1 یُوحنّا 5:6 - کِتاب مُقدّس سرائیکی ترجمہ

⁶ ایہ اُوہو ہے جیہڑا پانڑی تے خون دے وسیلہ نال آیا ہا یعنی یسُوع مسیح۔ او نہ صرف پانڑی دے وسیلہ نال بلکہ پانڑی تے خون ڈُوہائیں دے وسیلہ نال آیا ہا تے رُوح القُدس اُوندی گواہی ڈیندے کیوں جو رُوح ای سچائی ہے۔

1 یُوحنّا 5:6 Iomraidhean Croise

متّی 26:28

کیوں جو ایہ میڈا خون ہے، عہد دا او خون جیہڑا بہُوں ساریاں دے گُناہاں دی معافی کیتے وہایا ویندے۔

متّی 3:16

یسُوع بپتسمہ گِھن تے فوراً پانڑی تُوں باہر آیا۔ تے ڈیکھو اُوندے کیتے اسمان کُھل گِیا تے اُوں خُدا دے رُوح کُوں کبوتر وانگُوں آپنڑے اُتے لہندے ڈِٹھا۔

مرقس 14:24

اُوں اُنہاں کُوں آکھیا، ”ایہ خُدا دے عہد کُوں قائم کرݨ آلا میڈا خون ہے جیہڑا بہُوں ساریاں کیتے وہایا ویندے۔

لُوقا 22:20

تے اِینویں ای کھانڑے دے بعد اُوں پیالہ گِھدا تے آکھیا، ”ایہ پیالہ میڈے اُوں خون ءچ نواں عہد ہے، جیہڑا تُہاڈے کیتے وہایا ویندے۔

یُوحنّا 14:17

یعنی سچائی دا رُوح، جِینکُوں دُنیا حاصل نئیں کر سگدی کیوں جو نہ تاں اُونکُوں ڈیدھی ہے نہ جانڑدی ہے۔ پر تُساں اُونکُوں جانڑدے ہیوے کیوں جو او تُہاڈے نال راہندے تے تُہاڈے اندر ہوسی۔

یُوحنّا 14:6

یسُوع اُونکُوں آکھیا جو ”راہ، حق تے زندگی مَیں ہاں، میڈے وسیلہ دے بغیر کوئی باپ دے کولھ نئیں آندا۔

یُوحنّا 15:26

پر جِیں ویلے او مددگار آسی جِینکُوں مَیں تُہاڈے کولھ باپ دی طرفوں بھجیساں، یعنی سچائی دا رُوح جیہڑا باپ دی طرفوں صادر تھیندا ہے تاں او میڈی گواہی ڈیسی۔

یُوحنّا 16:13

پر جِیں ویلے او، یعنی سچائی دا رُوح آسی تاں او پُوری سچائی دو تُہاڈی راہنمائی کریسی۔ کیوں جو او آپنڑی طرفوں کُجھ نہ اکھیسی بلکہ تُہاکُوں صرف اُوہو ڈسیسی جیہڑا کُجھ او سُنڑسی تے تُہاکُوں آوݨ آلے گالھیں دی خبر ڈیسی۔

یُوحنّا 3:5

یسُوع جواب ڈِتا، ”مَیں تیکُوں سچ آدھا ہاں جو جئیں تئیں کوئی بندہ پانڑی تے رُوح نال پیدا نہ تھیوے او خُدا دی بادشاہی ءچ داخل نئیں تھی سگدا۔

یُوحنّا 4:10

یسُوع جواب ءچ اُونکُوں آکھیا، ”جے تُوں خُدا دی بخشش کُوں جانڑدی تے ایہ وی جو او کوݨ ہے جیہڑا تَیں کنُوں پانڑی منگدے تاں تُوں اُوں کنُوں منگدی تے او تیکُوں زندگی دا پانڑی ڈیندا۔“

