Lukas 1:1 - Sabahagiꞌ Kitab Tawrat: Panagnaan ni Awwal Jaman maka Kitab Injil

^1-3 Tuwan Tiyopilus, bagay ku ma tawop pinagmaltabatan, itu suwat ku pa mman nu. Kon ku nuwat mari katoonan nu salsila pasal si Isa Almasi. Meka na sina jama bay kasakup kadarihan si Isa labba man jaman na bay nagnaꞌ nōꞌ ngabut sampay na lakka man junyaꞌ. Boꞌ lay gi sila masaplag umanat mahap pasal iya ningkami. Maka meka na jama ma bay kale umanat da, bay na du nuwat pasal iya. Dari pagka bay pinaliksaꞌ meꞌ ku paayad salsila pasal si Isa labba man panagnaan, meꞌ ku mista mahap bong tinalitib na baw meꞌ ku mimon njawom suwat tuu ningkau.

Lukas 1:1 Iomraidhean Croise

Malkus 16:20

Dari kuwan siga mulit na siꞌ, lay na ngalataan kalahat-lahatan masaplag umanat mahap pasal Papuꞌ Isa. Man kawasa na njataꞌ da, meka na sipat kahaylan-haylan bay tapōꞌ da bilang buktiꞌ ni sikamimon tud bana du umanat da.

Yahiya 20:31

Sugaꞌ kasohean lay patabeꞌ ku ntuu supaya kam pitsayaꞌ si Isa yana Almasi, maka iya Anak Tuhan. Batan bong ina kam pitsayaꞌ na niiya, malaingkan koleꞌ kam kasampulnaan nyawa saumu-umu.

Suwat si Pol pa mman Baanan Sukuꞌ si Isa ndooy ni Rom 14:5

Na kasohean ina mista luu siga llaw mas mehe pa Tuhan man ga llaw kasohean. Boꞌ kasohean baw, meꞌ da mista, mimon llaw sibuꞌ du pa Tuhan. Na ni hāl meꞌ naa ina, subay bean ta mamooy numan ni pamiki ta saltaꞌ na yaꞌ nulang ni honaꞌ-honaꞌ ta.

Suwat si Pol pa mman Baanan Sukuꞌ si Isa ndooy ni Rom 4:21

Tatantu na bong Tuhan bay nganjanjiꞌ, mastiꞌ tinuman jaꞌ.

Kolossa 2:2

Kon ku magtuyuꞌ supaya pataggu na pin iman bi maka supaya kam wā dambuwaꞌ atay ka tattap sikaaseꞌ-kaaseꞌ. Kainagon ku sukup na pangahati bi ni garaꞌ Tuhan ma yaꞌ gi bay tumampak ni siga angkat-angkatan maruhuꞌ, yana garaꞌ na pasal Almasi.

Kolossa 4:12

Maka luu gi ntuu jama lahat bi du, yana si Epapras, lay du bay nohoꞌ masampay salam duwaa na ningkaam. Iya itu sabana-bana sosohoan si Isa Almasi. Basag ya makuhan kaam duwaa supaya taggu iman bi maka supaya tatantu bi bong oy kahandak Tuhan ningkaam.

1 Tesaloneka 1:5

Batan jaman kami ilay bay masampay umanat mahap pasal si Isa Almasi ningkaam, lay na kam pitsayaꞌ. Boꞌ kaam ilay bay pitsayaꞌ, saꞌ du ga sat man sabapan bitsala kami; luu du kawasa Rū Sutsiꞌ bay mukaꞌ puad bi. Sarī gi, lay du bay tabistu bi bana halling kami batan lay na bay tasakup bi arat-tabiat kami nnaa. Maka katoonan bi na du, mimon bay pabuwat kami nnaa, yaꞌ luu saꞌ yaꞌ bay pa kaayaran ningkaam.

1 Timuti 3:16

Kabanahan ina ma kinapitsayaan meꞌ tabi, yaꞌ tapakilubaan, boꞌ tud kahaylan-haylan. Maruhuꞌ yaꞌ gi bay tahati meꞌ manusiyaꞌ. Pag batnaa, lay na pinalahil meꞌ Tuhan ningkitabi. Meꞌ tuu situ karuha na: Almasi ina bay dari manusiyaꞌ ntuu ni junyaꞌ. Maka iya ilay, luu na pin Rū Sutsiꞌ bay mōꞌ buktiꞌ bong soy ya. Boꞌ lay gi ya tinammuhan meꞌ siga malaikat. Awon na lay na pinasaplag pa kabangsa-bangsahan. Maka kinapitsayaan na ya meꞌ manusiyaꞌ ni sikaliput junyaꞌ. Boꞌ lay gi ya inangkat pa sulgaꞌ njawom kabantugan mehe.

2 Timuti 4:17

Para na pin, jaman ku bay sinumariya, lai du ku bana inunungan meꞌ Papuꞌ Isa. Boꞌ bay gi ya nganggaosan aku masaplag umanat na labbasakayi ni mimon jama saꞌ Yahudi ndooy. Sat na jaꞌ, sasang ku ilay siꞌ bay sinumariya, parasahan ku subay ga ku hayop liput na meꞌ baanan halimaw. Kahapan, lay du ku sinalamat meꞌ Papuꞌ man bahaya looy.

Hibrani 10:22

Patapit na kitabi pa Tuhan ni kahilas atay tabi ka ni kabasag pangando tabi niiya. Tatantu tabi na hinasi jaꞌ kitabi meꞌ Tuhan batan lay na sinutsiꞌ atay tabi ka lahaꞌ si Isa. Baran tabi pun, lay na du bay pinandi ka boheꞌ sutsiꞌ. Maka yaꞌ na du luu jawom honaꞌ-honaꞌ tabi ga masi kitabi dusahan pa Tuhan.

Hibrani 6:11

Kainagon kami itu tiggohan bi na pin buwat meꞌ naa halloman bi llum supaya tantu takoleꞌ bi mimon ma hinolat meꞌ bi man Tuhan.