Sekaraea 10:11 - Pijin Bible

¹¹ Taem bikfala trabol hemi kasem olketa, bae mi stopem datfala trabol olsem mi save stopem biksi, an olsem mi save mekem Nael Riva fo kamap barava drae. Olketa pipol blong Asiria wea i haemapem olketa seleva, bae mi daonem olketa finis. An bae mi mekem Ijip fo lusim paoa blong hem.

Pijin Deuterocanon

¹¹ Taem bikfala trabol hemi kasem olketa, bae mi stopem datfala trabol olsem mi save stopem biksi, an olsem mi save mekem Nael Riva fo kamap barava drae. Olketa pipol blong Asiria wea i haemapem olketa seleva, bae mi daonem olketa finis. An bae mi mekem Ijip fo lusim paoa blong hem.

Sekaraea 10:11 Iomraidhean Croise

Jenesis 8:1

Bat God hemi tingim Noa yet, wetem evrisamting ya wea i stap wetem hem long sip ya, nao hemi sendem wanfala win fo blou long wata ya, an wata hemi stat fo godaon moa.

2 Kings 2:14

Hemi hitim wata long kaleko ya, an hemi tok olsem, “?Waswe, God blong Profet Elaeja hemi stap wetem mi ya?” An taem hemi hitim wata, semtaem nomoa, wata ya hemi divaed long tufala haf, an hemi wakabaot long drae graon, fo go kasem narasaet.

2 Kings 2:8

Den Profet Elaeja hemi tekemaot longfala kaleko blong hem an rolemap. Hemi hitim wata long hem, an semtaem nomoa, wata ya hemi divaed long tufala haf. So tufala wakabaot long drae graon fo go long narasaet.

Esra 6:22

Long sevenfala de nao, olketa hapi tumas, an olketa mekem disfala Bikde blong Bred wea hemi No Garem Eni Yist. Olketa hapi bikos Yawe hemi waka insaet long tingting blong king ya blong Asiria, mekem hemi helpem olketa fo wakembaek moa Tambuhaos ya blong God blong Israel.

Sams 114:3

Taem God hemi kam, Red Si hemi divaed long tufala haf. Ya, an Jodan Riva tu hemi no ran moa.

Sams 114:5

?Red Si, wanem nao hemi mekem yu fo divaed long tufala haf? ?Jodan Riva, wanem nao hemi mekem yu fo no ran moa?

Aesaea 14:25

Bae mi spoelem evri pipol blong Asiria wea i stap long disfala lan blong mi. An bae mi step long olketa an barava spoelem olketa hu i stap long olketa maonten long lan ya. Ya, bae mi mekem yufala pipol blong mi fo go fri, an bae mi tekemaot olketa hevi samting from solda blong yufala wea olketa fosim yufala fo karim.

Aesaea 19:16

(Profet) Long datfala taem, bae olketa pipol blong Ijip i fraet olsem olketa woman nomoa. Olketa seksek bikos Yawe hu hemi garem evri paoa bae hemi liftimap han blong hem fo panisim olketa.

Aesaea 43:2

Taem trabol hemi kasem yufala olsem wea yufala gotru long dipsi, bae mi stap wetem yufala. An taem yufala garem hadtaem olsem wea yufala gotru long riva wea hemi ran bikfala, bae hemi no save draonem yufala. Ya, taem trabol hemi kasem yufala olsem wea yufala gotru long faea, bae hemi no save bonem yufala.

Aesaea 44:27

Mi save tok nomoa, an dip si an olketa riva tu i kamap drae nao.

Aesaea 51:10

Yu nao yu divaedem si fo kamap drae. An yu nao yu mekem rod botom long si ya. Hem nao olketa pipol wea yu bin mekem olketa fri, save katkros go fo narasaet long drae graon.

Aesaea 51:9

(Profet) !Yawe! !Plis yu wekap an helpem mifala! !Yusim paoa blong yu fo sevem mifala, olsem wea yu bin duim bifoa! Yu nao yu kilim dae disfala bikfala si snek ya, wea olketa kolem Rehab, an yu katem long olketa smolfala pisis.

Esikiel 30:13

“Mi Lod Yawe nao mi tok olsem: Bae mi spoelem finis olketa ravis kaving long Memfis. No eniwan long laen blong king bae hemi stap long Ijip fo rul ovarem kantri ya, an bae mi mekem evriwan long lan i barava fraet fogud.

Sefenaea 2:13

Yawe bae hemi yusim paoa blong hem agensim kantri long Asiria, an bae hemi mekem biktaon long Nineve fo kamap nogud tumas, mekem hem no garem eni wata long hem.

Revelesin 16:12

Nao meksiks enjel hemi go kapsaetem baol blong hem insaet long Yufretis Riva. An bikfala riva ya hemi kamap drae nao. Long wei ya hemi openem rod, mekem olketa king hu i stap kam long ist wetem olketa ami blong olketa, i save wakabaot kam.