Josua 10:3 - Pijin Bible

³ So Paramaon Sif Adonisedek hemi sendem mesij go long Paramaon Sif Hoham blong Hebron, an Paramaon Sif Piram blong Jamut, an Paramaon Sif Jafia blong Lakis, an Paramaon Sif Debia blong Eglon.

Pijin Deuterocanon

³ So Paramaon Sif Adonisedek hemi sendem mesij go long Paramaon Sif Hoham blong Hebron, an Paramaon Sif Piram blong Jamut, an Paramaon Sif Jafia blong Lakis, an Paramaon Sif Debia blong Eglon.

Josua 10:3 Iomraidhean Croise

Jenesis 23:2

Hemi dae long kantri ya wea olketa kolem Kenan, long taon olketa kolem Kiriataba, wea distaem, olketa kolem Hebron. Nao Ebraham hemi sore tumas an hemi krae fogud long waef blong hem ya wea hemi dae finis. Bihaen, hemi getap from ples wea olketa leim waef blong hem, nao hemi go fo lukim olketa bikman long laen blong Het wea olketa onam graon long ples ya, an hemi tok olsem long olketa,

Jenesis 37:14

Nao dadi blong olketa hemi tok olsem long hem, “Mi laekem yu fo go an tekem kam samfala nius long olketa brata blong yu mekem mi save dat olketa stap gud nomoa an olketa animol ya i stap gud nomoa, o waswe. Bihaen yu kambaek, an talem long mi.” So dadi blong hem hemi sendem hem go nao. Long taem ya, Jekob an olketa wetem hem i stap nomoa long vali long Hebron, so Josef hemi lusim ples ya, an hemi wakabaot go nao. An taem hemi kasem Sekem,

2 Samuel 2:11

Hemi king long Hebron, an hemi rulim pipol blong Jiuda fo seven an haf yia.

2 Kings 18:14

King Senakerib hemi stap long taon long Lakis. King Hesekaea hemi sendem toktok go long hem olsem, “Mi duim wanem hemi no stret. Sapos yu no gohed fo faetem mi moa, bae mi peim yu enisamting yu laekem.” So king blong Asiria mekem Hesekaea peim 10,000 kilo silva an 1,000 kilo gol.

2 Kings 18:17

King Senakerib hemi stap yet long taon long Lakis, an hemi sendem komanda blong hem, an nara tufala nambawan bikman blong hem wetem plande soldia fo go long Jerusalem wea King Hesekaea hemi stap long hem. Olketa kam an stap long rod wea hemi go long ples wea olketa save wasim kaleko. Olketa stanap kolsap long ples wea wata hemi ran goaot long disfala pul long wata wea hemi antap.

Jeremaea 34:7

Long datfala taem, king blong Babilonia wetem olketa soldia blong hem i gohed fo faet long Jerusalem an long tufala narafala taon long Lakis an Aseka, wea tufala garem wolston raonem. Olketa enemi ya bin winim finis evri narafala taon long Jiuda wea i garem wolston raonem.

Maeka 1:13

!Olketa pipol blong taon long Lakis! Yufala mas taemapem olketa hos blong yufala go long olketa kaat mekem yufala save ranawe. Yufala nao i falom ravis wei blong olketa pipol long Israel long not, an yufala i lidim tu olketa pipol blong Jerusalem fo sin.

Nambas 13:22

Fastaem olketa go fo lukluk long haf blong lan long saot, an kasem taon long Hebron. Hebron hemi ples blong olketa long laen blong Ahiman, an laen blong Sesae, an laen blong Talmae. Olketa pipol blong Hebron ya i long laen blong Anak. Taon long Hebron hemi barava olfala fogud. Taon long Soan long Ijip hemi wanfala olfala ples, bat Hebron hemi sevenfala yia olfala moa winim Soan.

Josua 10:1

Paramaon Sif Adonisedek blong Jerusalem hemi barava fraet fogud taem hemi herem nius wea Josua hemi tekova finis long Ai, an hemi spoelem finis taon ya an hemi kilim dae paramaon sif blong olketa, olsem wea hemi bin duim long olketa pipol blong Jeriko wetem paramaon sif blong olketa. Hemi herem tu wea olketa blong Gibeon i mekfren finis wetem Josua an olketa blong Israel, an i joen wetem olketa nao.

Josua 10:23

So olketa duim olsem wea Josua hemi talem long olketa, an olketa tekemaot kam nao faefala paramaon sif ya long hem. Olketa paramaon sif ya i from Jerusalem, Hebron, Jamut, Lakis, an Eglon. Bihaen, Josua hemi kolem evri man blong hem fo kam long hem, an hemi tok olsem long olketa komanda blong olketa soldia blong hem, “Yufala kam an step long nek blong olketa paramaon sif ya.” An olketa duim nao olsem wea hemi talem.

Josua 10:34

Bihaen diswan, Josua wetem ami blong hem i lusim taon ya an go fo narafala taon moa wea olketa kolem Eglon. Olketa hipap raonem taon ya, an faetem olketa pipol wea i stap insaet.

Josua 10:5

So faefala paramaon sif blong olketa laen blong Amoa, wetem olketa ami blong olketa joen tugeta an raonem Gibeon, an stat fo faetem olketa.

Josua 14:15

Fastaem, nem blong taon ya hemi Kiriat-Aba, wea hemi minim “Taon blong Aba”, an Aba hemi nambawan bikman long laen blong Anak ya long bifoa, bat bihaen, olketa kolem hem Hebron. An bihaen, olketa stap kuaet moa an garem piis.

Josua 15:54

an Humta, an Kiriat-Aba wea narafala nem blong hem nao Hebron, an Sioa. Hem nao naenfala taon wea i stap long datfala eria wetem evri vilij wea i stap raon long olketa.

Josua 15:63

Bat olketa long traeb blong Jiuda i no save ronemaot olketa long laen blong Jebus bifoa wea olketa gohed fo stap long Jerusalem long datfala taem. Olketa pipol ya i stap yet wetem olketa long traeb blong Jiuda ka-kam kasem tude.

Josua 18:28

an Sela, an Haelef, an Jebus wea narafala nem blong hem nao Jerusalem, an Gibea an Kiriat-Jearim. Hem nao fotinfala taon wea i stap long eria ya wetem olketa vilij wea i stap raon long olketa. Hem nao olketa lan wea traeb blong Benjamin i onam.