1تھِسّلُنیکیوں 2:9 - کِتاب مُقدّس سرائیکی ترجمہ

⁹ بِھراؤ! ساڈی او سخت محنت تُہاکُوں ضرور یاد آندی ہوسی۔ اساں خُدا دی خوشخبری سُنڑیندے ہوئے ڈینہہ رات آپنڑے ہتھاں نال کم کریندے ہسے تاں جو کہیں اُتے بھار نہ بنڑوں۔

1تھِسّلُنیکیوں 2:9 Iomraidhean Croise

لُوقا 18:7

تاں وَل کیا خُدا آپنڑے چُنڑے ہوئے لوکاں دا اِنصاف نہ کریسی جیہڑے ڈینہہ رات اُوں کنُوں فریاد کریندے ہِن؟ تے کیا او اُنہاں دی مدد ءچ دیر کریسی؟

لُوقا 2:37

او چُوراسی (84) سال کنُوں بیوہ ہئی، تے ہیکل ءچوں نہ نِکلدی ہئی بلکہ ڈینہہ رات روزہ رکھ تے دُعا تے عبادت کریندی راہندی ہئی۔

اعمال 18:3

تے کیوں جو اَکوِلہ تے پرسکِلہ وی تمبُو بنڑاوݨ دا کم کریندے ہَن جِینویں پولُس کریندا ہا، اِیں واسطے او اُنہاں نال رہ تے کم کرݨ لگا۔

اعمال 20:24

پر مَیں آپنڑی جان کُوں عزیز نئیں رکھیندا بس ایہ چاہندا ہاں جو مَیں آپنڑی خدمت دا دور تے او کم جیہڑا خُداوند یسُوع میکُوں ڈِتے، پُورا کراں یعنی خُدا دے فضل دی خوشخبری سُنڑاوݨ دا کم۔

اعمال 20:31

اِیں واسطے خبردار رہوائے تے یاد رکھائے جو مَیں ترے سال تئیں ڈینہہ رات ہنجُو وہا وہا تے ہر ہِک کُوں خطرے تُوں آگاہ کریندا ریہا۔

رومیوں 1:1

ایہ خط میں پولُس دی طرفوں ہے جیہڑا یسُوع مسیح دا خادم ہاں۔ میں رسُول ہووݨ کیتے سڈیا گِیا ہاں تے خُدا دی خوشخبری سُناوݨ کیتے مقرر کیتا گِیا ہاں۔

رومیوں 15:16

جو مَیں غیریہُودیاں ءچ مسیح یسُوع دا خادم بنڑ تے خوشخبری دی خدمت کاہِن دی طرحاں کراں، تاں جو غیریہُودی رُوح القُدس دے ذریعے مُقدّس تھی تے ایجھی نذر بنڑ ونجنڑ، جیہڑی خُدا دے حضُور ءچ مقبول تھیوے۔

رومیوں 15:19

معجزیاں تے عجیب کماں دی طاقت تے رُوح القُدس دی قُدرت دے وسیلے نال کیتا۔ اِینویں مَیں یروشلیم تُوں گِھن تے اِلُرِکُم صوبے تئیں مسیح دی خوشخبری دی پُوری پُوری تبلیغ کیتی۔

1کُرِنتھِیوں 4:12

اساں آپنڑے ہتھاں نال سخت محنت کریندے ہیں۔ لوک ساکُوں بُرا بھلا آدھے ہِن پر اساں اُنہاں کُوں دُعا ڈیندے ہیں۔ جِیں ویلے لوک ساکُوں ستیندن تاں برداشت کریندے ہیں۔

1کُرِنتھِیوں 9:15

پر مَیں اِیں حق کُوں اِستعمال نئیں کیتا تے نہ ای اِیں خیال نال لِکھدا پِیا ہاں جو ہُنڑ کُجھ مِلسی۔ کوئی میڈے تُوں میڈے فخر دا سبب کَھس گِھنے، اِیں تُوں میڈے کیتے بہتر ہے جو میں مر ونجاں۔

1کُرِنتھِیوں 9:18

بس میڈا اجر کیا ہے؟ صرف ایہ جو خوشخبری کُوں مُفت کر ڈیواں تے اُوں حق دا فائدہ نہ چاواں جیہڑا تبلیغ دی وجہ کنُوں میکُوں مِلدا ہے۔

