10 Iomraidhean Croise

یُوحنّا 10:18

میڈی جان مَیں کنُوں کوئی وی نئیں کھسیندا بلکہ مَیں آپنڑی مرضی نال اُونکُوں قُربان کریندا ہاں۔ میڈے کولھ اُونکُوں ڈیوݨ دا وی اِختیار ہے تے اُونکُوں ولا گِھننڑ دا وی اِختیار ہے۔ ایہ حُکم میکُوں میڈے باپ کنُوں مِلیا ہے۔“

یُوحنّا 12:49

کیوں جو مَیں آپنڑی طرفوں کُجھ نئیں آدھا بلکہ اسمانی باپ جئیں میکُوں بھیجیا ہے اُونہی میکُوں حُکم ڈِتے جو کیا آکھاں تے کیا بولاں۔

یُوحنّا 14:15

جے تُساں میڈے نال محبت کریندے ہیوے تاں میڈے حُکماں اُتے عمل کرو۔

یُوحنّا 14:21

جیندے کولھ میڈے حُکم ہِن تے او اُنہاں کُوں منیندے، اُوہو میڈے نال محبت کریندے۔ تے جیہڑا میڈے نال محبت کریندے او میڈے باپ دا پیارا ہوسی تے مَیں اُوندے نال محبت رکھیساں تے آپنڑے آپ کُوں اُوندے اُتے ظاہر کریساں۔“

یُوحنّا 14:23

یسُوع جواب ءچ اُونکُوں آکھیا جو ”جے کوئی میڈے نال محبت کریندے تاں او میڈے کلام اُتے عمل کریسی تے میڈا باپ اُوندے نال محبت کریسی تے اساں اُوندے کولھ آسُوں تے اُوندے نال راہسوں۔

یُوحنّا 14:31

پر ایہ اِیں واسطے تھیندے جو دُنیا جاݨ گِھنے جو مَیں باپ نال محبت کریندا ہاں تے جِینویں باپ میکُوں حُکم ڈِتے مَیں اُونویں ای کریندا ہاں۔ اُٹھو اِتُھوں جُلوں۔“

یُوحنّا 17:4

مَیں اُوں کم کُوں جیہڑا تَیں میکُوں کرݨ کیتے ڈِتا ہا، پُورا کر تے زمین اُتے تیڈا جلال ظاہر کر ڈِتے۔

یُوحنّا 4:34

یسُوع اُنہاں کُوں آکھیا، ”میڈا کھانڑا ایہ ہے جو مَیں آپنڑے بھیجنڑ آلے دی مرضی پُوری کراں تے اُوندا کم پُورا کراں۔

یُوحنّا 8:29

تے جئیں میکُوں بھیجیا ہے او میڈے نال ہے۔ اُوں میکُوں کلھا نئیں چھوڑیا، کیوں جو مَیں ہمیشاں اُوہو کم کریندا ہاں جیہڑے اُونکُوں پسند ہِن۔“

یُوحنّا 8:55

تُساں اُونکُوں نئیں جانڑیا، پر مَیں اُونکُوں جانڑدا ہاں تے جے آکھاں جو اُونکُوں نئیں جانڑدا تاں تُہاڈے وانگُوں کُوڑا ہوساں۔ پر مَیں اُونکُوں جانڑدا ہاں تے اُوندے کلام اُتے عمل کریندا ہاں۔

1کُرِنتھِیوں 7:19

ختنہ کراوݨ یا نہ کراوݨ کوئی خاص گالھ نئیں بلکہ خُدا دے حُکماں اُتے عمل کرݨ ای سبھ کُجھ ہے۔

1تھِسّلُنیکیوں 4:1

ہِک آخری گالھ ایہ ہے بِھراؤ، اساں تُہاکُوں سِکھایا ہے جو خُدا کُوں راضی کرݨ کیتے کِینویں زندگی گُزارنڑی چاہیدی ہے تے تُساں اِینویں کریندے وی ہیوے۔ ہُنڑ اساں خُداوند یسُوع ءچ تُہاڈی مِنت کریندے تے نصیحت کریندے ہیں جو اِینویں کرݨ ءچ مزید ترقی کرو۔

عبرانیوں 7:26

ساکُوں ایجھے ای کاہِن ِ اعظم دی لوڑ ہئی جیہڑا پاک، بے قصُور، تے بے عیب ہووے، گُنہگاراں کنُوں اَنج تے اسمان کنُوں وی اُچا کیتا گِیا ہووے۔

2 پطرس 2:21

جِنہاں صداقت دی راہ کُوں جاݨ تاں گِھدا پر اُوں پاک حُکم کنُوں پِھر گئے جیہڑا اُنہاں کُوں ڈِتا گِیا ہا، تاں اُنہاں کیتے اِیہو چنگا ہا جو اِیں راہ کُوں کڈھائیں نہ جانڑدے۔

1 یُوحنّا 2:3

جے اساں اُوندے حُکماں اُتے عمل کرُوں تاں ساکُوں یقین تھی ویندے جو اساں اُونکُوں جاݨ گِھدے۔

1 یُوحنّا 2:5

پر جیہڑا اُوندے کلام اُتے عمل کریندے تاں اُوندے ءچ خُدا دی محبت یقیناً کامِل تھی گئی ہے۔ اِیں تُوں ساکُوں پتہ چلدے جو اساں اُوندی رفاقت ءچ ہیں۔

1 یُوحنّا 2:6

جیہڑا کوئی آدھے جو میں خُدا ءچ قائم ہاں تاں اُونکُوں چاہیدے جو او وی اُونویں ای زندگی گُزارے جِینویں مسیح گُزاری۔

1 یُوحنّا 5:3

خُدا نال محبت رکھنڑ دا مطلب ایہ ہے جو اساں اُوندے حُکماں اُتے عمل کرُوں تے اُوندے حُکم بھارے نئیں۔

مُکاشفہ 22:14

مُبارک ہِن او جیہڑے آپنڑے چولے دھوندے ہِن کیوں جو زندگی دے درخت تئیں پُجنڑ دا حق پیسن تے اُنہاں پھاٹکاں کنُوں شہر ءچ داخل تھیسن۔