Leta wea Pol hemi raetem go long sios long Rom 2:15 - Pijin Bible

¹⁵ Diswan hemi somaot wanem Lo hemi talem, hemi stap finis insaet long haat blong olketa. An gudfala tingting blong olketa ya hemi somaot diswan tu. Tingting blong olketa hemi mekem olketa save wanem olketa duim hemi stret o hemi no stret.

Pijin Deuterocanon

¹⁵ Diswan hemi somaot wanem Lo hemi talem, hemi stap finis insaet long haat blong olketa. An gudfala tingting blong olketa ya hemi somaot diswan tu. Tingting blong olketa hemi mekem olketa save wanem olketa duim hemi stret o hemi no stret.

Leta wea Pol hemi raetem go long sios long Rom 2:15 Iomraidhean Croise

Jenesis 20:5

Ebraham hemi gohed fo talem dat woman ya hemi sista blong hem, an woman ya tu hemi gohed fo talem dat Ebraham hemi brata blong hem. Taem mi tekem woman ya, long tingting blong mi, mi save dat mi no duim enisamting rong.”

1 Kings 2:44

Yu save finis long olketa nogud samting wea yu bin duim long dadi blong mi, Deved. So distaem Yawe hemi panisim yu long hem.

Stori abaotem Job 27:6

Tingting blong mi hemi klia nomoa. Dastawe nao mi no save givap fo talemaot wea wei blong mi hemi stret nomoa.

Eklesiastes 7:22

bikos yu save dat plande taem tu, yu bin tokspoelem olketa narafala pipol.

Gudnius abaotem Jisas Kraes wea Jon hemi raetem 8:9

Taem olketa herem toktok blong hem ya nomoa, olketa stat fo go-goaot nao, an olketa oloman nao olketa stat fo go-goaot fastaem. Olketa go olsem, go-go Jisas nomoa hemi stap, an disfala woman tu hemi stanap yet.

Aposol 23:1

Pol hemi luk stret go long olketa man long Kansol an hemi sei, “Olketa wantok blong Israel, mi nating filsem long ae blong God, bikos olowe nomoa kam kasem tude, mi bin duim kam evrisamting wea God hemi talem yumi fo duim.”

Aposol 24:16

So mi barava traehad oltaem nomoa fo mekem tingting blong mi fo no filsem long ae blong God o long ae blong olketa pipol.

Leta wea Pol hemi raetem go long sios long Rom 2:14

Olketa pipol hu i no Jiu, olketa no garem Lo blong Mosis. Bat taem olketa ya i falom tingting wea hemi semsem wetem wanem Lo blong Mosis hemi talem, hemi klia nao wea olketa garem lo long tingting blong olketa, nomata olketa no save long Lo blong Mosis.

Leta wea Pol hemi raetem go long sios long Rom 2:27

An olketa hu i falom wanem Lo hemi talem, nomata olketa no barava kate long bodi, wei blong olketa nao bae jajem yufala, bikos nomata yufala garem Lo long Buk an nomata yufala kate, yufala gohed nomoa fo brekem Lo.

Leta wea Pol hemi raetem go long sios long Rom 9:1

Mi toktru ya bikos mi blong Kraes. Mi no save laea. An Holi Spirit hemi mekem klia long tingting blong mi dat mi no laea taem mi sei

2 Korin 1:12

Mifala praod bikos tingting blong mifala hemi somaot dat mifala no falom save blong man, bat mifala falom nomoa paoa blong kaenfala lav blong God. Hemi olsem bikos mifala toktru olowe an mifala falom stretfala wei wea God hemi laekem. Oltaem, mifala duim olsem. An taem mifala stap wetem yufala, mifala bin duim olsem tu.

2 Korin 5:11

From diswan nao, mifala save hao fo tinghae long Masta, an dastawe nao mifala trae mekem olketa pipol biliv long toktok blong mifala. God hemi savegud long mifala finis, an mi tingse yufala tu i barava save finis long mifala.

1 Timoti 4:2

Olketa tising olsem ya, hemi kam falom olketa nogud wei blong olketa pipol hu i save laea tumas ya, bikos klia tingting blong olketa hemi barava dae finis nao.

Taetas 1:15

Man wea tingting blong hem hemi klin gud, hemi tingse evrisamting hemi klin an fit fo yusim. Bat eniwan wea tingting blong hem hemi no klin an no biliv long God, hemi tingse no enisamting nao hemi klin. Bikos maen blong hem an tingting blong hem hemi nogud finis.