Josua 6:5 - Pijin Bible

⁵ Taem yufala herem dat olketa bloum olketa trampet long taem tumas, long semtaem nomoa, yufala evriwan i mas singaot bikfala. Long taem ya, bikfala wolston blong taon ya bae hemi brek an hemi foldaon nao. An evri soldia blong yu mas go stret insaet long taon ya nao.”

Pijin Deuterocanon

⁵ Taem yufala herem dat olketa bloum olketa trampet long taem tumas, long semtaem nomoa, yufala evriwan i mas singaot bikfala. Long taem ya, bikfala wolston blong taon ya bae hemi brek an hemi foldaon nao. An evri soldia blong yu mas go stret insaet long taon ya nao.”

Josua 6:5 Iomraidhean Croise

Eksodas 19:19

Saon blong trampet ya hemi kamap bikfala moa. An evritaem Mosis hemi toktok, God hemi ansarem hem long bikfala tanda wea hemi bosta.

Aesaea 25:12

Nomata olketa taon ya long Moab i garem olketa bikfala hae wolston raonem, wea olketa save haed insaet long taem blong faet, bat bae God hemi brekemdaon go-go hemi olsem nomoa dast long graon.

Aesaea 30:25

Long datfala taem tu, nomata plande pipol i dae an olketa strongfala sefples blong yufala bae hemi kamap nogud tumas, bat olketa spring wata bae hemi ran kamdaon long evri maonten an evri hil.

Jeremaea 50:15

!Hipap raonem taon ya, an singaot bikfala agensim olketa! Olketa long taon i givap long yufala. Strongfala sefples blong olketa wetem wolston blong taon i foldaon. Hem nao wei wea mi Yawe mi panisim olketa, so mi laekem yufala fo mekem olketa safa, barava olsem olketa bin mekem olketa narafala pipol fo safa.

Hibrus 11:30

Olketa pipol blong Israel i biliv long God, an dastawe nao disfala bikfala wolston wea hemi stap raonem Jeriko ya hemi foldaon bihaen olketa goraonem fo sevenfala de.

Josua 6:16

Taem olketa goraonem taon ya long mekseven taem finis, olketa prist i redi fo bloum olketa trampet longtaem tumas. Den Josua hemi tok olsem long olketa, “!Distaem, yufala singaot bikfala! !Yawe hemi putum finis taon ya long han blong yumi!

Josua 6:20

Taem Josua hemi toktok finis nomoa, olketa prist i bloum olketa trampet longtaem tumas, an evriwan i singaot bikfala fogud. An bikfala wolston long taon ya hemi brek an hemi foldaon long graon nao. Evri soldia i go insaet long taon ya, an no eniwan save stopem olketa nao. So olketa winim Jeriko long faet ya.

Josua 6:4

Bae sevenfala prist nao i holem an bloum trampet fo maas go frant long olketa prist wea i karim Tambu Boks long Spesol Agrimen blong mi. Long mekseven de, bae yufala maas raonem taon ya sevenfala taem. An long taem ya, bae olketa prist ya mas gohed fo bloum trampet blong olketa.

Josua 6:6

So Josua hemi kolem olketa prist fo kam tugeta, an hemi tok olsem long olketa, “Distaem, sevenfala prist long yufala hu i holem olketa trampet wea olketa wakem long hon blong sipsip, bae i maas go fastaem long olketa narawan long yufala hu i karim Tambu Boks long Spesol Agrimen blong Yawe.”

Jajis 20:37

Fastaem, olketa bin mekem wanfala plan. Plan ya hemi olsem, taem haf blong olketa hu i bin haed i go insaet long taon ya, olketa mas bonem taon ya mekem smok hemi go antap. Taem disfala narafala grup wea bae hem gohed fo laea fo ranawe hemi lukim smok, olketa mas taneraon an faetem ami blong Benjamin. Oraet, long taem olketa no bonem taon ya yet, ami blong Benjamin hemi kilim dae samting olsem tetifala man long ami blong Israel. An yu save olketa bin singaot olsem, “!Distaem yumi winim olketa moa, olsem wea yumi bin duim fastaem!” Bat, olketa wea i haed i getap kuiktaem an go insaet long taon ya. Olketa go evriwea long insaet an kilim dae olketa pipol an bonem taon ya.

1 Samuel 17:20

So long neks de, long eli moning, Deved hemi sendem wanfala long olketa man blong hem fo go lukaftarem olketa sipsip. Den hemi tekem olketa kaikai ya an hemi go olsem wea dadi blong hem hemi bin talem hem. Hemi kasem ples blong ami long semtaem wea olketa soldia i stanbae fo faet, an long taem wea olketa singaot bikfala fo faet.

1 Samuel 17:52

Long datfala taem, olketa soldia blong Jiuda wetem olketa soldia blong Israel i singaot bikfala, an olketa ronem olketa go-go kasem taon long Gat an long geit blong bikfala wolston blong taon long Ekron. Olketa kilim dae plande soldia blong Filistia olobaot long rod from Saaraem fo go long Gat an Ekron.

1 Samuel 4:5

Taem olketa blong Israel i lukim dat Tambu Boks blong Yawe hemi kasem ples ya, olketa singaot bikfala bikos olketa hapi tumas, an hemi olsem wea graon hemi seksek.