Lukas 8:3 - Sabahagiꞌ Kitab Tawrat: Panagnaan ni Awwal Jaman maka Kitab Injil

³ Maka luu gi bay mmeꞌ si Jowanna, yana nda si Kusa ma tukang magmalim ni astanaꞌ Gubnul Herod. Maka luu gi si Susana sampay meka gi karandahan bay du mmeꞌ. Sila ilay bay nganggastusan si Isa ka ga mulit na ka sīn da dī da.

Lukas 8:3 Iomraidhean Croise

Matiyu 14:1

Na jaman looy du siꞌ, kuwan si Herod, yana gubnul ndooy ni Jalil, lay du kaakahan pasal siga pakaradjaan bay pabuwat si Isa.

Matiyu 14:3

Ngkon ilay Gubnul Herod bay mitsala meꞌ looy sabap hanggaw na ya pagka iya bay nohoꞌ si Yahiya sinungkuban sampay iningkotan boꞌ njīl. Kon na ilay bay nungkub sabap daran ya bay sinahawi meꞌ si Yahiya pasal kalaatan na bay ngagaw nda ariꞌ na si Pilip binuwat nda na. Awon danda looy siꞌ si Herodiyas.

Matiyu 14:6

Sugaꞌ meꞌ tuu silay bay kadari na. Pag taabut haliyan buwan man Gubnul Herod bay pinamaddihan, lay ya ballang mehe. Ni paballangan looy siꞌ, kuwan anak si Herodiyas ma budjang, lay ngiluk ni awpan Gubnul Herod ka ga bisita na. Dari siꞌ, ni kagāk Gubnul Herod ni ilukan na,

Matiyu 2:11

Pag-anu, lay na sila paasok pa jawom lumaꞌ looy. Pag takita da jaꞌ siꞌ anak-anak looy maka nneꞌ na si Mariyam, lay na sila sujud sampay numba anak-anak looy. Pag lupus, inungkad na meꞌ da bay boonan da barang hagaan, boꞌ lay pinamuwan anak-anak looy. Ga barang looy siꞌ yana mmas, bbūg ka insallan hamut inawnan mira.

Matiyu 20:8

“Pag sangom, yuk lalla looy ma dapu kabbun ni pa-mmean siga tindog na, ‘Sōn na pitu sila ma bay buwat. Gadjihan nu na. Sugaꞌ ilooy doꞌ ma dambuli paruhuun ginadjihan.’

Matiyu 25:40

“Pag tampung Sultan ilay mintu, ‘Baan ta kam banahan, waktu bi ilay bay buwat meꞌ looy ni soysoy danganakan ku san du pooy diyoꞌ na ni bandingan manusiyaꞌ, saliꞌ du ka aku bay pabuwat bi meꞌ looy.’

Matiyu 26:11

Jama miskin ina, mastiꞌ luu jaꞌ ninggai-ninggai mman bi. Boꞌ aku tu, yaꞌ na humallom ntuu mman bi.

Matiyu 27:55

Ndooy siꞌ, luu gi baanan karandahan maimanan si Isa na pin man katāhan. Sila ilay ndang bay haboy ka si Isa lakka man Jalil batan ndang sila nabangan iya.

Lukas 24:10

Ilooy siꞌ ma bay nuntut yana ga si Mariyam man Magdala, si Jowanna, si Mariyam, yana nneꞌ si Yaꞌkub, maka luu gi kasohean karandahan bay soheꞌ da pilay pa kubu.

Yahiya 12:6

Na sabana na, yaꞌ silay luu luuy si Judas ni jama miskin, arapun kon na bay halling meꞌ looy sabap panangkaw ya. Minsan iya bay hinalap ngantanan pangannaan sīn ni baanan ga si Isa, bbuwatan na daran ngulangan sīn da para ni dī na.

Salsila siga Rasul 13:1

Na ni baanan sukuꞌ si Isa ndooy ni Antiyok, luu siga tukang masampay siga umanat ma pinalahil meꞌ Rū Sutsiꞌ ninsila, maka luu du siga jama alistu nōꞌ. Sila ilay siꞌ yana si Balnabas, si Simiyun ma pinagdē si Itom, si Lusiyus yana jama Sayrin, si Sol, maka si Manean. Si Manean ilay bay pingkaꞌ samod ka Gubnul Herod jaman da anak-anak lagi.

2 Korin 8:9

Ngaddoꞌ jaꞌ kam pamintangan ni Papuꞌ tabi si Isa Almasi. Katoonan bi na du ehe aseꞌ na ningkitabi. San ya dayahan ni sulgaꞌ, lay na ga ya pitu pa junyaꞌ niksaꞌ dī na njawom miskin supaya luu na lawang man tabi koleꞌ ladjikiꞌ ma natas saumu-umu.

Pilipi 4:22

Sampay mimon sukuꞌ Tuhan ntuu, awla na sagannap ma buwat ni jawom astanaꞌ Sultan, lay du nohoꞌ masampay salam duwaa ningkaam.

1 Timuti 5:10

Lagiꞌ na, subay sila bay tamasa nabiat buwat mahap. Hati na, subay mahap meꞌ da bay nganad anak da maka ndang nabiat ngahulmat jama. Maka subay sila biyasa magpangintu siga pagkahi da sukuꞌ si Isa. Maka subay sila biyasa magpanulung jama njawom kasusahan. Hantak bitsala ku ilay siꞌ, subay sila bay tamasa buwat jinisan kaayaran.