1کُرِنتھِیوں 4:5 - کِتاب مُقدّس سرائیکی ترجمہ

⁵ اِیں واسطے تُساں وقت کنُوں پہلے کہیں گالھ دا فیصلہ نہ کرو بلکہ خُداوند دے آوݨ دا انتظار کرو۔ جیہڑے گالھیں اندھارے ءچ لُکے ہوئے ہِن او اُنہاں کُوں روشنی ءچ گِھن آسی تے لوکاں دے دل دے منصوبے ظاہر کریسی۔ اُوں ویلے ہر ہِک دی تعریف خُدا دی طرفوں کیتی ویسی۔

1کُرِنتھِیوں 4:5 Iomraidhean Croise

متّی 10:26

بس اُنہاں کنُوں نہ ڈرو کیوں جو کوئی چیز ڈھکی ہوئی نئیں جیہڑی کھولی نہ ویسی، تے کوئی چیز لُکی ہوئی نئیں جیہڑی ظاہر نہ کیتی ویسی۔

متّی 24:30

اُوں ویلے اِبنِ آدم دا نشان اسمان اُتے ظاہر تھیسی، تے دُنیا دیاں سبھ قوماں چھاتی پِٹسن تے اِبنِ آدم کُوں بدلاں اُتے قُدرت تے وڈے جلال نال آندے ڈیکھسن۔

متّی 24:46

مُبارک ہے او نوکر جِیندا مالک آ تے اُونکُوں اِینویں ای کریندا ڈیکھے۔

متّی 25:21

اُوندے مالک اُونکُوں آکھیا، ’شاباش میڈے چنگے تے اِیماندار نوکر۔ تُوں تھوڑے ءچ اِیماندار ریہا۔ مَیں تیکُوں بہُوں ساریاں چیزاں دا مُختار بنڑیساں۔ آپنڑے مالک دی خوشی ءچ شریک تھی۔‘

متّی 25:23

اُوندے مالک اُونکُوں آکھیا، ’شاباش میڈے چنگے تے اِیماندار نوکر۔ تُوں تھوڑے ءچ اِیماندار ریہا، مَیں تیکُوں بہُوں ساریاں چیزاں دا مُختار بنڑیساں۔ آپنڑے مالک دی خوشی ءچ شریک تھی۔‘

لُوقا 6:37

عیب جوئی نہ کرو، تُہاڈی وی عیب جوئی نہ کیتی ویسی۔ مُجرم نہ بنڑاؤ، تُساں وی مُجرم نہ بنڑائے ویسو۔ معاف کرو، تُہاکُوں وی معاف کیتا ویسی۔

یُوحنّا 21:22

یسُوع اُونکُوں آکھیا، ”جے مَیں چاہواں جو ایہ میڈے ولنڑ تئیں زندہ راہوے تاں اِیندے نال تیکُوں کیا؟ تُوں میڈے پِچُھوں ٹُر۔“

یُوحنّا 21:23

بس اِیمانداراں ءچ ایہ گالھ مشہور تھی گئی جو او شاگرد نہ مر سی۔ پر یسُوع ایہ نہ آکھیا ہا جو ”او نہ مرسی“ بلکہ ایہ آکھیا ہا، ”جے مَیں چاہواں جو او میڈے ولنڑ تئیں زندہ راہوے تاں اِیں گالھ نال تیکُوں کیا؟“

یُوحنّا 5:44

تُساں ہِک ڈُوجھے کنُوں عزت چاہندے ہیوے، تے جیہڑی عزت خُدائے واحد دی طرفوں مِلدی ہے اُونکُوں حاصل کرݨ نئیں چاہندے۔ تُساں کِینویں اِیمان گِھن آ سگدے ہیوے؟

رومیوں 14:4

تُوں کوݨ ہیں جو کہیں ڈُوجھے دے نوکر اُتے اِلزام لاویں؟ او قائم ہے یا ڈھٹھا پِیا ہے، اُوندے مالک دا فیصلہ ہے۔ بلکہ او قائم کیتا ویسی کیوں جو خُداوند اُونکُوں قائم کرݨ اُتے قادر ہے۔

رومیوں 2:1

اِیں واسطے اِلزام لاوݨ آلے، تُوں جیہڑا کوئی وی ہونویں تیڈے کولھ کوئی بہانہ نئیں۔ کیوں جو جڈاں تُوں ڈُوجھے اُتے اِلزام لیندیں تے خود اُوہو کم کریندیں تاں اِینویں آپنڑے آپ کُوں مُجرم بنڑیندیں۔

