Jeremaea 50:1 - Pijin Bible

¹ Hem ya nao Mesij blong Yawe wea hemi talemaot long Profet Jeremaea abaotem kantri long Babilonia wetem biktaon blong hem Babilon. Hemi tok olsem,

Pijin Deuterocanon

¹ Hem ya nao Mesij blong Yawe wea hemi talemaot long Profet Jeremaea abaotem kantri long Babilonia wetem biktaon blong hem Babilon. Hemi tok olsem,

Jeremaea 50:1 Iomraidhean Croise

Jenesis 10:10

Fastaem, ples wea hemi gohed fo bikman long hem hemi kavaremap trifala taon wea olketa kolem Babilon an Erek an Akad, wea trifala stap long kantri ya wea olketa kolem Sinaa.

Jenesis 11:31

Nao Tera hemi tekem pikinini blong hem Ebram wetem Sarae wea i waef blong Ebram, an hemi tekem smolfala grani blong hem Lot wea dadi blong hem nao Haran. Nao olketa goaot long taon ya wea olketa kolem Ur long Kaldia, mekem olketa go long kantri wea olketa kolem Kenan. Bat taem olketa kasem wanfala ples wea olketa kolem Haran, olketa mekem hom blong olketa long hem nao.

Jenesis 11:9

Nem blong taon ya nao Babilon, bikos long ples ya, Yawe hemi miksimap langguis blong olketa pipol long wol, an long ples ya, hemi ranemaot olketa pipol mekem olketa go stap olobaot long evri ples long wol.

2 Samuel 23:2

Spirit blong Yawe hemi yusim mi fo talemaot olketa toktok blong hem. Toktok blong hem hemi long maos blong mi.

2 Kings 17:24

Oraet, king blong Asiria hemi mekem pipol blong olketa deferen ples fo stap kam long Samaria. Olketa sensim pipol blong Israel wea i go long Asiria. Olketa ya, i pipol blong Babilon, an pipol blong Kuta, an pipol blong Ava, an pipol blong Hamat, an pipol blong Sefavaem. Olketa ya i tekova long Samaria an olketa taon raonem hem, an stap kam long olketa ples ya.

Stori abaotem Job 1:17

An taem hemi gohed fo toktok yet, narafala wakaman moa hemi kam an hemi tok olsem, “!Masta! Samfala man blong Kaldia i mekem trifala grup an kam faetem mifala. Olketa kilim dae evri wakaman blong yu, an i tekem evri kamel blong yu nao. Mi seleva nomoa mi ranawe kam fo talem yu.”

Aesaea 14:4

An long taem ya tu, bae yumi save tokspoelem king ya blong Babilonia. Yumi tok olsem, “!King! !Wei blong yu fo mekem mifala safa hemi finis nao! !Bikfala kros blong yu tu hemi finis nao!

Aesaea 23:13

!Yufala lukim kantri blong Babilonia! Olketa pipol long lan ya i finis nao. Olketa pipol blong Asiria i barava spoelem ples ya an mekem hemi kamap ples blong olketa wael animol fo stap long hem. Olketa hipimap olketa ston an graon long botom blong wolston long taon ya, mekem hem isi fo klae go insaet an tekova long hem. An olketa brekemdaon evri strongfala sefples blong olketa. Ya, olketa spoelem ples ya finis.

Jeremaea 25:12

“Bat taem seventi yia ya hemi finis, bae mi panisim disfala king blong Babilonia wetem olketa pipol blong hem from olketa sin blong olketa. An bae mi spoelem lan blong olketa, mekem hemi kamap nogud tumas, wea hemi stap olsem an no save finis nao.

Jeremaea 27:7

Evri kantri long wol ya, bae i stap andanit long paoa blong hem. An bihaen, bae olketa stap andanit long paoa blong san blong hem, an bihaen moa, bae i stap andanit long paoa blong grani blong hem, go-go kasem taem wea mi makem fo hemi finis. Long taem ya, bae olketa narafala kantri i strong moa winim Babilonia, an mekem datfala kantri hemi stap andanit long paoa blong olketa ya.

Daniel 1:1

Long mektri yia wea Jehoeakim hemi king long Jiuda, King Nebukadnesa blong Babilonia hemi kam wetem olketa soldia blong hem an hipap raonem taon long Jerusalem fo faetem olketa.

Aposol 7:4

So Ebraham hemi lusim kantri blong olketa Kaldia an hemi go fo stap long Haran fastaem. An bihaen dadi blong hem hemi dae finis, God hemi mekem hem muv kam long disfala kantri wea yufala stap long hem distaem.

2 Pita 1:21

Toktok blong olketa profet, no save kamaot from olketa profet seleva, bat Holi Spirit nao hemi mekem olketa fo talemaot olketa toktok wea God hemi givim kam long olketa.

Revelesin 14:8

Nao mi lukim moa mektu enjel wea hemi kam bihaen long fas enjel ya, an hemi tok olsem, “Bikfala taon Babilon ya wea hemi garem paoa, hemi foldaon nao. !Hemi foldaon finis! Olketa pipol long evri kantri long wol olketa bin kamap olsem drang bikos olketa falom disfala nogud wei blong hem fo durong wetem eniwan.”