1کُرِنتھِیوں 1:18 - کِتاب مُقدّس سرائیکی ترجمہ

¹⁸ کیوں جو ہلاک تھیوݨ آلیاں کیتے تاں صلیب دا پیغام بیوقُوفی ہے پر نجات پاوݨ آلیاں کیتے خُدا دی قُدرت ہے۔

1کُرِنتھِیوں 1:18 Iomraidhean Croise

اعمال 13:41

’حقارت کرݨ آلیو! ڈیکھو، حیران تھیؤ تے ہلاک تھی ونجو کیوں جو مَیں تُہاڈے زمانے ءچ ہِک کم کرݨ آلا ہاں ایجھا کم جیندی خبر سُنڑ تے وی تُہاکُوں کڈھائیں یقین نہ آسی‘۔“

اعمال 17:18

کُجھ اِپکُوری تے ستوئیکی فیلسُوف اُوندے نال بحث ءچ پے گئے۔ اُنہاں ءچوں کُجھ آکھیا جو ”ایہ بکواسی کیا آکھنڑ چاہندا ہے؟“ کُجھ ایہ آکھنڑ لگے جو ”ایہ تاں اجنبی دیوتیاں دی خبر ڈیوݨ آلا لگدے۔“ کیوں جو پولُس یسُوع تے قیامت دی خوشخبری ڈیندا ہا۔

اعمال 17:32

جِیں ویلے لوکاں مُردیاں دی قیامت دے بارے ءچ سُنڑیا تاں اُنہاں ءچوں کُجھ اِیں گالھ کُوں کِھل ءچ اُڈا ڈِتا تے کُجھ آکھیا جو ”اساں اِیں موضوع تے وَل کہیں ویلے تَیں تُوں سُنڑسوں۔“

اعمال 2:47

تے خُدا دی حمد کریندے تے سارے لوکاں دی نظر ءچ مقبول ہَن۔ تے خُداوند ہر روز نجات پاوݨ آلیاں کُوں جماعت ءچ شامل کر ڈیندا ہا۔

رومیوں 1:16

مَیں خوشخبری کنُوں نئیں شرمیندا کیوں جو او ہر اِیمان گِھن آوݨ آلے دی نجات کیتے خُدا دی قُدرت ہے۔ پہلے یہُودی کیتے، وَل غیریہُودی کیتے۔

1کُرِنتھِیوں 1:21

کیوں جو خُدا آپنڑی حِکمت دے مطابق ایہ فیصلہ کیتے جو دُنیا آلے آپنڑی حِکمت نال خُدا کُوں نہ جانڑݨ بلکہ خُدا کُوں ایہ پسند آیا جو اِیں بیوقُوفی دے پیغام دے وسیلے نال جیندی اساں تبلیغ کریندے ہیں اِیمان گِھن آوݨ آلیاں کُوں نجات بخشے۔

1کُرِنتھِیوں 15:2

اُوں خوشخبری دے وسیلے تُہاکُوں نجات وی مِلدی ہے شرط ایہ ہے جو تُساں اُوں گالھ اُتے قائم راہو جیہڑی مَیں تُہاکُوں پُچائی ہے، نہ تاں تُہاڈا اِیمان گِھن آوݨ بے فائدہ ہے۔

1کُرِنتھِیوں 2:14

پر جیہڑا بندہ رُوحانی نئیں او خُدا دے رُوح دے گالھیں قبول نئیں کریندا، کیوں جو او اُوندی نظر ءچ بیوقُوفی ہِن تے نہ ای اُنہاں کُوں سمجھ سگدے کیوں جو او صرف رُوح القُدس دے ذریعے سمجھیاں ویندیاں ہِن۔

1کُرِنتھِیوں 2:2

کیوں جو مَیں فیصلہ کر گِھدا ہا جو تُہاڈے ءچ یسُوع المسیح بلکہ اُوندے صلیب اُتے چڑھائے ونجنڑ دی تبلیغ دے علاوہ کوئی بئی گالھ نہ کریساں۔

1کُرِنتھِیوں 3:19

کیوں جو دُنیا جِینکُوں حِکمت سمجھدی ہے، او خُدا دی نظر ءچ بیوقُوفی ہے، جِینویں لِکھیا ہے جو ”او عقلمنداں کُوں اُنہاں دی چالاکی ءچ پَھسا ڈیندے۔“

1کُرِنتھِیوں 4:10

اساں مسیح دی خاطر بیوقُوف بنڑ گئے ہیں، پر تُساں مسیح ءچ عقل مند ہیوے۔ اساں کمزور ہیں پر تُساں زور آور ہیوے۔ لوک تُہاڈی عزت کریندن پر ساڈی بے عزتی۔

2کُرِنتھِیوں 10:4

کیوں جو ساڈی لڑائی دے ہتھیار دُنیاوی نئیں بلکہ خُدا دی طرفوں مضبوط قلعیاں کُوں ڈھا ڈیوݨ دی قُدرت رکھیندے ہِن۔

2کُرِنتھِیوں 4:3

جے او خوشخبری جیندی اساں تبلیغ کریندے ہیں ہُنڑ وی پڑدہ دے پِچھے لُکی ہوئی ہے تاں صرف ہلاک تھیوݨ آلیاں کیتے ہے۔

1تھِسّلُنیکیوں 1:5

کیوں جو ساڈی خوشخبری صرف لفظاں نال نئیں بلکہ قُدرت، رُوح القُدس تے پُورے یقین نال تُہاڈے تئیں پُجی ہے۔ تُساں جانڑدے ہیوے جو اساں تُہاڈے وچال تُہاڈی خاطر کِینویں زندگی گُزریندے ہسے۔

2تھِسّلُنیکیوں 2:10

تے او ہلاک تھیوݨ آلیاں کیتے بُرائی دے ہر طرحاں دے دوکھے استعمال کریسی۔ او لوک اِیں واسطے ہلاک تھیسن جو اُنہاں حق کُوں قبول کرݨ تُوں اِنکار کیتے جیندے وسیلے او نجات پا سگدے ہَن۔

عبرانیوں 12:2

اساں آپنڑی دِید یسُوع اُتے لائی رکھوں جیہڑا اِیمان دا بانی تے کامل کرݨ آلا ہے، جئیں اُوں خوشی پارُوں جیہڑی اُوندی نظراں دے سامنڑے ہئی، صلیب دا ڈُکھ سہہ تے اُوندی شرمندگی دی پرواہ نہ کیتی۔ تے ہُنڑ خُدا دے تخت دے سجے پاسُوں بیٹھے۔

عبرانیوں 4:12

کیوں جو خُدا دا کلام زندہ تے موثر ہے۔ او ہر ڈُو دھاری تلوار کنُوں زیادہ تیز ہے، اِتُھوں تئیں جو جان تے رُوح، تے جوڑاں تے مِکھ کُوں چِیردا ہویا لنگھ ویندے، تے دل دے خیالاں تے اِرادیاں کُوں پرکھدے۔