Nambas 2:2 - Pijin Bible

² “Evritaem yufala stap long eni ples, yufala mas putumap haostent blong yufala raonem Tambu Haostent, bat olketa mas stap farawe lelebet long Tambu Haostent ya. An yufala mas garem flag fo makem traeb blong yufala, an olketa man mas putumap olketa haostent blong olketa raonem flag blong traeb blong olketa, an raonem flag blong laen blong olketa tu.

Pijin Deuterocanon

² “Evritaem yufala stap long eni ples, yufala mas putumap haostent blong yufala raonem Tambu Haostent, bat olketa mas stap farawe lelebet long Tambu Haostent ya. An yufala mas garem flag fo makem traeb blong yufala, an olketa man mas putumap olketa haostent blong olketa raonem flag blong traeb blong olketa, an raonem flag blong laen blong olketa tu.

Nambas 2:2 Iomraidhean Croise

Sams 74:4

Olketa enemi blong yu i bin singaot bikfala insaet long Tambuhaos blong yu, bikos olketa winim mifala finis long faet. An olketa putumap finis olketa flag blong olketa long ples ya, fo somaot dat olketa winim mifala finis.

Sams 76:11

Yawe hemi God blong yumi wea evriwan mas fraetem. Yufala evriwan long evri kantri wea i stap kolsap long Israel mas givim go olketa samting wea yufala bin promisim fo givim long hem. An yufala mas tekem kam olketa presen long hem.

Aesaea 12:6

!Yumi olketa pipol blong Saeon, yumi mas singaot bikfala! !Yumi mas singsing bikos yumi hapi! Bikos Holi God blong yumi long Israel, hemi garem bikfala paoa, an hemi stap wetem yumi nao.”

Aesaea 18:3

!Olketa pipol long wol! !Yufala lukluk! Bae olketa pipol i putumap flag antap long olketa maonten mekem yufala save lukim. !An yufala mas redi an luk go long samting ya! Bae olketa bloum trampet fo mekem saen. !So yufala mas redi fo herem samting ya!

Esikiel 43:7

Hemi tok olsem, “Man blong graon. Hem nao bikfala sea blong mi wea mi sidaon olsem king. An bae mi stap wetem yufala blong Israel fo rul evritaem olowe nao. Olketa blong Israel wetem olketa king blong olketa, i bin aftarem olketa ravis god, an wosipim olketa kaving wea i nating laef, wea olketa king bin putumap long olketa tambuples. Bat bae olketa nating save mekravis moa olsem long holi nem blong mi.

Sekaraea 9:16

Long datfala de, Yawe bae hemi sevem olketa pipol blong hem, olsem man fo lukaftarem sipsip hemi lukaftarem olketa sipsip blong hem. Bae olketa stap gudfala olobaot long lan blong hem olsem olketa barava spesol ston i saen long kraon blong king.

Nambas 1:50

Waka blong traeb blong Livae hemi fo lukaftarem Tambu Haostent wetem evrisamting wea i stap long hem. Oltaem olketa mas putumap evri haostent blong olketa raonem Tambu Haostent, an sapos yufala muv go long narafala ples, olketa ya mas karim Tambu Haostent wetem evrisamting. Bae olketa nomoa mas tekemaot Tambu Haostent, an mas putumap moa long eni ples wea bae yufala go long hem. Bat sapos eni narafala man hemi kam insaet long tambuples, yufala mas kilim hem dae.

Nambas 10:14

Olketa hu i stap andanit long flag blong traeb blong Jiuda, olketa nao i muvaot fastaem. Nason, san blong Aminadab, hem nao hemi lidim olketa long traeb blong Jiuda.

Nambas 10:18

Neks grup fo wakabaot go, olketa hu i stap andanit long flag blong traeb blong Ruben. Elisua, san blong Sedeua, hemi lidim olketa long traeb blong Ruben.

Nambas 10:22

Neks grup fo wakabaot go, olketa hu i stap andanit long flag blong traeb blong Efrem. Elisama, san blong Amihud, hemi lidim olketa long traeb blong Efrem.

Nambas 10:25

An las grup fo wakabaot go, olketa hu i stap andanit long flag blong traeb blong Dan. Olketa ya i stap long tugeta long bihaen, fo gadem olketa evriwan. Ahiesa, san blong Amisadae, hemi lidim olketa long traeb blong Dan.

Nambas 2:1

Yawe hemi tok moa olsem long Mosis wetem Haeprist Eron,

Nambas 2:10

“An olketa long traeb blong Ruben mas putumap olketa haostent blong olketa long saet long saot, wetem flag blong olketa. Olketa mas stap long olketa laen blong olketa, wetem olketa lida blong olketa. “Long traeb blong Ruben, lida blong olketa nao Elisua, san blong Sedeua.

Nambas 2:3

“Olketa long traeb blong Jiuda mas putumap olketa haostent blong olketa long saet long ist, wetem flag blong olketa. Olketa mas stap long olketa laen blong olketa, wetem olketa lida blong olketa. Long traeb blong Jiuda, lida blong olketa nao Nason, san blong Aminadab.

Nambas 24:2

Hemi lukim ples wea olketa haostent blong evri traeb blong Israel i stap long hem. Den Spirit blong God hemi kam long hem,

1 Korin 14:33

Bikos God hemi no laekem yumi fo enihao nomoa long olketa samting long sios, bat hemi laekem yumi fo stap gudfala tugeta. Olsem olketa pipol blong God long evri sios olketa tingim finis,

1 Korin 14:40

An yufala mas duim evrisamting long gudfala wei, wea evriwan olketa save hapi long hem.

Filipae 1:27

Yufala ya mas meksua dat wei blong yufala hemi falom disfala Gudnius blong Kraes. So nomata mi kam fo lukim yufala o nomoa, bae mi laek fo herem kam dat yufala i gohed strong tugeta long semkaen tingting nomoa, an yufala waka tugeta fo helpem olketa pipol fo biliv long Gudnius.

Kolosi 2:19

bat hemi no stap strong long Kraes. Kraes nao hemi hed blong sios, an sios nao hemi olsem bodi blong hem. An hed ya nao hemi save mekem evri haf long bodi fo olketa grou strong an joen gud tugeta wetem olketa bon an string blong hem. An long wei ya nao, bodi blong Kraes ya hemi grouap gudfala olsem God hemi laekem.

Josua 3:4

Yumi no kasem disfala ples bifoa, so bae olketa som rod long yumi fo falom. Bat yufala mas no go kolsap long Tambu Boks ya. Yufala mas stap farawe from hem, samting olsem wan kilomita.”