Yaꞌkub 5:11 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹¹ Siga sukuꞌ Tuhan meꞌ sila ilay ma bay natas njawom kabinsanaan, katoonan tabi na du, pag toklas na, sinupaatan sila. Pamintangan bi na Boꞌ Job. Bay du taaka bi bong pooy ehe tatas na naggaan jinisan kamalasahiyan mattoꞌ. Damikiyan, tasayu bi na du bong pooy ehe supaat bay hinudhuran meꞌ Tuhan niiya ni katapusan. Dari mandooy, tabista tabi na, basta pannoꞌ atay Tuhan leꞌ luuy ka timbang ningkitabi.

Yaꞌkub 5:11 Iomraidhean Croise

Matiyu 10:22

Kaam ina mintu kinalammisan meꞌ jama ni mimon kalahat-lahatan sabap mmeꞌ kam niyaku. Sugaꞌ soysoy ina natas pangando na ngabut sampay pa katapusan, salamat jaꞌ ya.

Lukas 1:50

Manimbang ya ni sagannap ma ngisbat iya pangkat-mamangkat.

Lukas 11:10

Batan sagannap ina ma maku, mastiꞌ binuwanan jaꞌ. Sagannap ma miha, mastiꞌ nammu jaꞌ. Maka sagannap ma nugtug, mastiꞌ binukisan jaꞌ sina lawang ninsila.

Lukas 6:36

Sangkon, subay du kam manimbang ni jama meꞌ karuha Mmaꞌ bi Tuhan.”

Suwat si Pol pa mman Baanan Sukuꞌ si Isa ndooy ni Rom 2:4

Sangka bi mareꞌ sukat mehe aseꞌ Tuhan maka tahaꞌ pasensiya na ningkaam, ga yaꞌ dari oy na niiya san kam amu-amu buwat kalaatan. Maka yaꞌ gi mareꞌ tabista bi ngkon na amu-amu manimbang ningkaam, kawu-kawu tawbatan bi na dusa bi.

Epesus 1:6

Sangkon tud pataꞌ Tuhan pinudji. Biddaꞌ na ehe aseꞌ na njataꞌ tabi ma tibuuk ka kakasi na, yana si Isa Almasi.

Epesus 2:4

Lipara, biddaꞌ na ehe timbang ka aseꞌ Tuhan ningkitabi.

Hibrani 10:39

Kahapan kuwan kitabi baw itu, yaꞌ tabeꞌ ni sagannap ma patatak. Jama meꞌ sila ilay, song hallom minulkaan du. Boꞌ kitabi itu tabeꞌ ni sagannap ma salamat sabap takkoꞌ pangando tabi.

Hibrani 3:14

Basta ina yaꞌ jaꞌ labbahan tabi pangando tabi ni Almasi ngabut sampay pa katapusan, mastiꞌ hampit jaꞌ kitabi ni mimon supaat na.

Hibrani 3:6

Boꞌ Almasi baw ilay, saꞌ ya tindog meꞌ karuha Nabi Musa, arapun iya ilay tud Anak Tuhan mismu kanaalla magtakōk ni siga jama lumaꞌ Mmaꞌ na. Boꞌ kitabi na situ initung jama lumaꞌ Tuhan basta tattap jaꞌ pangando tabi ni Almasi, maka basta yaꞌ jaꞌ kitabi jamu ngagad ni mimon ma bay njanjiꞌ meꞌ Tuhan ni siga sukuꞌ na.

Yaꞌkub 1:12

Na sagannap ma amu-amu natas njawom kasusahan ma nuwayan pangando da ni si Isa, mastiꞌ sinupaatan jaꞌ sina. Batan pagka tumatandaꞌ na takkoꞌ pangando da, koleꞌ jaꞌ sina sila kasampulnaan nyawa saumu-umu ma ndang bay njanjiꞌ meꞌ Tuhan ni sagannap ma maaseꞌ niiya.

Yaꞌkub 1:2

Siga danganakan, bila kam tumabbaꞌ njawom jinisan kasusahan, bilangun bi jaꞌ kagakan.

1 Pitel 1:13

Dari pagka lay na kam sinalamat leꞌ Tuhan, patattogun bi na pamiki bi makutuꞌ kahandak na, maka agakun bi dī bi. Maka daa kam jamu ngaholat ni supaat ma ndean kaam pag beleng si Isa Almasi.

1 Pitel 3:14

Sugaꞌ sawpama kam bay bininsanaꞌ sabap meꞌ bi paintong, mastiꞌ luu supaat Tuhan njataꞌ bi. Sangkon daa kam hanggaw atawa tawu ni manusiyaꞌ.

2 Pitel 2:9

Sangkon ni mimon bay sabbut ku siꞌ, tumatandaꞌ na pandoy Tuhan maddusan jama ma ngisbat iya man jawom kasusahan. Damikiyan, pandoy du baw ya niksaꞌ jama ma yaꞌ intong njawom tahanan ngabut sampay sila pinidjalaꞌ ni llaw hukuman.