Jeremaea 6:26 - Pijin Bible

²⁶ (Profet) Olketa pipol blong mi. Distaem yufala mas werem olketa ravis kaleko, an yufala mas rol olobaot long asis faea, fo somaot dat yufala sore. Yufala mas krae bikfala, olsem man wetem waef blong hem taem wanfala pikinini blong tufala hemi dae. Yufala mas sore an krae olsem, bikos olketa ya hu i kam fo spoelem yufala, bae olketa kam kuiktaem fo faetem yufala.

Pijin Deuterocanon

²⁶ (Profet) Olketa pipol blong mi. Distaem yufala mas werem olketa ravis kaleko, an yufala mas rol olobaot long asis faea, fo somaot dat yufala sore. Yufala mas krae bikfala, olsem man wetem waef blong hem taem wanfala pikinini blong tufala hemi dae. Yufala mas sore an krae olsem, bikos olketa ya hu i kam fo spoelem yufala, bae olketa kam kuiktaem fo faetem yufala.

Jeremaea 6:26 Iomraidhean Croise

Jenesis 21:16

Bihaen hemi wakabaot go lelebet, olsem 100 mita nomoa, nao hemi sidaon. Hemi gohed fo tingting olsem, “Mi no wande fo lukim taem wea pikinini blong mi ya bae hemi dae.” Nao hemi gohed fo sidaon long ples ya, an hemi gohed fo krae.

Stori abaotem Job 15:21

Insaet long tingting blong hem, hemi herem olketa samting wea hemi fraetem tumas. An taem hemi tingse hemi stap gudfala nomoa, bae olketa man fo stil i kam spoelem hem.

Stori abaotem Job 2:8

Job hemi go an sidaon long ples wea olketa bonem ravis, an hemi tekem wanfala pis sap ston fo skrasim olketa soa long bodi blong hem.

Aesaea 22:12

Lod Yawe hu hemi garem evri paoa hemi talem yufala fo krae bikfala, an resam hea blong yufala. An yufala mas werem olketa ravis kaleko fo somaot dat yufala sore tumas fo sin blong yufala.

Aesaea 22:4

Hem nao mi singaot olsem, “!Yufala letem mi stap seleva! Yufala no trae fo strongim tingting blong mi. Yufala letem mi krae bikfala from disfala wei wea olketa enemi i spoelem olketa pipol blong mi.”

Aesaea 3:24

Bae olketa no save smel naes moa, bat bae olketa barava smel nogud tumas. Bae olketa no save werem olketa nambawan strap, bat bae olketa enemi i taemapem olketa wetem rop olsem slev. Bae hea blong olketa no luknaes, bat bae olketa enemi i resam hea blong olketa. Bae olketa no save werem olketa barava spesol kaleko blong olketa, bat bae olketa werem nomoa olketa ravis kaleko. Bae olketa no save luknaes olsem distaem, bikos bae olketa enemi i makem bodi blong olketa olsem slev.

Aesaea 30:13

Dastawe nao disfala wei blong sin bae hemi kamap olsem wanfala bikfala wolston wea yufala tingse hemi save mekem yufala sef, bat hemi garem bikfala hol long hem an hemi redi nao fo foldaon. No longtaem nomoa bae hemi foldaon nao an hemi brek finis.

Aesaea 32:11

Yufala woman hu i stap gudfala distaem, bae yufala fraet an seksek fogud. An bae yufala tekemaot olketa gudfala kaleko blong yufala an werem nomoa olketa ravis kaleko fo sore an krae.

Jeremaea 12:12

Bae olketa enemi i kam antap long olketa hil long drae eria fo spoelem evrisamting long lan ya. Olketa ya i olsem bikfala naef blong mi Yawe nao, bikos mi nao mi sendem olketa fo panisim olketa pipol long lan ya, an no eniwan save stap sef.

