Provebs 4:15 - Pijin Bible

¹⁵ !No falom wei ya! !Yu mas tane go long deferen wei!

Pijin Deuterocanon

¹⁵ !No falom wei ya! !Yu mas tane go long deferen wei!

Provebs 4:15 Iomraidhean Croise

Stori abaotem Job 11:14

Yu mas lusim olketa nogud wei blong yu, an yu mas no letem eni ravis samting fo gohed long ples blong yu.

Stori abaotem Job 22:23

Taem yu tane gobaek long God hu hemi garem evri paoa, an yu aotem ravis wei from laef blong yu, bae yu kamap gud moa.

Eksodas 23:7

An yufala mas no laea agensim narafala man long kot. An yufala mas no kilim dae man fo panisim hem sapos hemi stretfala man wea hemi no duim eni rong samting, bikos wei ya hemi barava nogud tumas, an bae mi no save fogivim olketa hu i duim olsem.

Provebs 1:15

San, stap farawe from pipol olsem, no go wetem olketa.

Provebs 24:1

Yu no joles long olketa ravis man, yu mas les fo fren wetem olketa.

Provebs 4:14

No falom nogud wei, an no falom wei blong ravis pipol.

Provebs 4:16

Olketa ya no save slip gogo olketa duim eni nogud samting, o spoelem narafala man.

Provebs 5:8

Stap farawe from kaen woman olsem, no go kolsap long haos blong hem.

Provebs 6:5

Kamaot from trap ya olsem wanfala bed wea hemi flae aot, o animol wea hemi ranawe from man i laek sutim hem.

Aesaea 33:15

Olketa pipol hu i falom stretfala wei an oltaem talem olketa tru toktok, olketa ya nao i olsem: Olketa no yusim paoa blong olketa fo fosim pipol fo givim seleni long olketa, an olketa no letem narafala pipol fo nilam olketa fo seleni, an olketa nating joen wetem olketa pipol hu i plan fo kilim dae olketa narafala pipol. Ya, olketa nating tingim nao fo duim enikaen ravis samting.

Efesas 5:11

Yufala mas no duim olketa samting blong tudak, wea hemi olketa ravis samting nomoa. Bat yufala mas somaot nomoa long olketa pipol wea diskaen wei hemi nogud.

1 Tesalonaeka 5:22

an olketa nogud samting yufala mas no falom.