رومیوں 2:16

ایہ اُوں ڈینہہ تھیسی جڈاں خُدا یسُوع مسیح دے وسیلے اِنساناں دیاں لُکیاں گالھیں دا اِنصاف کریسی جِینویں مَیں خوشخبری سُنڑیندا ہاں۔

رومیوں 2:29

بلکہ یہُودی اُوہو ہے جیہڑا دِلی طور تے یہُودی ہے تے ختنہ اُوہو ہے جیہڑا دل دا تے رُوحانی ہے نہ جو لِکھے ہوئے حُکم دا۔ ایجھے اِنسان دی تعریف آدمیاں دی طرفوں نئیں بلکہ خُدا دی طرفوں ہوندی ہے۔

رومیوں 2:7

جیہڑے نیک کماں ءچ قائم رہ تے جلال، عزت تے ختم نہ ہووݨ آلی زندگی دے طالب ہِن اُنہاں کُوں ہمیشاں دی زندگی ڈیسی۔

1کُرِنتھِیوں 1:7

ہُنڑ ساڈے خُداوند یسُوع مسیح دے ظاہر تھیوݨ دے اِنتظار ءچ راہندے ہوئے تُہاکُوں کہیں رُوحانی نعمت دی کمی نئیں۔

1کُرِنتھِیوں 11:16

جے کوئی اِیندے اُتے بحث کرݨ چاہندے تاں او جاݨ گِھنے جو نہ ساڈا ایجھا دستور ہے نہ خُدا دی کلیسیاواں دا۔

1کُرِنتھِیوں 11:26

کیوں جو جِیں ویلے تُساں ایہ روٹی کھاندے تے اِیں پیالے ءچوں پِیندے ہیوے تاں خُداوند دی موت دا اعلان کریندے ہیوے جئیں تئیں او ولا نہ آوے۔

1کُرِنتھِیوں 15:23

پر ہر ہِک آپنڑی آپنڑی واری نال۔ سبھ تُوں پہلے مسیح جیہڑا پہلا پھل ہے، تے وَل مسیح دے آوݨ تے اُوندے لوک۔

1کُرِنتھِیوں 3:13

اُوندے کم کُوں بھاہ عدالت دے ڈینہہ ظاہر کر ڈیسی کیوں جو بھاہ کم کُوں ازما تے ثابت کریسی جو کیجھا ہے۔

1کُرِنتھِیوں 3:14

جئیں کہیں دا کیتا ہویا کم باقی راہسی، اُونکُوں اجر مِلسی۔

1کُرِنتھِیوں 3:8

لاوݨ آلے تے پانڑی ڈیوݨ آلے ڈوہائیں دا ہِکو مقصد ہے تے ہر ہِک کُوں آپنڑی محنت دے مطابق اجر مِلسی۔

2کُرِنتھِیوں 10:18

کیوں جو جیہڑا آپنڑی تعریف کریندے، او مقبول نئیں بلکہ جِینکُوں خُداوند نیک سمجھدے، اُوہو مقبول ہے۔

2کُرِنتھِیوں 10:9

میں نئیں چاہندا جو اِینویں لگے جو میں خطاں دے ذریعے تُہاکُوں ڈراوݨ دی کوشش کریندا پِیا ہاں،

2کُرِنتھِیوں 4:2

اساں شرم دے لُکے گالھیں کُوں چھوڑ ڈِتے۔ نہ اساں مکاری کریندے ہیں تے نہ ای خُدا دے کلام ءچ ملاوٹ کریندے ہیں۔ بلکہ سچائی کُوں ظاہر کر تے خُدا دے حضُور ہر بندے دے دل ءچ آپنڑے آپ کُوں نیک ظاہر کریندے ہیں۔

2کُرِنتھِیوں 5:10

کیوں جو اساں ساریاں کُوں مسیح دے تختِ عدالت دے سامنڑے حاضر تھیونڑاں ہے تاں جو ہر بندہ آپنڑے کماں دا بدلہ پاوے جیہڑے اُوں آپنڑے بدن ءچ راہندے ہوئے کیتے ہِن، بھانویں چنگے ہِن یا بُرے۔