Jeremaea 13:17

Bat sapos yufala no herem toktok ya, bae mi go long ples wea man hemi no save lukim mi, an mi gohed fo krae fo yufala, bikos yufala praod tumas. Bae mi barava krae, an tias blong mi i ran bikfala, bikos olketa enemi blong yumi bae olketa kam winim yumi an fosim yumi fo stap long narafala ples.

Jeremaea 14:17

“Jeremaea. Yu mas talem olketa olsem: Long de an long naet, tias blong mi hemi gohed fo ran bikfala. Mi krae olowe nomoa, bikos bae hemi olsem olketa pipol blong mi i garekil wea hemi nogud tumas, olsem wea enemi bin wipim olketa nogud.

Jeremaea 15:8

Bae mi mekem plande woman moa fo kamap wido, mekem namba blong olketa ya i winim nao sanbis long solwata. Long midol long de, bae mi sendem olketa enemi fo spoelem olketa yangman blong yufala, an seknomoa olketa mami blong olketa i sore tumas an fraet fogud.

Jeremaea 18:22

!Letem olketa sore an krae bikfala taem yu sendem olketa ravis man fo kam kuiktaem an spoelem olketa! Plis yu duim olsem bikos olketa bin digim hol mekem mi foldaon long hem, an olketa bin mekem trap fo kasholem mi.

Jeremaea 30:5

Yawe hemi tok olsem, “Mi herem pipol krae bikfala. Olketa fraet tumas, an olketa no stap long piis.

Jeremaea 4:11

Long datfala taem, Yawe bae hemi tok olsem long olketa blong Jiuda an Jerusalem, “Bae mi sendem strongfala hot win from drae eria mekem hemi save blou long pipol blong mi. Bae hemi no diskaen sof win wea hemi helpem olketa fo aotem skin from sid blong wit.

Jeremaea 4:20

Taem wanfala bikfala trabol hemi jes kasem olketa long lan ya, narafala bikfala trabol moa hemi kam bihaen fo kasem olketa. Olketa enemi i barava spoelem finis olketa samting long lan ya. Olketa brekem olketa haostent blong mifala wetem kaleko blong olketa haostent long olketa smolfala pisis.

Jeremaea 4:8

Yumi mas werem olketa ravis kaleko an krae bikfala fo somaot dat yumi barava sore, bikos Yawe hemi gohed fo kros tumas long yumi.

Jeremaea 6:14

Hemi olsem yufala pipol blong mi i garem bikfala ravis soa, bat olketa ya i gohed fo tok olsem hemi smol samting nating moa. Olketa tok olsem, ‘Yufala no wari. Yumi stap gud nomoa,’ bat yufala no stap gud.

Jeremaea 8:19

!Lisin kam! From olketa farawe ples nao, mi herem olketa pipol blong mi. Olketa gohed fo kraeaot olsem, “?Waswe, Yawe hemi no stap moa long maonten long Saeon? ?King blong ples ya, hemi no stap yet long dea?” An Yawe hemi tok olsem, “?Waswe nao yufala gohed fo mekem mi kros long wei wea yufala mekem wosip long olketa narafala god wea i kanduit helpem yufala?”

Jeremaea 8:21

Mi filnogud tumas, bikos olketa pipol blong mi i kamap nogud tumas. Mi sore an krae, an tingting blong mi hemi wikdaon finis.

Jeremaea 9:1

Hemi moabeta sapos hed blong mi hemi olsem wanfala wel wea hemi fulap long wata, an hemi moabeta sapos ae blong mi hemi olsem wanfala springwata. Den oltaem long de an long naet, mi save krae fo olketa pipol blong mi, wea olketa enemi kilim olketa dae.

Jeremaea 9:10

Bae mi sore long olketa maonten, an mi krae fo olketa open eria wea hemi bin garem gras long hem, bikos olketa evriwan i drae finis, an hemi emti fogud. No eniwan hemi gotru long olketa ples ya. No eni buluka hemi stap long hem, An evri bed an evri wael animol tu i lus finis.

