Josua 3:16 - Pijin Bible

¹⁶ wata ya hemi stop nao. Haf long riva wea hemi gohed fo ran kamdaon, hemi hipap farawe tumas kolsap long taon long Adam wea hemi kolsap long ples long Saretan. An narafala haf long riva wea hemi gohed fo ran godaon kasem Ded Si hemi kamap barava drae nao. Evriwan i go akros nao long narasaet kolsap long Jeriko.

Pijin Deuterocanon

¹⁶ wata ya hemi stop nao. Haf long riva wea hemi gohed fo ran kamdaon, hemi hipap farawe tumas kolsap long taon long Adam wea hemi kolsap long ples long Saretan. An narafala haf long riva wea hemi gohed fo ran godaon kasem Ded Si hemi kamap barava drae nao. Evriwan i go akros nao long narasaet kolsap long Jeriko.

Josua 3:16 Iomraidhean Croise

Jenesis 14:3

Nao olketa faefala king ya i tekem olketa soldia blong olketa, an kam tugeta long Sidim vali. Distaem, Ded Si nao hemi draonem ples ya finis.

1 Kings 4:12

Baana, san blong Ahilud, hemi lukaftarem tufala taon long Taanak an Megido. An hemi lukaftarem eria long Bet-San kolsap long taon long Saretan, eria ya hemi saot long taon long Jesreel, an hemi go kasem taon long Abel-Mehola an taon long Jokmeam.

1 Kings 7:46

King hemi talem hem fo mekem olketa samting ya long flat eria kolsap long Jodan Riva, long midol long tufala taon long Sukot an Saretan. Long dea nao olketa poarem go bras wea olketa meltem fo mekem olketa samting ya.

Sams 114:3

Taem God hemi kam, Red Si hemi divaed long tufala haf. Ya, an Jodan Riva tu hemi no ran moa.

Sams 114:5

?Red Si, wanem nao hemi mekem yu fo divaed long tufala haf? ?Jodan Riva, wanem nao hemi mekem yu fo no ran moa?

Sams 29:10

Nomata olketa wata i ran bikfala, Yawe hemi gohed fo rulim olketa. Hemi King an bae hemi gohed fo rul olowe nao.

Sams 33:7

Hemi putum solwata fo stap long barava ples blong hem, an hemi mekem dipsi fo stap long barava ples blong hem tu.

Sams 66:6

Hemi mekem si fo divaed long tufala haf, an ples ya hemi kamap drae, an hemi mekem riva fo drae, nao olketa grani blong yumi bifoa i wakabaot nomoa fo katkros go long narasaet. Hem nao yumi hapi tumas long samting ya wea hemi bin duim.

Sams 74:15

Olketa springwata an olketa riva wea i drae finis, yu bin mekem olketa fo ran moa, an olketa bikfala riva wea i no save drae enitaem, yu bin mekem olketa fo drae.

Sams 77:19

Yu bin wakabaot long olketa wev, an yu bin katkros long dipsi, bat no eniwan hemi lukim yu nomoa.

Sams 78:13

Hemi divaedem solwata long tufala haf, wea hemi stanap olsem tufala bikfala wolston, an hemi tekem olketa fo gotru long narasaet.

Eksodas 14:21

Long taem ya, Mosis hemi liftimap han blong hem antap long solwata, an long datfala naet Yawe hemi mekem ist win hemi blou strong, an hemi divaedem solwata ya long tufala haf. Win ya hemi gohed fo blou strong olsem, mekem ples long midol long tufala haf long solwata ya hemi kamap barava drae.

Eksodas 14:22

Nao olketa pipol blong Israel i wakabaot long drae graon nomoa, long midol long tufala wol long solwata ya, wanfala wol long raetsaet blong olketa an narawan long lefsaet.

Eksodas 14:29

Bat olketa blong Israel bin wakabaot go nomoa long drae graon long midol long tufala wol ya long solwata, wea i stap long tufala saet blong olketa.

Eksodas 15:8

Wanfala blou blong yu nomoa long solwata, hemi divaedem long tufala haf. Hemi barava stanap olsem tufala wolston, an botom blong hem long daon hemi kamap strong an drae.

