Gudnius abaotem Jisas Kraes wea Mak hemi raetem 11:23 - Pijin Bible

²³ Ya, mi talem yufala tru samting nao, sapos wanfala man hemi no garem tufala tingting bat hemi biliv wea wanem hemi talem hemi save kamtru, bae hemi save talem go long hil ya olsem, ‘Yu getap an jam go long solwata ya.’ An bae disfala samting ya hemi mas kamtru nao.

Pijin Deuterocanon

²³ Ya, mi talem yufala tru samting nao, sapos wanfala man hemi no garem tufala tingting bat hemi biliv wea wanem hemi talem hemi save kamtru, bae hemi save talem go long hil ya olsem, ‘Yu getap an jam go long solwata ya.’ An bae disfala samting ya hemi mas kamtru nao.

Gudnius abaotem Jisas Kraes wea Mak hemi raetem 11:23 Iomraidhean Croise

Sams 37:4

Yu mas faendem hapi blong yu long Yawe, an bae hemi givim yu olketa samting wea yu laekem tumas.

Matiu 14:13

Taem Jisas hemi herem dat Jon Baptaes hemi dae finis, hemi go insaet long wanfala bot an hemi go seleva long wanfala ples wea no eniwan stap long hem. Bat taem olketa pipol herem nius abaotem ples wea Jisas hemi go long hem, olketa lusim olketa taon nomoa an olketa wakabaot go bihaen long hem.

Matiu 17:20

Nao Jisas hemi tok olsem long olketa, “Hemi olsem bikos biliv blong yufala hemi smolfala tumas. Mi talem yufala tru samting nao, nomata yufala garem biliv wea hemi smolfala olsem sid blong mastad tri, bae yufala save tok olsem long disfala maonten ya, ‘Yu muv go long nara ples.’ An bae hemi muv go ya. So bae no enisamting hemi save had fo yufala duim.”

Matiu 21:21

Nao Jisas hemi sei long olketa, “Mi talem yufala tru samting nao, sapos yufala biliv long God an yufala no garem tufala tingting, bae yufala save duim olketa samting wea hemi winim moa wanem mi duim long fig tri ya. Nomata disfala hil sapos yufala sei long hem, ‘Yu getap an jam go long solwata ya,’ bae hemi hapen nomoa ya.

Gudnius abaotem Jisas Kraes wea Luk hemi raetem 17:6

Nao Masta hemi ansarem olketa olsem, “Nomata yufala garem biliv wea hemi smolfala olsem sid blong mastad tri, yufala save tok long tri longwe olsem, ‘Yu pulum yu seleva aot from graon, an yu go an plantem yu seleva insaet long solwata.’ An bae hemi save obeim yufala nao ya.”

Gudnius abaotem Jisas Kraes wea Jon hemi raetem 14:13

An bae mi duim enisamting wea yufala askem long nem blong mi. Long wei ya nao, bae olketa luksave long saen blong bikfala paoa blong God bikos long San blong hem.

Gudnius abaotem Jisas Kraes wea Jon hemi raetem 15:7

Sapos yufala joen olowe long mi an olketa toktok blong mi hemi stap olowe long yufala, yufala save askem enisamting wea yufala laekem an bae God hemi givim long yufala.

1 Korin 13:2

Nomata mi save talemaot eni mesij blong God, an nomata mi save long evrisamting wea hemi staphaed an mi garem evri save moa, an nomata mi garem strongfala biliv fo muvum olketa maonten, bat sapos mi no lavem olketa pipol, mi samting nating nomoa ya.