Nehemaea 12:27 - Pijin Bible

²⁷ Taem mifala redi fo mektambu long bikfala wolston blong Jerusalem, olketa go lukaotem olketa Livaet long olketa ples blong olketa, fo tekem olketa kam long Jerusalem fo selebretem bikde ya. Olketa kam fo singim olketa preis singsing an fo pleim miusik long olketa simbol an olketa deferen kaen gita.

Pijin Deuterocanon

²⁷ Taem mifala redi fo mektambu long bikfala wolston blong Jerusalem, olketa go lukaotem olketa Livaet long olketa ples blong olketa, fo tekem olketa kam long Jerusalem fo selebretem bikde ya. Olketa kam fo singim olketa preis singsing an fo pleim miusik long olketa simbol an olketa deferen kaen gita.

Nehemaea 12:27 Iomraidhean Croise

2 Samuel 6:12

Oraet, King Deved hemi herem nius wea Yawe hemi blesim Obed-Idom wetem famili blong hem an evrisamting wea hemi garem, bikos Tambu Boks hemi stap long haos blong hem. So hemi go tekemaot Tambu Boks from hem moa, mekem hemi tekem kam long Biktaon blong Deved. An hem wetem olketa pipol blong hem i hapi tumas, an olketa gohed fo dans.

1 Kings 8:63

Olketa kilim dae 22,000 buluka an 120,000 sipsip, fo mekem sakrifaes fo somaot dat olketa stapgud wetem Yawe. Long disfala wei, king wetem olketa pipol blong hem i mektambu long Tambuhaos blong Yawe.

1 Kronikols 13:8

Oraet, Deved an plande pipol blong Israel i barava dans fogud, an singsing fo liftimap nem blong God. An olketa gohed fo ringim olketa kaen gita, an tamborin, an smolfala dram, an simbol blong olketa.

1 Kronikols 15:12

Hemi tok olsem long olketa, “Yufala nao i olketa lida long olketa Livaet. Yufala an olketa wantok blong yufala mas mekem yufala seleva klin long ae blong Yawe. Den disfala Tambu Boks blong Yawe, God blong Israel, yufala save karim hem kam long ples wea mi redim finis fo hem.

1 Kronikols 15:16

An Deved hemi talem olketa lida blong olketa Livaet fo siusim samfala man fo singsing, an ringim olketa deferen kaen gita, an simbol fo singim olketa hapi singsing.

1 Kronikols 15:28

So taem evriwan long Israel i tekem kam Tambu Boks long Spesol Agrimen blong Yawe long Jerusalem, olketa gohed fo singaot bikfala, an barava hapi fogud. An olketa gohed fo bloum olketa kaen trampet, an ringim olketa simbol, an ringim enikaen gita.

1 Kronikols 15:4

An hemi kolem kam olketa long laen blong Eron, an olketa nara Livaet.

1 Kronikols 16:42

Heman an Jedutun i lukaftarem olketa hu i bloum olketa trampet, an ringim olketa simbol, an pleim olketa narafala samting fo mekem miusik fo wosipim God. An olketa long laen blong Jedutun i gohed fo gadem geit blong tambuples ya.

1 Kronikols 16:5

Hemi siusim Asaf mekem hemi lida blong olketa. Sekaraea hemi mektu lida. Nem blong olketa hu i gohed fo ringim olketa kaen gita i olsem: Jeel, an Semiramot, an Jehiel, an Matitaea, an Eliab, an Benaea, an Obed-Idom, an wanfala narafala Jeel. Asaf nao hemi ringim simbol.

1 Kronikols 23:5

An 4,000 man mas gadem Tambuhaos. An 4,000 man mas preisim Yawe long miusik wea olketa mekem long olketa samting wea mi nao mi givim long olketa.”

1 Kronikols 26:31

Long datfala taem, olketa rekod long laen blong Hebron som dat Jeria hemi lida blong olketa ya. Nao long mekfoti yia wea Deved hemi king, olketa man blong hem i lukluk moa long rekod blong laen blong Hebron, an olketa faendemaot wea hemi garem olketa nambawan man long taon long Jasa long provins long Gilead.