Aesaea 50:2

?Waswe nao no eniwan hemi kam long mi, taem mi kam fo sevem yufala? ?Waswe nao no eniwan hemi ansarem mi, taem mi kolem yufala? ?Yufala tingse mi no garem naf paoa fo sevem yufala? Mi save tok nomoa, an dipsi save kamap barava drae. Olketa riva tu save kamap wanfala bikfala drae eria, an olketa fis bae i dae evriwan.

Esikiel 47:8

Hemi tok moa olsem long mi, “Wata ya hemi ran gotru long kantri ya long ist, an hemi godaon long flat ples ya long Jodan Riva, an hemi godaon kasem Ded Si. An taem hemi ran go long Ded Si, bae hemi mekem Ded Si ya fo kamap gudfala fres wata moa.

Neiham 1:4

Hemi save tok long solwata, an hemi kamap drae. Hemi mekem olketa riva tu fo drae. Hemi mekem olketa gudfala graon long Basan hemi drae, an olketa tri long maonten long Kaamel i drae tu. Evri gudfala flaoa long Lebanon tu, hemi mekem olketa dae.

Habakuk 3:8

Lod Yawe. ?Taem yu bin stopem olketa riva an divaedem si, waswe, yu bin kros long olketa ya? !Nomoa nao! Bat yu bin kam olsem soldia long kaat blong hem fo faet, fo helpem olketa pipol blong yu fo win.

Nambas 34:3

Long saot lan ya hemi stat long bikfala drae eria long Sini an hemi go kasem spialaen blong lan blong Idom. Disfala spialaen long saot, hemi stat long en blong Ded Si long saot,

Diutronomi 1:1

Disfala buk hemi garem olketa toktok wea Mosis hemi talemaot long pipol blong Israel taem olketa stap long drae eria blong Moab, long vali blong Jodan Riva, kolsap long ples long Suf an long midol long olketa taon olsem: Paran, Tofel an Laban an Haserot an Disahab. Bifoa olketa kasem disfala eria blong Moab, Mosis hemi bin winim Paramaon Sif Sihon blong laen blong Amoa long Hesbon, an hemi bin winim Paramaon Sif Og blong Basan an tufala taon blong hem nao Astarot an Edrei. Sapos eniwan hemi lusim Horeb fo wakabaot long rod long maonten long Seia fo kam kasem Kades-Banea, hemi mas wakabaot long rod ya fo levenfala de. Nomata olsem, Mosis hemi talem disfala toktok long mekfoti yia bihaen long taem olketa lusim Ijip. Hemi long fas de blong mekleven mans blong datfala yia, an olketa stap yet long eria blong Moab long narasaet Jodan Riva long ist, taem Mosis hemi talemaot gud nao lo blong spesol agrimen blong Yawe.

Diutronomi 3:17

An ist saet blong vali long Jodan Riva tu, mi givim go long olketa. An baondri blong lan blong olketa long west hemi long Jodan Riva, stat long Leik Galili long not go kasem Ded Si long saot wea hemi long botom blong maonten long Pisga.

Josua 12:3

Spialaen blong hem long west hemi stat long not long Leik Galili an hemi ka-kam long vali long Jodan Riva go kasem Ded Si long saot. An taon long Bet-Jesimot an maonten long Pisga i insaet long eria blong Sihon.

Josua 15:2

Disfala spialaen long saot, hemi stat long en blong Ded si long saot,

Josua 3:13

“Olketa prist mas karim go Tambu Boks blong Yawe hu hemi Masta blong wol. Taem olketa prist ya i godaon insaet long wata, bae riva ya hemi no ran moa. Wata wea hemi gohed fo ran kamdaon bae hemi fulap nomoa long wanfala ples.”

Josua 4:22

bae olketa save tok olsem, ‘Hem nao memori fo makem taem wea olketa grani blong yumi i katkros kam long Jodan Riva long drae graon nomoa.

Josua 5:1

Evri sif long Amoa wea olketa stap long west saet long Jodan Riva an evri sif long Kenan wea i stap kolsap long Mediterenian Si, olketa herem nius wea Yawe hemi mekem Jodan Riva fo kamap drae, mekem olketa blong Israel i save kam akros long riva ya. So olketa fraet tumas long olketa blong Israel an tingting blong olketa hemi barava wikdaon.