Sams 42:9 - Pijin Bible

⁹ God, yu nao yu strongfala sefples blong mi. ?Waswe nao yu fogetem mi? ?Waswe nao mi gohed fo safa long olketa nogud samting wea olketa enemi i duim long mi?

Pijin Deuterocanon

⁹ God, yu nao yu strongfala sefples blong mi. ?Waswe nao yu fogetem mi? ?Waswe nao mi gohed fo safa long olketa nogud samting wea olketa enemi i duim long mi?

Sams 42:9 Iomraidhean Croise

Sams 13:1

?Lod Yawe, fo hao long nao bae yu gohed nomoa fo fogetem mi? ?Olowe nao? ?Fo hao long nao bae yu gohed nomoa fo haed from mi?

Sams 18:2

Yawe hemi God blong mi. Hem nao hemi sef ples blong mi, an hemi gohed fo lukaftarem mi. Hemi gohed fo gadem mi, an hemi strongfala sef ples blong mi. Hemi olsem sil wea hemi stopem aro fo no kasem mi, an hemi garem paoa fo kipim mi sef, an mi save stap gudfala.

Sams 28:1

Lod Yawe, mi krae go long yu bikos yu nao yu strongfala sef ples blong mi, plis yu herem kam krae blong mi. Sapos nomoa, bae mi dae nao ya.

Sams 38:6

Olketa sin blong mi i daonem mi finis long graon nao. So mi gohed fo krae nomoa evri de, stat long moning go-go kasem tudak.

Sams 43:2

God, yu nao yu gad blong mi. ?Waswe nao yu lusim mi? ?Waswe nao mi gohed fo safa from olketa nogud samting wea olketa enemi i duim long mi?

Sams 55:3

Mi fraet tumas long olketa strongfala toktok blong olketa enemi ya, an laef blong mi hemi nogud tumas nao long olketa nogud samting wea olketa duim long mi. Olketa ya nao i mekem trabol fo kasem mi. Ya, olketa kros long mi an heitem mi tu.

Sams 62:2

Hem nomoa hemi save gadem mi, an save sevem mi. Hemi strongfala sef ples blong mi fo haed, an olketa enemi bae i nating save winim mi.

Sams 77:9

?Waswe, God hemi no sore long mifala nao? ?Waswe, kros blong hem long mifala hemi ovam moa nao wei wea hemi kaen long mifala?”

Sams 78:35

Olketa tingim nomoa wea God hu hemi hae tumas, hem nao hemi gadem olketa an hemi sevem olketa.

Sams 88:9

Mi safa tumas, an mi krae go-go tufala ae blong mi i no lukluk gud nao. Lod Yawe, evri de nomoa mi kol go long yu, an mi liftimap han blong mi fo prea long yu.

Eklesiastes 4:1

Mi luk moa, an mi lukim olketa nogud samting wea hemi gohed long disfala wol. Mi lukim dat samfala pipol i mekem olketa narafala pipol fo safa. Olketa hu i safa, olketa krae tumas, bat no eniwan strongim tinging blong olketa. Olketa pipol hu i mekful long narafala pipol i barava strong fogud, bat no eniwan strongim tinging blong olketa hu i safa.

Aesaea 40:27

Pipol blong Israel. Yufala evriwan i tok olsem, “Yawe hemi no luksave nomoa long olketa trabol blong mi. Ya, hemi no wari nomoa taem hadtaem hemi kasem mi.” ?Waswe nao yufala komplen long Yawe olsem?

Aesaea 49:15

So, Yawe hemi tok olsem long olketa, “?Waswe, yufala tingse woman save fogetem nomoa bebi blong hem wea hemi susum? ?Yufala tingse hemi save les nomoa long pikinini blong hem wea hem seleva nao hemi bonem? !Nomoa nao! Nomata sapos wanfala woman hemi save fogetem pikinini blong hem, bat mi no save fogetem yufala.