یُوحنّا 4:14

پر جیہڑا کوئی اُوں پانڑی ءچوں پِیندے جیہڑا مَیں اُونکُوں ڈیساں، اُونکُوں کڈھائیں تریھ نہ لگسی بلکہ جیہڑا پانڑی مَیں اُونکُوں ڈیساں او اُوندے ءچ چشمہ بنڑ ویسی جیہڑا ویہہ تے ہمیشاں دی زندگی ڈیسی۔“

یُوحنّا 6:55

کیوں جو حقیقی کھانڑا میڈا گوشت تے پِیوݨ دی حقیقی چیز میڈا خون ہے۔

اعمال 8:36

او رستے ءچ ویندے ہوئے، ایجھی جاہ اُتے پُجے جِتھاں پانڑی ہا۔ خوجے آکھیا ”ڈیکھ اِتھاں پانڑی موجود ہے، ہُنڑ میکُوں بپتسمہ گِھننڑ تُوں کیہڑی چیز روکیندی ہے؟“

رومیوں 3:25

خُدا اُونکُوں مقرر کیتا جو او آپنڑے خون دے سببّوں ایجھا کفارہ بنڑ ونجے جیہڑا اِیمان گِھن آوݨ آلے کیتے فائدہ مند ہووے۔ ایہ خُدا آپنڑی راستبازی ظاہر کرݨ کیتے کیتا، کیوں جو اُوں بہُوں صبر تے برداشت نال اُنہاں گُناہاں دی سزا نہ ڈِتی جیہڑے ماضی ءچ تھئے ہَن۔

اِفِسیوں 1:7

ساکُوں مسیح دے خون دے وسیلے نال مخلصی یعنی گُناہاں دی معافی مِلی ہے۔ ایہ خُدا دے اُوں بے حد فضل دے سببّوں تھیّا،

کلُسِّیوں 1:4

کیوں جو اساں سُنڑیا ہے جو تُساں مسیح یسُوع اُتے اِیمان رکھیندے ہیوے تے سارے مُقدّساں نال محبت کریندے ہیوے۔

1 تِیمُتھِیُس 3:16

اِیندے ءچ کوئی شک نئیں جو ساڈے اِیمان دا راز وڈا ہے یعنی او جِسم ءچ ظاہر تھیّا، رُوح دے وسیلے نال صادق ثابت تھیّا فرشتیاں کُوں ڈِکھالی ڈِتا، غیر قوماں ءچ اُوندی تبلیغ تھئی دُنیا ءچ لوک اُوندے اُتے اِیمان گِھن آئے تے او جلال ءچ اسمان اُتے چاتا گِیا۔

طِطُس 3:5

تاں خُدا ساکُوں نجات ڈِتی پر ساڈے نیک کماں دی وجہ کنُوں نئیں جیہڑے اساں کیتے بلکہ آپنڑے رحم دی وجہ کنُوں۔ ایہ نجات ساکُوں رُوح القُدس دے وسیلے مِلی جئیں ساکُوں دھو تے نویں سرے تُوں پیدا کیتا تے نوِیں زندگی ڈِتی۔

عبرانیوں 10:29

تاں او بندہ کِتنی وڈی سزا دے لائق ہوسی جئیں خُدا دے پوتر دی توہین کیتی تے عہد قائم کرݨ آلے خون کُوں جیندے نال او پاک تھیّا ہا، ناپاک سمجھیا، تے فضل ڈیوݨ آلے رُوح القُدس دی بے عزتی کیتی۔

عبرانیوں 12:24

تُساں نویں عہد دے درمیانی یسُوع تے اُوندے اُوں چِھنڈکے ہوئے خون دے کولھ آئے ہیوے جیہڑا ہابل دے خون دی نسبت چنگا پیغام ڈیندا ہے۔

عبرانیوں 13:20

اِطمینان دا خُدا جئیں اُوں ابدی عہد قائم کرݨ آلے خون دے ذریعے بھیڈاں دے عظیم آجڑی یعنی ساڈے خُداوند یسُوع کُوں مُردیاں ءچوں زندہ کیتا،

