Nehemaea 2:17 - Pijin Bible

¹⁷ Bat long taem ya nao, mi tok olsem long olketa, “Olketa. Yufala lukim finis dat bikfala trabol hemi kasem yumi. Bikfala wolston blong taon ya hemi brek olobaot an hemi foldaon, an olketa geit ya i bone finis. Yumi mas wakembaek moa disfala wolston, mekem yumi no gohed fo sem long hem.”

Pijin Deuterocanon

¹⁷ Bat long taem ya nao, mi tok olsem long olketa, “Olketa. Yufala lukim finis dat bikfala trabol hemi kasem yumi. Bikfala wolston blong taon ya hemi brek olobaot an hemi foldaon, an olketa geit ya i bone finis. Yumi mas wakembaek moa disfala wolston, mekem yumi no gohed fo sem long hem.”

Nehemaea 2:17 Iomraidhean Croise

Esra 9:9

Mifala stap olsem slev, bat yu God blong mifala, yu no lusim mifala. Yu tinghevi tumas long mifala, mekem king blong Pesia hemi helpem mifala, olsem wea hemi givim niu laef long mifala. Hemi helpem mifala fo save wakembaek moa Tambuhaos blong yu, wea olketa enemi blong mifala bin spoelem. An hemi gadem mifala from olketa enemi, olsem wea hemi wakem bikfala wolston raonem Jerusalem an olketa narafala ples long Jiuda.

Nehemaea 1:3

Nao olketa tok olsem long mi, “Evriwan long yumi hu i stap laef yet an bin gobaek long distrik long Jiuda, trabol nao hemi kasem mifala ya, an mifala sem tumas. Bikfala wolston blong Jerusalem ya hemi kamap nogud, an olketa geit blong hem i bone nogud long faea.”

Nehemaea 2:13

Long datfala naet, mifala gotru long Vali Geit wea hemi long west saet long taon, an mifala go saot falom wolston ya fo go long Wael Dog Springwata an Geit fo Tekemaot Ravis wea hemi long saot en long wolston. Mifala lukim olketa ples long wolston wea olketa enemi bin brekemdaon bifoa, wetem olketa geit wea olketa bin bonem finis.

Nehemaea 2:16

Olketa bikman long Jerusalem i no save wanem nao bin mi duim, o wea nao mi bin go long hem, bikos kam kasem datfala taem, mi no talemaot plan blong mi long olketa Jiu, nomata olketa i prist, o lida, o bikman, o eniwan hu bae hemi duim olketa waka long wolston ya.

Nehemaea 3:15

Salum, san blong Kolose, hu hemi bikman long distrik long Mispa, hemi wakembaek moa Springwata Geit. Hemi putum ruf antap long hem, an hangem tufala bikfala doa blong hem, an hemi putum tu olketa aean ba long tufala doa, an bikfala timba tu wea olketa yusim fo lokem tufala doa long geit ya. Hemi wakembaek tu wolston raonem Pul long Siloa, wea hemi kolsap long gaden blong king. An hemi wakem neks haf long bikfala wolston go kasem bikfala lada wea hemi kamdaon from olo haf blong Jerusalem, wea olketa kolem Biktaon blong Deved.

Sams 102:15

Evri pipol long olketa kantri bae i tinghae long Yawe. Ya, evri king long wol tu bae i mekhae long bikfala paoa blong hem.

Sams 44:13

Olketa wea i stap raonem mifala i lukim samting wea yu bin duim, nao olketa tokspoelem mifala, an mekfan long mifala.

Sams 44:14

Yu bin mekem mifala fo olsem wanfala samting wea olketa pipol long olketa narafala kantri fo tokspoelem nomoa, olketa gohed fo luk raf long mifala an fo la-laf long mifala.

Sams 79:12

Masta, olketa pipol long olketa narafala kantri i tokspoelem yu. Plis yu panisim olketa olowe fo olketa ravis toktok ya.

Sams 79:4

Olketa hiden pipol hu i stap raonem mifala i tokspoelem mifala, an olketa gohed fo la-laf an mekfan long mifala.

Jeremaea 24:9

Bae mi barava mekful long olketa, mekem pipol long olketa narafala kantri long wol i seke fogud long olketa. Bae mi ronem olketa ya olobaot, an evriwea olketa stap, bae olketa pipol long ples ya i mekfan long olketa, an tokspoelem olketa nogud. An bae pipol i gohed fo yusim nogud nem blong olketa fo mekem trabol hemi kam long man.

Lamentesin 2:2

Evri haos long olketa vilij long Jiuda, Masta ya hemi no sore long olketa. Hemi kros tumas an brekemdaon evri strongfala sefples fo haed long lan ya. Hemi spoelem finis kantri ya wetem evri bikman, mekem olketa pipol i sem fogud.

Lamentesin 3:51

Taem mi lukim trabol wea hemi kasem olketa woman blong disfala taon, mi barava sore an krae fogud.

Esikiel 5:14

“Bae mi barava kros fogud long yufala, mekem mi panisim yufala nogud. Bae mi spoelem yufala finis. An taem pipol gotru long lan blong yufala an lukim wanem hemi hapen long dea, bae olketa seke fogud, an bae yufala olsem wanfala bik woning long olketa. Taem pipol long olketa narafala kantri raonem yufala i tingim yufala, bae olketa mekfan long yufala an barava toknogud long yufala.

Maeka 7:11

Olketa pipol blong Jerusalem. Hemi kolsap kasem taem nao fo bildimbaek moa bikfala wolston blong disfala taon. Long datfala taem, bae lan blong yufala hemi bikfala moa.

1 Samuel 11:2

Bat hemi tok olsem, “Hem oraet. Mi save mekem agrimen wetem yufala. Bat wanfala samting nomoa, mi mas pulumaot raet ae blong yufala evriwan fo mekem evriwan long Israel i filsem tumas.”