Lamentesin 1:16

“Dastawe nao mi krae tumas, an tias hemi ran kamdaon long fes blong mi. No eniwan nao hemi stap wea i save strongim tingting blong mi. Olketa enemi ya i winim mi, an olketa pipol blong mi i seke fogud.”

Lamentesin 1:2

Long fulnaet ya hemi krae go-go delaet, an tias blong hem hemi randaon long fes blong hem. Bifoa, hemi olsem gele wea hemi garem plande man. Distaem evriwan i les long hem. Olketa fren i agensim hem, an kamap enemi blong hem.

Lamentesin 2:11

Mi krae fogud an ae blong mi hemi soa nao, bikos mi sore tumas long olketa. Haat blong mi hemi filnogud, bikos olketa pipol blong mi i lus finis, an olketa pikinini wetem olketa bebi tu i dae long hanggre olobaot long rod long taon ya.

Lamentesin 3:16

Hemi pusum mi godaon long dast, an step long mi, wea fes blong mi hemi bangam graon, an olketa tit blong mi i brek long ston.

Lamentesin 3:48

Mi krae bikfala, wea tias blong mi hemi gohed fo ran kamdaon olsem riva bikos yu spoelem olketa pipol blong mi.

Lamentesin 4:10

Bifoa, olketa mami i lukaftarem gudfala pikinini blong olketa. Bat bihaen taem God hemi spoelem pipol blong mi, olketa mami i kilim pikinini ya, an kukim fo kaikaim.

Lamentesin 4:3

Nomata mami wael dog, hemi gohed fo susum pikinini blong hem. Bat olketa pipol blong mi distaem i kamap olsem bed ya ostrij wea hemi les fo lukaftarem pikinini blong hem.

Lamentesin 4:6

God hemi spoelem wantaem nomoa taon long Sodom, an no eniwan save helpem hem. Bat panis wea hemi kasem pipol blong mi hemi wos moa winim panis blong pipol long Sodom bifoa.

Emos 8:10

Olketa de blong yufala fo mekem fist, bae mi tanem go long de blong yufala fo berem man dae. An olketa hapi singsing blong yufala, bae mi tanem go long sore an krae. Bae mi mekem yufala fo resam hed blong yufala, an fo yufala werem olketa ravis kaleko nomoa, fo somaot dat yufala sore fogud olsem man wetem waef blong hem i sore taem wanfala pikinini blong tufala hemi dae. !Long datfala De, bae bikfala trabol hemi kasem yufala!?

Jona 3:6

Taem king blong Nineve hemi herem disfala nius, hemi somaot tu dat hemi sore tumas. Hemi stanap from sea blong hem, an hemi tekemaot barava spesol kaleko blong hem. Hemi werem ravis kaleko tu, an hemi go sidaon insaet long asis blong faea.

Sekaraea 12:10

Yawe hemi gohed fo tok olsem, ?Bae mi mekem olketa laen blong Deved an olketa pipol blong Jerusalem fo barava garem gudfala tingting, wea olketa save sore long narafala man, an olketa save prea fo mi helpem olketa. Bae olketa lukluk go long mi, disfala man wea olketa spiarem. An bae olketa sore an krae fo hem, olsem man wea hemi garem wanfala pikinini nomoa an hemi dae, o man wea fasbon pikinini blong hem hemi dae.

Gudnius abaotem Jisas Kraes wea Luk hemi raetem 7:12

Taem olketa kolsap kasem geit blong taon ya, olketa mitim wanfala bikfala seksin wea olketa kamaot long disfala taon an olketa karim kam wanfala man hu hemi dae finis. Man hu hemi dae ya, hemi san blong wanfala wido woman ya an hem nomoa wanfala pikinini blong hem.

Jemes 4:9

Yufala mas barava sore an krae. Hemi no fitim fo yufala laf, yufala mas krae. An hemi no fitim fo yufala hapi, yufala mas sore.

Jemes 5:1

Yufala olketa ris man, yufala mas krae bikfala nao, bikos trabol wea bae hemi kasem yufala, hemi barava nogud tumas.