Revelesin 7:3 - Pijin Bible

³ Hemi sei olsem long olketa, “Yufala no spoelem yet graon wetem olketa tri an si. Mifala mas putum wanfala mak long fohed blong olketa pipol blong God fastaem.”

Pijin Deuterocanon

³ Hemi sei olsem long olketa, “Yufala no spoelem yet graon wetem olketa tri an si. Mifala mas putum wanfala mak long fohed blong olketa pipol blong God fastaem.”

Revelesin 7:3 Iomraidhean Croise

Eksodas 12:13

Bat taem mi kam, sapos mi lukim blad wea yufala pendam long frem blong doa, hem nao bae hemi saen wea yufala stap long haos ya. An sapos mi lukim blad ya, bae mi pas ovarem datfala haos, an mi no panisim yufala wetem olketa pipol blong Ijip ya.

Eksodas 12:23

Taem Yawe hemi gotru long kantri fo kilim dae olketa blong Ijip, bae hemi lukim disfala blad long frem blong olketa doa. An bae hemi letem enjel blong hem hu hemi kilim olketa dae fo pas ovarem haos ya, an no go insaet long olketa haos blong yufala fo kilim yufala.

Aesaea 27:8

Hemi kea tumas long yumi an hemi makem nomoa panis blong yumi. Wei wea hemi panisim yumi, hemi olsem wea hemi fosim yumi fo lusim lan blong yumi. Ya, paoa wea hemi yusim fo fosim yumi fo goaot, hemi olsem paoa blong hot win wea hemi blou strong kam from ist.

Aesaea 54:17

Bat bae no eni wepon olsem save mekem yufala garekil. An bae yufala save ansarem olketa hu i tok agensim yufala. Ya, bae mi duim olketa gudfala samting fo yufala wakaman blong mi, an bae mi mekem yufala fo win.” Hem nao mesij blong Yawe.

Aesaea 6:13

Nomata tu-tri pipol nomoa i stap, bae mi spoelem olketa tu. Nomata olsem, niufala holi pipol blong mi bae i kamap olsem niufala tri wea hemi grouap moa from botom blong tri wea olketa katemdaon finis.”

Aesaea 65:8

“Taem lelebet wata blong grep hemi stap yet long grep frut, no eniwan save spoelem nomoa olketa frut. Hemi gohed fo mekem waen long hem. Long sem wei tu, mi no save spoelem evriwan long yufala olketa pipol blong mi. Ya, bae mi sevem yufala hu i obeim mi.

Esikiel 9:4

Hemi tok olsem long hem, “Yu go evriwea long taon ya, an putum mak long fohed blong olketa pipol hu i gohed fo sore an krae fo olketa nogud samting wea olketa narafala pipol i duim insaet long taon ya.”

Esikiel 9:6

Yufala mas kilim dae evri ol man, an evri yang man, an evri yang woman, an evri mami wetem evri pikinini blong olketa. Bat olketa hu i garem mak long fohed blong olketa, yufala mas no kilim olketa dae. Bae yufala stat kil kam long disfala Tambuhaos blong mi.” So, olketa stat long ples ya an kilim dae evri lida hu i stanap frant long Tambuhaos.

Daniel 3:17

Disfala God wea mitrifala wosipim, hemi stap. An hem nao hemi save sevem mitrifala from disfala bikfala boks wea faea hemi laet bikfala insaet, an hem save sevem mitrifala tu from paoa blong yu.

Daniel 3:26

King Nebukadnesa hemi go kolsap long bikfala boks wea faea hemi laet bikfala insaet an hemi kolaot go olsem long trifala, “!Sadrak! !Mesak! !Abednego! !Yutrifala wakaman blong God hu hemi hae tumas! !Yutrifala kamaot!” An trifala kamaot nao from faea ya.

Daniel 6:16

So, king hemi odarem olketa man fo tekem kam Daniel fo torowem hem insaet long hol wea olketa laeon i stap long hem. Taem olketa torowem hem godaon long hol ya, king hemi tok go olsem long hem, “Letem God blong yu wea yu gohed fo wosipim, hemi sevem yu.”

Sefenaea 2:3

Yufala olketa hambol pipol long disfala lan, yufala hu i obeim Yawe, yufala mas aftarem hem nomoa. Lukaotem stretfala wei, an trae fo kamap hambol nomoa. Long wei olsem, maet yufala stap sef long de wea Yawe hemi somaot kros blong hem.

Malakae 3:18

An long datfala taem, bae yufala luksave wea olketa stretfala pipol hu i obeim mi i barava deferen from olketa nogud pipol hu i nating obeim mi.? Hem nao toktok blong Yawe hu hemi garem evri paoa.

Matiu 24:22

Sapos God hemi no katemsot taem blong bikfala trabol ya, bae no eniwan save stap laef. Bat bikos God hemi laek fo helpem olketa pipol wea hemi siusim olketa finis, dastawe nao bae hemi katemsot disfala taem ya.

