Josua 13:31 - Pijin Bible

³¹ Disfala distrik hemi kasem narafala haf long Gilead tu, wetem tufala taon long Astarot an Edrei wea hemi kapitol taon blong Paramaon sif Og. Hem nao olketa lan wea Mosis bin givim go long olketa laen blong Makia san blong Manase, fo onam olowe nao.

Pijin Deuterocanon

³¹ Disfala distrik hemi kasem narafala haf long Gilead tu, wetem tufala taon long Astarot an Edrei wea hemi kapitol taon blong Paramaon sif Og. Hem nao olketa lan wea Mosis bin givim go long olketa laen blong Makia san blong Manase, fo onam olowe nao.

Josua 13:31 Iomraidhean Croise

1 Kronikols 6:71

Nao olketa givim go olketa taon wetem lan raonem olketa long laen blong Geson. Long distrik blong Manase long ist saet long Jodan Riva, olketa garem tufala taon olsem: Golan long Basan, an Astarot.

Sams 60:7

Eria ya long Gilead hemi blong mi, an eria ya long Manase hemi blong mi tu. Eria ya long Efrem hemi olsem helmet fo faet blong mi, an eria ya long Jiuda hemi olsem stik blong king fo somaot dat mi nao mi garem paoa fo rul.

Josua 12:4

An narawan nao Sif Og, wea hemi paramaon sif blong eria long Basan. Paramaon sif ya hemi laswan long olketa Refaem pipol an hemi rul ovarem tufala taon long Astarot an Edrei.

Josua 13:12

Lan ya hemi gohed moa go-go kasem evri ples long distrik wea Paramaon sif Og hemi rul ovarem, wetem tufala taon long Astarot an Edrei wea i kapitol taon blong hem. Disfala paramaon sif nao hemi laswan long olketa laen blong Refaem long bifoa. Mosis wetem olketa pipol blong Israel nao i bin winim olketa pipol ya wetem ples blong olketa long faet.

Josua 13:32

Hem nao wei wea Mosis bin divaedem olketa lan long taem ya hemi stap yet long bikfala flat ples ya long Moab.

Josua 17:5

Olketa long traeb blong Manase nao i onam tenfala eria long west saet long Jodan Riva wetem tufala eria moa long Gilead an Basan wea tufala stap long ist saet long Jodan Riva.

Josua 17:6

Olketa duim olsem bikos olketa woman ya i onam tu lan wetem olketa narafala man long traeb blong olketa, mekem olketa save onam lan wea olketa stap long hem. Bat olketa lan long Gilead, olketa givim go finis long olketa long narafala haf long traeb ya blong Manase fo onam.

Josua 9:10

An mifala herem tu wanem hemi duim long tufala paramaon sif ya long Amoa long narasaet Jodan Riva long ist, Sif Sihon blong Hesbon, an Sif Og blong Basan, wea kapitol taon blong hem nao Astarot.

Jajis 10:6

An bihaen, pipol blong Israel i gohed moa fo duim olketa nogud samting long ae blong Yawe. Olketa lusim hem an wosipim olketa tambu kaving blong Baal an Astarot. Olketa gohed fo wosipim tu olketa god blong Siria, an olketa god blong Saedon, an olketa god blong Moab, an olketa god blong Amon, an olketa god blong Filistia.

Jajis 5:17

Traeb blong Gad long Gilead i stap nomoa long narasaet long Jodan Riva. ?Fo wanem nao traeb blong Dan i stap long olketa waf nomoa? An traeb blong Asa tu i stap nomoa long ples blong olketa kolsap long saetsi.

1 Samuel 12:10

“Long taem wea olketa olfala grani blong yumi i krae long Yawe fo help, olketa prea olsem, ‘!Mifala no obeim yu Lod Yawe! Mifala lusim yu. An mifala wosipim olketa tambu kaving blong tufala god ya, Baal an Astarot. Plis yu sevem mifala an tekem mifala aot from paoa blong olketa enemi blong mifala, mekem mifala wosipim yu moa.’

1 Samuel 7:3

Profet Samuel hemi tok long olketa blong Israel olsem, “Olketa, sapos yufala wande tanem evri tingting blong yufala fo kambaek long Yawe, yufala mas torowe olketa tambu kaving blong disfala woman god Astarot wetem olketa narafala god. An yufala mas givim ful laef blong yufala long Yawe an yufala mas wosipim hem nomoa. Sapos olsem, bae hemi sevem yufala from paoa blong pipol blong Filistia.”