2 Kronikols 29:25

Oraet, king hemi talem olketa Livaet fo tekem olketa kaen gita an olketa simbol, an stap long ples blong olketa long Tambuhaos falom rul blong Yawe wea King Deved, an Profet Gad, an Profet Natan bin talemaot.

2 Kronikols 29:30

King Hesekaea an olketa bikman blong hem i talem olketa Livaet fo singim olketa singsing wea King Deved an Profet Asaf i bin raetem. So olketa hapi tumas fo preisim Yawe long olketa singsing ya, an olketa gohed fo baodaon an wosipim Yawe.

2 Kronikols 5:13

Nao olketa man fo singsing i gohed fo singsing, an olketa prist i gohed fo bloum olketa trampet, an olketa narafala man i gohed fo pleim simbol an gita. Olketa nao i mekem singsing blong olketa fo barava here gudfala tumas. Olketa singsing fo preisim Yawe olsem, “Hemi gud tumas, an hemi tinghevi long yumi olowe.” Den wanfala klaod hemi fulumapem Tambuhaos,

2 Kronikols 7:6

Long datfala taem, olketa prist i stanap long wansaet long ples blong olketa, an bloum olketa trampet. Long narafala saet olketa Livaet i stanap long ples blong olketa, an olketa pleim miusik long olketa samting wea King Deved hemi bin mekem. Olketa yusim taem olketa singsing olsem, “!Hemi tinghevi long yumi olowe!” Olketa narafala pipol i gohed fo stanap.

Esra 6:16

Olketa prist wetem olketa Livaet an olketa narafala pipol blong Israel hu i kambaek from Babilonia, olketa mektambu long Tambuhaos ya blong God. Olketa hapi tumas, an mekem bikfala bikde fo selebretem.

Nehemaea 11:20

Olketa narafala pipol blong Israel, wea samfala i prist, an samfala i Livaet, olketa ya gohed fo stap long ples blong olketa famili long olketa taon long Jiuda, long graon wea olketa seleva i onam.

Nehemaea 12:43

Long datfala de, mifala mekem plande sakrifaes, an mifala evriwan i hapi tumas, bikos God hemi mekem mifala hapi. Olketa woman an olketa pikinini tu i hapi, an hapi noes wea mifala evriwan gohed fo mekem, olketa hu i stap farawe save herem nomoa.

Nehemaea 8:17

Evriwan wea i kambaek from Babilonia, olketa wakem olketa smolfala lif haos, an stap long hem. Stat long taem blong Josua, san blong Nun, kam kasem datfala de, olketa long laen blong Israel i nating bin mekem bikde ya bikfala olsem. An olketa evriwan i hapi tumas.

Sams 149:3

Yumi mas dans fo preisim nem blong hem, an yumi mas bitim olketa dram an ringim olketa gita fo preisim hem.

Sams 30:1

Lod Yawe mi preisim yu bikos yu bin sevem mi, an yu no letem olketa enemi blong mi, fo mekfan long mi.

Diutronomi 16:11

Yufala wetem olketa pikinini, an olketa wakaman an wakamere, an olketa Livaet long taon blong yufala, an olketa strensa, an olketa pikinini wea no garem dadi, an olketa wido, yufala evriwan ya mas go fo barava hapi long tambuples wea Yawe hemi siusim fo mekem nem blong hem i stap long hem.

Diutronomi 20:5

“Den olketa bikman mas tok olsem long olketa soldia, ‘Sapos eniwan long yufala hemi wakem niufala haos, bat olketa no mektambu long haos ya yet, oraet, hemi mas gobaek fo stap long hem. Nogud hemi dae long faet an narafala man hemi mektambu long haos an stap long hem.

Filipae 4:4

Yufala mas barava hapi olowe bikos yufala joen finis wetem Masta. Mi talem yufala moa, yufala mas hapi nomoa.

Revelesin 5:8

An taem hemi tekem skrol ya, fofala animol ya wetem tuenti-foa bikman ya, olketa nildaon long frant long Smolfala Sipsip ya fo mekhae long hem. Evriwan olketa garem gita, an olketa holem tu olketa gol baol. Olketa baol ya olketa fulap long insens wea hemi olsem olketa prea blong olketa pipol blong God.