Matiu 13:30 - Pijin Bible

³⁰ Letem olketa grou tugeta nomoa, go-go kasem taem wit hemi redi. Long taem ya nao bae mi talem long olketa wakaman fo go pulumaot olketa ravis gras ya fastaem, an fo taemap olketa long olketa hip fo bonem long faea. Bat olketa wit ya, bae olketa tekem kam fo fulumap insaet long haos blong mi wea mi kipim olketa kaikai long hem.’”

Pijin Deuterocanon

³⁰ Letem olketa grou tugeta nomoa, go-go kasem taem wit hemi redi. Long taem ya nao bae mi talem long olketa wakaman fo go pulumaot olketa ravis gras ya fastaem, an fo taemap olketa long olketa hip fo bonem long faea. Bat olketa wit ya, bae olketa tekem kam fo fulumap insaet long haos blong mi wea mi kipim olketa kaikai long hem.’”

Matiu 13:30 Iomraidhean Croise

2 Samuel 23:7

Nilagras olsem, man mas yusim aean huk o spia fo karim go an bonem long faea.

Stori abaotem Job 39:12

?Waswe, yu tingse bae hemi karim olketa kaikai from gaden blong yu, an tekem kam long ples fo aotem skin blong wit? !Nomoa nao!

Aesaea 17:5

Long taem ya, bae Yawe hemi aotem finis olketa pipol olsem wea man hemi go aotem evri kaikai long gaden blong hem. Bae hemi olsem olketa gaden blong yufala long gudfala graon long vali long Refaem, wea yufala go aotem kam nao evri kaikai wea hemi stap long hem.

Malakae 3:18

An long datfala taem, bae yufala luksave wea olketa stretfala pipol hu i obeim mi i barava deferen from olketa nogud pipol hu i nating obeim mi.? Hem nao toktok blong Yawe hu hemi garem evri paoa.

Matiu 13:25

Taem evriwan i slip, enemi blong hem hemi kam fo plantem olketa sid blong ravis gras long midol long olketa wit ya, an bihaen, hemi go nao.

Matiu 13:29

Bat hemi sei, ‘Nomoa, yufala no duim olsem, nogud yufala pulumaot wit ya tu taem yufala pulumaot olketa ravis gras.

Matiu 25:32

An bae evri pipol blong evri kantri long wol, olketa hipap kam long frant blong mi. An bae mi divaedem olketa long tufala deferen seksin olsem wea man fo lukaftarem sipsip hemi divaedem olketa sipsip fo stap deferen from olketa nanigot.

Matiu 25:41

“Bihaen moa, bae mi tok olsem long olketa pipol hu olketa stap long lefsaet blong mi, ‘Yufala wea God bae hemi panisim yufala, yufala goawe from mi. Ples blong yufala nao hemi longwe insaet long faea wea hemi no save finis ya, wea God hemi mekredi fo Seitan an olketa enjel blong hem.

Matiu 3:12

Bikos hem nao hemi garem paoa fo jajem evriwan. Hemi olsem wanfala wakaman wea hemi klinim olketa frut blong wit, mekem olketa stap deferen from skin blong olketa. Bae hemi tekem olketa gudfala frut ya an putum olketa insaet long haos blong hem. Bat olketa skin blong wit ya bae hemi bonem long faea wea hemi no save dae.”

Gudnius abaotem Jisas Kraes wea Luk hemi raetem 3:17

Bikos hem nao hemi garem paoa fo jajem evriwan. Hemi olsem wakaman fo klinim olketa frut blong wit, mekem olketa stap deferen from skin blong olketa. Bae hemi tekem olketa frut ya an putum insaet long haos blong hem. Bat olketa skin blong wit ya, bae hemi bonem long faea wea hemi no save dae.”

Gudnius abaotem Jisas Kraes wea Jon hemi raetem 15:6

Man hu hemi no stap joen long mi, bae hemi olsem brans wea olketa tekemaot an torowem, an hemi dae nao. Olketa brans olsem, bae olketa hipimap tugeta an bae olketa torowem go insaet long faea.

1 Korin 4:5

So yufala mas no jajem pipol, bikos hemi no taem fo God hemi jajem olketa yet. Yufala mas wetem Masta fo bae hemi kam fastaem. Hem nao bae hemi mekem olketa samting wea i staphaed long tudak fo i kamaot long delaet, an bae hemi mekem evri tingting blong olketa pipol i kamap klia. Long taem ya nao, bae God hemi save mekhae long olketa pipol, fitim wei blong olketa.

1 Timoti 5:24

Olketa sin blong samfala pipol i stap klia nomoa ya, an kuiktaem nomoa olketa pipol i save jajem olketa. Bat olketa sin blong samfala pipol moa i staphaed, an long bihaen nomoa, olketa sin ya bae kamap klia.

1 Samuel 25:29

Nomata eniwan hemi ronem yu fo kilim yu dae, Yawe save kipim yu sef olsem man wea hemi lukaftarem olketa gudfala samting blong hem. Bat bae hemi torowem olketa enemi blong yu olsem man hemi slingim ston.