Matiu 1:12 - Pijin Bible

¹² Jehoeakin hemi dadi blong Sialtiel hu hemi stap taem olketa pipol blong Israel olketa stap kam long Babilon, an Sialtiel hemi dadi blong Serababel,

Pijin Deuterocanon

¹² Jehoeakin hemi dadi blong Sialtiel hu hemi stap taem olketa pipol blong Israel olketa stap kam long Babilon, an Sialtiel hemi dadi blong Serababel,

Matiu 1:12 Iomraidhean Croise

2 Kings 24:14

An hemi fosim evriwan fo lusim Jerusalem. Olketa fosim aot olketa bikman an olketa komanda, an olketa wakaman hu i save duim waka long aean an long timba. Olketa evriwan i kasem olsem 10,000 pipol. Hemi lusim nomoa olketa pua pipol, olketa nao stap long lan blong Jiuda.

2 Kings 25:27

Long mekteti-seven yia wea King Jehoeakin blong Jiuda hemi stap long prisin yet long Babilon, King Evil-Merodak hemi kamap king blong Babilonia. Nao long sem yia, long mektuel mans, long mektuenti-seven de blong hem, king ya hemi tekemaot King Jehoeakin from prisin ya, an letem hem fo go fri.

1 Kronikols 3:17

King Jehoeakin wea olketa tekem hem go long prisin long Babilon, hemi garem sevenfala san. Olketa nao i Sealtiel,

Esra 3:2

Nao Haeprist Jesua, san blong Jehosadak, wetem olketa narafala prist, an Serababel, san blong Sealtiel, wetem olketa long laen blong hem, olketa wakembaek moa olta blong God blong Israel, mekem olketa save bonem olketa sakrifaes long hem, barava falom wei wea hemi stap long Lo blong Mosis, man blong God.

Esra 5:2

Taem tufala Serababel, san blong Sealtiel, an Haeprist Jesua, san blong Jehosadak, i herem olketa profesi ya, tufala statem moa disfala waka long Tambuhaos ya blong God long Jerusalem. An tufala profet ya blong God i helpem olketa.

Nehemaea 12:1

Taem Serababel, san blong Sealtiel, wetem Haeprist Jesua, tufala kambaek from Babilonia, plande prist and Livaet i kambaek wetem tufala. Nem blong olketa prist ya hemi olsem: Seraea, an Jeremaea, an Esra,

Jeremaea 22:24

Yawe hemi gohed fo talemaot mesij blong hem. Hemi tok olsem, “King Jehoeakin, san blong Jehoeakim, king blong Jiuda. Mi mekem disfala strongfala promis long nem blong mi seleva nao. Nomata yu olsem wanfala gol ring wea hemi stap long fingga long raet han blong mi, wea hemi saen blong paoa blong mi, bat mi bae mi pulumaot yu from fingga ya.

Jeremaea 22:28

(Profet) !Ooo! ?Waswe, hem nao King Jehoeakin ya? ?King ya hemi kamap samting nating olsem wanfala pot wea olketa wakem long graon wea hemi brek, an no eniwan hemi laekem? ?Waswe nao olketa enemi ya save kam torowem hem goaot wetem olketa pikinini blong hem fo go long kantri wea i no save long hem?

Jeremaea 22:30

Yawe nao hemi tok olsem, “Yufala raetem long rekod blong olketa king wea bae disfala man hemi olsem man wea hemi no garem eni pikinini, an laen blong hem hemi lus finis. Bae man ya hemi no save duim eni gud samting long laef blong hem. Bae no eni san blong hem save sidaon long bikfala sea blong King Deved an rul ovarem Jiuda.”

Hagae 1:1

Long mektu yia wea Darias hemi king long Pesia, long fas de blong meksiks mans long hem, Yawe hemi talemaot Mesij blong hem long Profet Hagae, mekem hemi go talemaot long gavna blong Jiuda, Serababel, san blong Sealtiel, an long Haeprist Josua, san blong Jehosadak.

Hagae 1:12

Nao Serababel, san blong Sealtiel, an Haeprist Josua, san blong Jehosadak, an olketa pipol hu i stap long dea i barava herem toktok blong Yawe hu hemi God blong olketa. Olketa obeim mesij wea Yawe, God blong olketa hemi bin sendem Profet Hagae fo talemaot. An olketa pipol i fraetem Yawe.

Hagae 1:14

Nao Yawe hemi mekem Gavna Serababel, an Haeprist Josua, an olketa people long dea fo tingting strong long mesij ya. So olketa stat fo bildimbaek moa Tambuhaos blong Yawe hu hemi garem evri paoa.

Hagae 2:2

?Yu go tok long Gavna Serababel blong Jiuda, an long Haeprist Josua, an long olketa pipol long dea, an yu askem olketa olsem,

Hagae 2:23

Bat yu Serababel, san blong Sealtiel, yu wakaman blong mi. Long datfala de, bae mi mekem yu fo kamap olsem wanfala gol ring wea hemi stap long fingga long raet han blong mi, wea hemi saen blong paoa blong mi. Mi siusimaot yu finis fo kamap man blong mi.? Hem nao toktok blong Yawe hu hemi garem evri paoa.

Matiu 1:11

an Josaea hemi dadi blong Jehoeakin wetem olketa brata blong hem, wea olketa stap long taem olketa enemi i tekem olketa pipol blong Israel fo go long kantri long Babilon.

Matiu 1:13

an Serababel hemi dadi blong Abaeud, an Abaeud hemi dadi blong Elaeakim, an Elaeakim hemi dadi blong Aso,

Matiu 1:17

So stat long Ebraham kam kasem King Deved, hemi garem fotinfala man. An stat long King Deved kam kasem taem wea olketa enemi i tekem olketa Israel fo go long Babilon, hemi nara fotinfala man. An stat long taem wea olketa go long Babilon kam kasem taem wea disfala Mesaea hemi bon, hemi garem nara fotinfala man tu.

Gudnius abaotem Jisas Kraes wea Luk hemi raetem 3:27

Joda hemi san blong Joanan. Joanan hemi san blong Risa. Risa hemi san blong Serababel. Serababel hemi san blong Sialtiel. Sialtiel hemi san blong Nirae.