Matiu 24:31

An wanfala trampet bae olketa bloum bikfala fo sendemaot olketa enjel blong mi fo go long evri ples long disfala wol, stat long wanfala en go-go kasem nara en, fo olketa tekem kam olketa pipol wea mi siusim olketa finis.”

Gudnius abaotem Jisas Kraes wea Jon hemi raetem 12:26

Eniwan hu hemi waka fo mi, hemi mas falom mi nao, mekem wakaman blong mi hemi stap long ples wea mi stap long hem. An eniwan hu hemi waka fo mi bae Dadi blong mi hemi tinghae long hem ya.”

Gudnius abaotem Jisas Kraes wea Jon hemi raetem 3:33

Bat man hu hemi bilivim hem, hemi somaot dat wanem God hemi talem, hemi barava tru ya.

Leta wea Pol hemi raetem go long sios long Rom 6:22

Bat distaem, God hemi mekem yufala fri finis from paoa blong sin an hemi mekem yufala kamap wakaman blong hem. An frut wea hemi kamaot long diswan hemi olsem, laef blong yufala hemi kamap holi an yufala garem tru laef wea hemi no save finis.

Revelesin 13:16

An evri pipol, nomata bikman o man nating, nomata ris man o pua man, nomata fri man o slev, evriwan nao, mektu wael animol ya hemi fosim olketa fo garem wanfala mak long raet han o long fohed blong olketa.

Revelesin 13:17

Nao sapos eniwan hemi no garem disfala mak ya, hemi no save baem enisamting o salem enisamting. An disfala mak ya hemi nem blong wael animol ya, o hemi namba wea hemi saen fo nem blong hem.

Revelesin 14:1

Nao mi luk go moa, an mi lukim Smolfala Sipsip ya hemi stanap antap long maonten long Saeon, an 144,000 pipol ya i stanap wetem hem. An nem blong Smolfala Sipsip ya wetem nem blong Dadi blong hem, hemi stap long fohed blong olketa pipol ya.

Revelesin 14:9

Nao mi lukim moa mektri enjel wea hemi kam bihaen long tufala enjel ya, an hemi singaot olsem, “Sapos eni man hemi wosipim wael animol ya wetem kaving blong hem, an hemi tekem disfala mak blong wael animol ya long fohed o long raet han blong hem,

Revelesin 19:2

An olketa wei blong hem fo jajem olketa pipol hemi tru an hemi barava stret. Hemi jajem finis disfala barava nogud juri ya. Disfala ravis wei blong juri ya fo durong wetem eniwan, hemi spoelem tingting blong olketa pipol long wol. God hemi bin panisim juri ya bikos hemi kilim dae olketa wakaman blong God.”

Revelesin 20:4

An mi lukim moa samfala tron. An mi lukim tu olketa spirit blong olketa pipol wea olketa bin katemaot hed blong olketa bifoa, bikos olketa bin talemaot tru toktok abaotem Jisas an olketa bin obeim toktok blong God. Olketa ya, olketa no wosipim wael animol ya o kaving blong hem. An olketa no tekem tu disfala mak blong wael animol ya long fohed o long han blong olketa. Olketa laefbaek moa long taem ya, an God hemi mekem olketa fo sidaon long olketa tron fo rulim olketa pipol. Olketa stap fo rul wetem Kraes fo 1,000 yia.

Revelesin 22:4

An olketa bae lukim fes blong hem olowe, an nem blong hem bae hemi stap long fohed blong olketa.

Revelesin 6:6

Nao mi herem olsem wanfala toktok long midol long olketa fofala animol ya, wea hemi sei olsem, “Bae olketa pipol sot tumas long kaikai, mekem wejis fo wan fulde bae hemi fit fo baem wanfala smol sosa flaoa blong wit, o sapos flaoa blong bali bae hemi fitim nomoa trifala smol sosa. Bat yu mas no spoelem olketa oliv tri an olketa grep tri blong olketa.”

Revelesin 7:1

Bihaen, mi lukim moa fofala enjel wea olketa gohed fo stanap long fofala kona blong wol ya. Olketa stanap fo satem fofala win long wol, mekem no eni win hemi save blou kam long graon an long olketa tri an long si.

Revelesin 7:2

Nao mi lukim nara enjel wea hemi stat kamap long saet long ist, an hemi holem samting fo putum mak long pipol blong God hu hemi laef. Enjel ya hemi singaot go long nara fofala enjel ya, wea God hemi givim paoa long olketa finis, mekem olketa save spoelem graon wetem si ya.

Revelesin 9:4

An olketa talem olketa grashopa ya fo no spoelem olketa gras an olketa tri an olketa nara plant. Bat olketa letem olketa fo spoelem nomoa olketa pipol wea mak blong God hemi no stap long fohed blong olketa.