Lukas 11:39 - Sabahagiꞌ Kitab Tawrat: Panagnaan ni Awwal Jaman maka Kitab Injil

³⁹ Dari yuk si Isa niiya, “Kaam ina siga Parisi, inaa du jagahan bi kasutsian ni poan. Bong siꞌ ibaratan sawan atawa pinggan, ni poan du kosoan bi. Sugaꞌ njawom, pabiya bi jaꞌ pannoꞌ meꞌ jinisan kalalamaan. Meꞌ naa du sina karuha njawom atay bi, masi du pannoꞌ meꞌ napsu mulakab ka jinisan kalaatan.

Lukas 11:39 Iomraidhean Croise

Matiyu 15:19

Batan luu du lakka man jawom atay jama pamiki maat ma moo jama mapatoy maka magjina, buwat kasabuhan danda-lalla, nangkaw, ngandustaꞌ maka mitna.

Matiyu 7:15

“Iyakin kam ni siga jama ma magbawuꞌ-bawuꞌ tukang masampay ga umanat man Tuhan. Ndaꞌ mata ina dambuwaꞌ mukalnaꞌ sila ka kaam. Boꞌ ko, sarī njawom atay da. Bong ina kam yaꞌ jaga, sibuꞌ du sina mintu karuha bi ka baanan bili-bili ma bay katis sinalik meꞌ idoꞌ tawun.

Lukas 16:15

Sugaꞌ yuk si Isa ninsila, “Kaam itu, tud alistu baw kam magpakita-kita intong ni mata manusiyaꞌ. Sugaꞌ yaꞌ san tabista bi katoonan Tuhan du kalaatan njawom atay bi. Indanan bi. Meka sina pakaradjaan ma meꞌ punu njawom atay manusiyaꞌ sinukang meꞌ Tuhan.”

Lukas 7:13

Pag takita jaꞌ bawu looy meꞌ Papuꞌ Isa, kapaluuy ya. Dari yuk na, “Daa na ko Daꞌ nangis.”

Lukas 7:19

yuk na, “Pilay doꞌ kam pa mman si Isa. Tilawun bi teꞌ bong tud iya na tukang nalamat ma bay njanjiꞌ meꞌ Tuhan pinapitu, atawa luu gi ka sarī subay agad tabi.”

Yahiya 12:6

Na sabana na, yaꞌ silay luu luuy si Judas ni jama miskin, arapun kon na bay halling meꞌ looy sabap panangkaw ya. Minsan iya bay hinalap ngantanan pangannaan sīn ni baanan ga si Isa, bbuwatan na daran ngulangan sīn da para ni dī na.

Yahiya 13:2

Sugaꞌ san meꞌ looy na siꞌ aseꞌ si Isa, luu gi disu mulit na bay kabuwanan pamiki meꞌ Ibilis nipu iya. Mulit looy ilay siꞌ yana si Judas, anak si Saymon Iskariyut. Pag taabut deꞌ kohap, lay na ga si Isa mangan ka ga mulit na.

Salsila siga Rasul 5:3

Dari yuk si Pitel niiya, “Ananiyas, ongoy taggahaꞌ kuhi-kuhi jaꞌ ko pinagbayaan meꞌ Ibilis. Tatammu nu na ga ngandustaan Rū Sutsiꞌ. Baꞌ-bāꞌ nu, luu na ntuu mimon ballihan tanaꞌ nu, mingkan luu gi kasohean bay nnaꞌ nu para ni dī nu.

Galatiya 1:14

Jaman looy ilay, tud bay ngamasag ku mogbogan jinisan taat kabboꞌ-bboan ku Yahudi. Maka tud bay ku magtuyuꞌ ngadjiꞌ. Bong inawnan siga pagkahi ku ma sibuꞌ-sibuꞌ umu ku du, tud bay meka tamban meꞌ ku.

2 Timuti 3:5

Bong ndaꞌ mata, meꞌ bantuk ngisbat sila Tuhan. Sugaꞌ sabana na, tuwak da Tuhan ka kawasa na ngahalin pangatayan da. Sangkon daa ko samod ka ga jama meꞌ looy.

Taytus 1:15

Jama meꞌ looy ilay ma yaꞌ pitsayaꞌ ni si Isa, ndang yaꞌ du bay sinutsiꞌ meꞌ Tuhan atay da. Yaꞌ luu niyat atay da sutsiꞌ batan ndang lamaꞌ pamiki da. Maka yaꞌ na san luu nulang ni honaꞌ-honaꞌ da bong sila buwat maat. Boꞌ sagannap ma pitsayaꞌ ni si Isa ina, lay na sinutsiꞌ atay da. Sangkon katoonan da na san gi oy sinagid atawa pun kinakan meꞌ da, yaꞌ du luu katamak ninsila.

Yaꞌkub 4:8

Patapit na kam pa Tuhan, boꞌ na patapit pa mman bi. Kaam ma amu-amu buwat dusa, labbahan bi na dusa bi. Kaam ma duwa-duwa pikilan bi, patattogun bi na pamiki bi mmeꞌ ni Papuꞌ.