1تھِسّلُنیکیوں 5:2

کیوں جو تُساں چنگی طرحاں جانڑدے ہیوے جو خُداوند دے واپس آوݨ دا ڈینہہ اِینویں آوݨ آلا ہے جِینویں چور رات کُوں آندے۔

عبرانیوں 4:13

کائنات دی کوئی چیز خُدا دی نظر کنُوں لُکی ہوئی نئیں، بلکہ جیندے حضُور ءچ ساکُوں جواب ڈیونڑے، اُوندی نظر ءچ ہر چیز بے نقاب تے ظاہر ہے۔

یعقُوب 4:11

بِھراؤ، تُساں آپس ءچ ہِک ڈُوجھے دی بدگوئی نہ کرو۔ جیہڑا آپنڑے بِھرا دی بدگوئی کریندے یا اُوندے اُتے اِلزام لیندے، او شریعت دی بدگوئی کریندے تے اُوندے اُتے اِلزام لیندے۔ تے جے تُوں شریعت اُتے اِلزام لیندیں تاں تُوں شریعت اُتے عمل کرݨ دی بجائے اُوندی عدالت کریندیں۔

یعقُوب 5:7

اِیں کیتے بِھراؤ! خُداوند دے آوݨ تئیں صبر کرو۔ کِسان کُوں ڈیکھو، جیہڑا زمین ءچوں قیمتی پیداوار حاصل کرݨ کیتے خزاں تے بہار دے مینہ دا صبر نال اِنتظار کریندے۔

یعقُوب 5:9

بِھراؤ! ہِک ڈُوجھے دی شکایت نہ کرو تاں جو تُہاڈی عدالت نہ تھیوے۔ ڈیکھو! مُنصف دروازے اُتے کھڑے۔

1 پطرس 1:7

تاں جو تُہاڈا ازمایا ہویا اِیمان جیہڑا بھاہ نال خالص کیتے ہوئے فانی سونے تُوں وی بہُوں قیمتی ہے، اصلی ثابت تھی ونجے تے یسُوع مسیح دے ظہور دے ڈینہہ تعریف، جلال تے عزت مِلنڑ دا سبب ہووے۔

1 پطرس 5:4

وَل جِیں ویلے سردار آجڑی ظاہر تھیسی تاں تُساں اِنعام ءچ ایجھا تاج پیسو جِیندا جلال کڈھائیں ختم نہ تھیسی۔

2 پطرس 3:12

خُدا دے اُوں ڈینہہ دے بہُوں مُشتاق تے اِنتظار ءچ راہونڑا چاہیدے جو او جلد آسی۔ اُوں ڈینہہ اسمان بھاہ نال سڑ تے برباد تھی ویسی تے اسمان دیاں سبھ چیزاں بھاہ دی شِدت کنُوں پگھر ویسن۔

2 پطرس 3:4

تے اکھیسن، ”مسیح دے آوݨ دا وعدہ کِتھاں گِیا؟ ساڈے پِیُو ڈاڈا تاں مر گئے تے دُنیا دے خلق تھیوݨ تُوں ہُنڑ تئیں سبھ کُجھ اِینویں ای ہے۔“

یہُوداہ 1:14

حنُوک وی جیہڑا آدم دی ستویں پُشت ءچوں ہا، اِنہاں دے بارے ءچ پیشن گوئی کیتی ہئی جو ”ڈیکھو! خُداوند آپنڑے لکھاں پاک فرشتیاں نال آندا پئے

مُکاشفہ 1:7

”ڈیکھو او بدلاں اُتے آوݨ آلا ہے تے ہر اکھ اُونکُوں ڈیکھسی جِنہاں اُونکُوں چھیدیا ہا او وی ڈیکھسن تے زمین دیاں سبھ قوماں اُوندے سببّوں دھاڑپِٹ کریسن ہا، اِینویں ای تھیوے۔ آمین۔“

مُکاشفہ 20:12

تے مَیں چھوٹے وڈے سارے مُردیاں کُوں تخت دے سامنڑے کھڑے ڈِٹھا تے کتاباں کھولیاں گئیاں۔ وَل ہِک بئی کتاب وی کھولی گئی جیہڑی کتاب ِ حیات ہے۔ تے ساریاں مُردیاں دی عدالت اُنہاں دے اعمال دے مطابق کیتی گئی جیہڑے اُنہاں کتاباں ءچ لِکھے ہَن۔