1کُرِنتھِیوں 9:4

کیا ساکُوں کھاوݨ پِیوݨ دا حق نئیں؟

2کُرِنتھِیوں 11:27

مَیں محنت تے مُشقت کیتی، اکثر ساری رات جاگدا ریہا، بُکھا تے ترِسّا تے بہُوں پھیری فاقہ کیتا، سردی تے ننگے پن ءچ ریہا۔

2کُرِنتھِیوں 11:9

تے جِیں ویلے مَیں تُہاڈے کولھ ہم تے میکُوں ضرورت پئی تاں مَیں تُہاڈے ءچوں کہیں کُوں ذرا وی تکلیف نہ ڈِتی کیوں جو مَکِدُنیہ کنُوں مسیحی بِھرانواں آ تے میڈی ضرورت پُوری کیتی۔ مَیں تُہاڈے اُتے کوئی بھار نئیں سٹیا تے نہ ای ولا سٹیساں۔

2کُرِنتھِیوں 6:5

کوڑے کھا تے، قید ءچ رہ تے، فساد دا سامنڑا کر تے، سخت محنت کر تے، آپنڑیاں نیندراں حرام کر تے، بُکھے رہ تے،

فِلِپّیوں 4:16

جِیں ویلے مَیں تھِسّلُنِیکے شہر ءچ ہم تاں تُساں میڈیاں ضرورتاں کُوں پُورا کرݨ کیتے ہِک پھیری نئیں بلکہ کئی پھیری مدد کیتی۔

1تھِسّلُنیکیوں 1:3

اساں تُہاڈے کم جیہڑے اِیمان دی وجہ کنُوں ہِن، تے تُہاڈی محنت جیہڑی محبت دا نتیجہ ہے، تے تُہاڈے صبر کُوں جیہڑا ساڈے خُداوند یسُوع المسیح اُتے اُمید رکھنڑ دے سببّوں تُہاڈے ءچ پیدا تھئے، آپنڑے خُدا تے باپ دی حضُوری ءچ یاد کریندے ہیں۔

1تھِسّلُنیکیوں 2:2

بلکہ جِینویں تُساں جانڑدے ہیوے، اساں فِلپی ءچ ڈُکھ چاتے تے بہُوں بے عزت تھئے۔ وَل وی ساکُوں آپنڑے خُدا ءچ دلیری تھئی جو خُدا دی خوشخبری بہُوں مخالفت دے باوجود تُہاکُوں سُنڑاؤں۔

1تھِسّلُنیکیوں 2:6

اساں آدمیاں دی تعریف دے مُتھاج نئیں نہ ای تُہاڈی نہ بئے دی، بھانویں اساں مسیح دے رسُول ہووݨ دی حیثیت نال تُہاڈے اُتے آپنڑا بھار سَٹ سگدے ہسے۔

1تھِسّلُنیکیوں 3:10

اساں ڈینہہ رات بہُوں دُعا کریندے ہیں جو تُہاکُوں مِلُوں تے تُہاڈے اِیمان دی کمی کُوں پُورا کر ڈیؤں۔

1 تِیمُتھِیُس 1:11

ایہ تعلیم مُبارک خُدا دے جلال آلی اُوں خوشخبری دے مطابق ہے جیہڑی میڈے سپُرد کیتی گئی ہے۔

1 تِیمُتھِیُس 4:10

اِیہو وجہ ہے جو اساں سخت محنت تے کوشش کریندے ہیں کیوں جو اساں آپنڑی اُمید اُوں زندہ خُدا اُتے رکھی ہے جیہڑا سارے اِنساناں کُوں، خاص کر اِیمانداراں کُوں نجات ڈیوݨ آلا ہے۔

1 تِیمُتھِیُس 5:5

جیہڑی عورت واقعی ضرورت مند بیوہ ہے تے جِیندا کوئی نئیں، او خُدا اُتے اُمید رکھیندی ہے تے ڈینہہ رات خُدا کنُوں مدد منگدی تے دُعا کریندی ہے۔

2 تِیمُتھِیُس 1:3

مَیں خُدا دا شُکر ادا کریندا ہاں جیندی عبادت مَیں آپنڑے پِیُو ڈاڈے دی طرحاں نیک نیّتی نال کریندا ہاں، تے تیکُوں ڈینہہ رات آپنڑیاں دُعاواں ءچ یاد کریندا ہاں۔