عبرانیوں 9:14

تاں مسیح دا خون جئیں ازلی رُوح القُدس دے وسیلے نال آپنڑے آپ کُوں خُدا دے حضُور ءچ ہِک بے عیب قُربانی دے طور تے پیش کر ڈِتا، تُہاڈے دل کُوں موت گِھن آوݨ آلے کماں تُوں کیوں نہ پاک کریسی تاں جو تُساں زندہ خُدا دی عبادت کر سگو۔

عبرانیوں 9:7

پر ڈُوجھے حصے ءچ صرف کاہِن ِ اعظم ویندا ہا، پر او وی سال ءچ صرف ہِک پھیری۔ تے او قُربانی دے خون دے بغیر نئیں ویندا، جیہڑا او آپنڑے تے قوم دے بُھل چُک ءچ کیتے ہوئے گُناہاں دی خاطر پیش کریندا ہا۔

1 پطرس 1:2

خُدا باپ تُہاکُوں ازلی علم دے مطابق چُنڑ گِھدا تے اُوندے رُوح تُہاکُوں مخصوص تے مُقدّس کیتا۔ نتیجے ءچ تُساں یسُوع مسیح دی فرمانبرداری کریندے ہیوے تے اُوندے چِھنڈکے گئے خون نال پاک صاف تھی گئے ہیوے۔ تُہاکُوں ڈھیر سارا فضل تے اِطمینان حاصل تھیندا راہوے۔

1 پطرس 3:21

اُوہو پانڑی بپتسمہ دو اِشارہ ہے جیہڑا یسُوع مسیح دے زندہ تھیوݨ دے وسیلے نال ہُنڑ تُہاکُوں بچیندے۔ ایہ نئیں جو تُہاڈے جِسم دی گندگی دھویج ویندی ہے بلکہ تُساں نیک نیّتی نال خُدا دے طالب تھی ویندے ہیوے۔

1 یُوحنّا 1:7

پر جے اساں نُور ءچ ٹُردے ہیں جِینویں جو او خود نُور ءچ ہے تاں اساں ہِک ڈُوجھے نال رفاقت رکھیندے ہیں تے اُوندے پوتر یسُوع دا خون ساکُوں سبھ گُناہاں تُوں پاک کریندے۔

1 یُوحنّا 4:10

محبت ایہ نئیں جو اساں خُدا نال محبت کیتی بلکہ ایہ ہے جو اُوں ساڈے نال محبت کیتی تے آپنڑے پوتر کُوں بھیجیا تاں جو او ساڈے گُناہاں دا کفارہ بنڑے۔

مُکاشفہ 1:5

تے یسُوع مسیح دی طرفوں جیہڑا سچا گواہ تے مُردیاں ءچوں زندہ تھیوݨ آلیاں ءچوں پلوٹھا تے دُنیا دے بادشاہاں اُتے حُکمران ہے۔ او ساڈے نال محبت رکھیندے تے اُوں آپنڑے خون دے وسیلہ نال ساکُوں ساڈے گُناہاں تُوں رہائی بخشی،

مُکاشفہ 5:9

تے او ایہ نواں گیت گاوݨ لگے جو ”تُوں ای اِیں لائق ہیں جو طُومار کُوں گِھن تے اُوندیاں مُہراں کھولیں، کیوں جو تَیں ذبح تھی تے آپنڑے خون نال ہر قبیلہ، ہر زبان، ہر اُمت تے ہر قوم ءچوں لوکاں کُوں خُدا دے واسطے مُل گِھن گِھدے۔

مُکاشفہ 7:14

مَیں جواب ڈِتا ”میڈے آقا! ایہ تاں تُساں ای جانڑدے ہیوے۔“ وَل اُوں آکھیا جو ”ایہ لوک او ہِن جیہڑے وڈی مُصیبت ءچوں نِکل تے آئے ہِن۔ اُنہاں آپنڑے کپڑے لیلے دے خون نال دھو تے چِٹے کیتے ہِن۔