Sams 9:14 - Pijin Bible

¹⁴ Nao bae mi save stanap long frant blong olketa pipol long Jerusalem an bae mi talemaot evrisamting wea mi gohed preisim yu long hem. An bae mi hapi tumas, bikos yu bin sevem mi.

Pijin Deuterocanon

¹⁴ Nao bae mi save stanap long frant blong olketa pipol long Jerusalem an bae mi talemaot evrisamting wea mi gohed preisim yu long hem. An bae mi hapi tumas, bikos yu bin sevem mi.

Sams 9:14 Iomraidhean Croise

Sams 106:2

?Hu nao hemi save talemaot evri gudfala samting wea Yawe hemi duim? No eniwan nao, bikos hemi ovarem wanem man save tingim. ?Hu nao hemi save talem evrisamting fo preisim Yawe? No eniwan nao, bikos hem bik winim save blong man.

Sams 13:5

Bat mi trastem yu bikos lav blong yu hemi bikfala tumas. An bae mi hapi tumas, bikos yu nao bae yu sevem mi.

Sams 20:5

Nao bae mifala i hapi an gohed fo singaot bikfala taem yu winim faet. An bae mifala i selebretem disfala samting ya, an gohed fo preisim God blong yumi. Mi laekem tumas wea Yawe bae hemi givim evrisamting ya wea yu gohed fo askem long hem.

Sams 21:1

Lod Yawe, king blong mifala i hapi tumas bikos yu bin givim paoa long hem. Hemi barava hapi tumas bikos yu bin winim olketa enemi blong hem.

Sams 22:22

Nao bae mi talem olketa wantok blong mi abaotem wanem yu bin duim long mi. Ya, bae mi preisim yu taem olketa hipap fo wosipim yu.

Sams 22:25

Nao long ae blong olketa pipol blong yu, bae mi preisim yu. An long ae blong olketa wea i gohed fo wosipim yu, bae mi mekem olketa sakrifaes ya wea mi bin promisim.

Sams 35:18

Nao bae mi tengkiu long yu long ae blong olketa pipol blong yu. Ya, bae mi preisim yu tu long ae blong olketa evriwan.

Sams 35:9

Long taem ya nao, bae mi hapi fogud long Yawe, bikos hemi sevem mi.

Sams 42:4

God, taem mi bin lidim go olketa pipol long Tambuhaos blong yu, olketa hapi tumas an olketa singsing. Ya, olketa bin singsing fo preisim yu. Bat taem mi tingim olketa samting ya, tingting blong mi hemi nogud tumas nao.

Sams 51:12

Plis mekem mi hapi moa bikos yu nao yu bin sevem mi. Plis mekem mi wiling fo obeim yu.

Sams 51:15

Masta, plis yu helpem mi fo tok, an bae mi preisim yu.

Sams 6:3

?Lod Yawe, fo hao long nao bae yu weit, bifoa yu save helpem mi? Ful laef blong mi, hemi barava nogud tumas nao.

Sams 75:9

Bat bae mi gohed nomoa fo tokabaotem God blong Jekob olowe nao. An bae mi singsing fo preisim hem.

Sams 79:13

Sapos olsem, mifala hu i olsem sipsip blong yu, bae mifala talem tengkiu long yu olowe nao. Ya, mifala preisim yu evritaem olowe. (Singsing blong laen blong Asaf.)

Eksodas 3:7

Yawe hemi tok moa olsem long hem, “Mi lukim finis hao olketa pipol blong Ijip i gohed fo mekful long olketa pipol blong mi. Mi herem finis tu krae blong olketa mekem mi sevem olketa from pipol hu i mekem olketa waka olsem slev. Mi save finis tu wea olketa barava safa, an mi sore tumas long olketa.

Eksodas 3:9

Ya, krae blong olketa pipol blong mi, hemi kam kasem mi finis. An mi lukim finis olketa ravis wei wea olketa pipol blong Ijip i gohed fo mekem long olketa.

Aesaea 12:3

Bae olketa hapi tumas bikos God nao hemi sevem olketa. Ya, bae hemi olsem wea yumi hapi taem yumi save tekem gudfala wata from wanfala wel wea hemi no save finis.

Aesaea 37:22

an hem ya mesij wea mi talem finis agensim hem: !King Senakerib! Olketa pipol blong Jerusalem bae i laf long yu taem yu ranawe. Ya, bae olketa mekfan long yu.

Aesaea 62:11

Yawe hem tokaot kam olsem long evri pipol long wol, “Talem olketa pipol blong Jerusalem: !Lukim! !Sevia blong yufala hemi kam! An hemi tekem kam wetem hem praes wea hemi bin winim finis.”

Maeka 4:13

Yawe nao hemi tok olsem, “!Olketa pipol blong Jerusalem! !Yufala go an spoelem olketa! Bae mi mekem yufala strong olsem man buluka wea hon blong hem, hemi olsem aean, an lek blong hem long daon, hemi olsem bras. An bae yufala step long olketa pipol long plande kantri olsem buluka hemi step long wit fo aotem skin blong hem. An evrisamting wea olketa bin winim long faet, bae yufala save givim kam long mi Yawe, hu mi Masta blong evri pipol long wol.”

Habakuk 3:18

bat bae mi gohed nomoa fo hapi, bikos Yawe hemi God blong mi, an hem nao hemi sevem mi.

Gudnius abaotem Jisas Kraes wea Luk hemi raetem 1:47

Long tingting blong mi, mi hapi tumas long God wea hemi sevem mi.

1 Samuel 2:1

Den Hana hemi prea olsem, “!Yawe hemi mekem mi win! !Mi barava hapi tumas long disfala samting wea yu duim! Distaem mi save la-laf nomoa long olketa enemi blong mi bikos yu helpem mi.